Lewo Ndrashelee
6
Nyjila ŋga nu leele naa nɛɛi tra na, a praa bichiɛlɛ sii kre, 2 Nyiɛkpɔɔ biile na pe nya na pe nyu nyu titi. Ki tia praa pe leŋgei imi na pe chaa. 3 A O Tafun Nyiɛkpɔɔ na yo mbo, “Mba ti mbe ni ŋumu kro lewo nu nyjila kro nu. Ŋgi na hin? U pe wejikaara finfin. Mu yire fuŋga na shie, mba ti mbe u li mbe ki wɛ yɛlɛ lafaa na fulo na na.” 4 Kre nyjila kre, hali kre kɔkro, Nyiɛkpɔɔ biile na leweele biile chiɛlɛ leŋge tra mna, mna biile se se a pra pe legbakrɛ, a pra pe mɛɛ tɛɛ Nephilim. Pre pra pe faŋgafɛɛnlɛ mna mɛɛ shɔ fa kre.5 Ŋga O Tafun Nyiɛkpɔɔ na nya imi na leele ndra na sheli tra na, na imi na pe lɛɛ kee, na pe jawala kee na pe kefuɛn bri, nyjila kro nu kre, 6 kra u pe fooro ni, mna u yaa na u lewo gbeele mu wa tra yiɛ na. 7 Ki tia wra yo mbo, “Mbe leele, na yurɛ, na hanyiɛlɛ mblɛ ni gbeele kro pɔ mbe laa tra yiɛ na. Ŋgi na hin? Ki ni yaa na ni pe gbeele.” 8 La, Noah rɛ, na o Tafun Nyiɛkpɔɔ yiɛ shɔ u na.
Noah Kee Yi Kre
9-10 Imi na Noah kee nyi yi kre. U bibilɛ naa taarɛ, pre na lɛ Shem, na Ham, na Japheth. Noah nyjila kre, na u pe lewo chichie ŋmba ndro wa u kee sisaa ka ta mbe yo. U tnimu nu, wre na Nyiɛkpɔɔ praa nyaari, 11 la, leele hamblɛ pre kro na pe sisampefɛɛnlɛ Nyiɛkpɔɔ yiɛ, mnaa kee ŋga ki n fna pini. 12 Nyiɛkpɔɔ na nya imi sisam waŋgra kla mu da. Ŋgi na hin? Na kefuɛn bribri nu leele kro nyi.
13 Nyiɛkpɔɔ na yo Noah pan mbo, “Ni chaa mbe leele kro kla tra yiɛ na. Ŋgi na hin? Pe sisam tra shɔ mu ta poŋgo. Kpra na, mbe tra ŋga, na yira ŋga kii wa ki na kro kla. 14 Tiŋge chichie cha, mu tɛɛ mu krɔ badaaŋga ka gbeele, mu nyinyi wɔ wɔ ki lamu, mu ki mbra na kanya ni lamu, na fimi na. 15 Ti mbe ki titnɔmu pe yaadi lafaa na fuloe shiin na kɛ. Ti mbe ki valam pe yaadi fulo na kunɔ, mbe ki gedem pe yaadi kɛmbɔkunɔ. 16 Ki gbeele mu ki ndra tɔ, mu krɔ wɔ ki mbɛɛ na. Mu yire ki nyaara nyu na, mu pan ki tapan haa chiɛri, ti mbe ki pe yaadi yɔɔ, mu vromboe pe mu ki fɛ mu kun, mu ki lamu kre yɔɔlɛ taarɛ, nyjeeri, na lalaa, na tapan. 17 Mbe ti nyiɛ pan mbe tra yiɛ tɔ, mbe yira ŋga ki ŋuni kro ku. Yira ŋga kii wa tra yiɛ na kro we kla, 18 la, mbe nyu nunu pe na mu ni, mbe mu sɛ le krɔ kre nu! Ŋu na mu chɔ, na mu biile, na pe chiɛlɛ ni kro. 19-20 Yurɛ kro chiɛlɛ na bilɛ, na hanyiɛlɛ kro, chiɛlɛ na bilɛ yii mu le krɔ kre nu, imi kie pe mbe pe ŋmaa ta. 21 Sroe nyini nyini cha yire na yurɛ pre pan.”
22 A Noah na kee ŋga Nyiɛkpɔɔ na yo u pe kre kro pe.