Kenà ebpeked-iiring is menge etew he egkaǥi he tumutuu sikandan ki Jesus. Duen duma he menge metinevangen, iyan, duen daan duma he edsudì dà te zuma. Heini he surat iyan mibpesuratan ni Juan is etew he egngezanan ki Gayu he mezait he edeliǥen su mibpezumazuma sikandin te Lalag te Megbevayà ne mahal ziyà te ǥehinawa zin is Megbevayà wey is menge zuma zin te tumutuu ki Jesus. Egketuenan ta heini su utew zin ebpurungi is menge tumutuu he ebpekeuma ziyà te kandan, minsan ke sikan din pa meuma. Mahabet is nezasig pinaaǥi kandin.

Midalig daan ni Juan is sevaha pa he etew he lumunà ni Gayu te inged he iyan si Dimitriyu. Meupiya is betasan din su metinumanen sikandin te tutuu he penurù he iyan is mehitenged ki Jesu Kristu.

Piru zuen sevaha he zutun te inged dan he egkaǥi he sakup sikandin ni Jesus he mezaat mulà is kandin he vetasan he iyan si Diyutripis. Mid-isip din he lavew sikandin te zuma, ne kenè din edewaten he lavew kandin si Juan wey is duma he menge epustul. Ne ebpemeyungen din daan si Juan. Kenè din iǥalewǥalew is menge tumutuu he ebpemuun diyà te zuma he inged, ne emun duen ebmegmeǥeliyug kandan kenè din haazà edtuǥutan he edtampù kandan ke edsimba zan. Ne iyan hinungdan te kebpesurati ni Juan ki Gayu is wey zin ikepelaus is baal zin he iyan is kedtavang te menge tumutuu he ebpekeuma ziyà te kandan ne kenè din iketazin haazà is mezaat he menge vetasan ni Diyutripis.