3 Is Amey tew he Megbevayà wey si Jesu Kristu he Anak din,

berakat he meǥeǥawi zan kenitew,

ikehizu kiw zan,

ne veǥayi kiw zan te melinawen he kebpekesavuk.

Egkehimu heini su midhamen kiw te tutuu he tuluuwen wey ebmahalen tew is menge zuma tew.

4 Nelipey ad utew su zuen menge anak nu he edtuman te tutuu he tuluuwen sumalà is insuǥù kenitew te Amey tew he Megbevayà.

5 Ne tenged dutun,

Bayi,

edhengyuen ku he egiǥineǥawè kiw.

Kenà beǥu heini he suǥù is idsurat ku kayi,

su zaan heini zuen te aney tew en kedtuu.

6 Su emun egiǥineǥawè kiw,

egketuman tew is menge suǥù te Megbevayà.

Su iyan suǥù din kenitew is:

kinahanglan he egiǥineǥawè kiw.

7 Mezakel is nemenlepew he ebpenurù te tarù dini te kelibutan.

Egkeǥiyen dan he si Jesus is mibpilì te Megbevayà he ibpahadì,

wazà sikandin mehimu he etew.

Is minsan hentei he iyan haazà egkeǥiyen dan,

teruen sikandin wey kuntada ni Kristu.

8 Andam kew wey kenà maawà diyan te keniyu is midheǥuan niw su wey kenà meterini keuzemà is suhul te Megbevayà keniyu.

9 Ke zuen etew he ed-engkezan din is tutuu he tuluuwen he impenurù ni Kristu su iyan edhemenan din is tarù he tuluuwen he in-uman din dutun,

wazà sikandin mebpekidsevaha te Megbevayà.

Is minsan hentei mulà he edhemenan din is tutuu he tuluuwen,

iyan sikandin mibpekidsevaha te Amey tew he Megbevayà wey is Anak din.

10 Ke zuen ebpekeuma he minsan hentei he ebpenurù te tuluuwen ne kenè din iyan ibpenurù is tutuu he tuluuwen he impenurù ni Kristu,

kenè niw ipepemenahik diyan te valey niw.

Kenè niw zaan igalewǥalew sikandin.

11 Su minsan ke igalewǥalew niw zà sikandin,

egketevangan niw sikandin dutun te ulaula zin he mezaat.

12 Mezakel pezem is egkeǥiyen ku keniyu,

iyan,

kenè ku egkesuatan te edsurat.

Egkesuatan ku he ebpenumbaley a ziyan wey kiw mekedlelalag ne wey meheǥet is kelipey tew.

13 Ebpengemusta keniyu is menge anak te suled nu he vahi zini he pinilì daan te Megbevayà.