Dengan te timpu pa ni Juan, utew pa mezelag is menge valey he ibpeevangan te edhizeǥà duen. Umba emun duen edhipanew pehendiyà te zuma he lugar kelegmitan he ziyè dan ed-apet te ed-ubpaan te menge kezumahan dan etawa emiǥu zan he zutun ed-ubpà te mibeyaan dan. Is menge tumutuu ki Jesus he edhipanew pehendiyà te zuma he lugar, diyè dan ebpemenahik te ed-ubpaan te zuma zan he tumutuu zutun he egalewǥalew kandan minsan kenè dan kezuzumahi. Ne zuen daan menge megwewali he edsigudu ebpemenhipanew pehandiyà te nekedseselekawà he menge lugar ne ziyè dan daan ed-apet te ed-ubpaan te menge tumutuu ki Jesus.

Piru is prublima zutun iyan is: duen duma he menge menunudlù he midsuwayan dan is tutuu he tuluuwen ne edhangyù dan diyà te menge tumutuu he ipaapet sikandan, ne emun ibpaapet sikandan ebpekepedayun dan he edwali te tarù. Ne kayi te surat ni Juan mibpetizeenan din is menge tumutuu he kenè dan ipaapet haazà he menge etew su wey zan kenà mekeuǥup te menge vaal zutun te menge teruen.

Mibpehinumduman daan ni Juan is menge etew he mibpesuratan din kayi he kinahanglan he mebminahalà sikandan su iyan heini insuǥù te Megbevayà te menge etew zin.