Is Kedtuuwi ki Jesus
5
Anak en te Megbevayà is minsan hentei he edtuu he iyan si Jesus mibpilì te Megbevayà he ibpahadì.
Ne emun ebmahalen din diyà te ǥehinawa zin is Amey tew he Megbevayà ebmahalen din daan is menge zuma zin he anak te Megbevayà.
2 Emun hustu is kebmahala ta te Megbevayà wey is kedtumana ta te menge suǥù din,
egketuenan ta he hustu zaan is kebmahala ta te menge zuma ta he anak te Megbevayà.
3 Is hustu he kebmahala ta te Megbevayà,
ne iyan is kedtumana ta te menge suǥù din.
Ne kenà mereǥen he edtumanen is menge suǥù din
4 su sikitew is langun he nehimu en he menge anak te Megbevayà,
egkezaag tew en si Setanas he iyan ebayàbayà dini te kelibutan;
ne iyan ibpekezaag tew kandin is kedtuu tew ki Jesus.
5 Hentei is ebpekezaag ki Setanas?
Iyan dà sikan is midtuu he Anak te Megbevayà si Jesus.
Is Tistiǥus Mehitenged ki Jesu Kristu
6 Iyan si Jesu Kristu sikan is midsuǥù te Amey zin dini te kelibutan.
Egketuusan heini pinaaǥi te wahig wey lengesa.
Kenà heini egketuusan pinaaǥi zà te wahig he iyan is kebewtismuwi kandin,
kekenà,
pinaaǥi zaan te lengesa he iyan is kedtiǥis te lengesa zin dutun te kedrensanga kandin te krus.
Iyan ebpenistiǥus kayi zini te kenitew is Waǥas he Mulin-ulin,
su tutuu layun is egkeǥiyen din.
7 Tetelu is ebpenistiǥus mehitenged ki Jesu Kristu.
8 Is sevaha,
ne iyan is Waǥas he Mulin-ulin;
is sevaha pa,
ne iyan is kebewtismuwi ki Jesu Kristu,
ne is sevaha pa,
ne iyan is kedtiǥis te lengesa zin.
Ne neuyun is kedtistiǥus kayi te tetelu.
9 Egkevenaran ki te kebpenistiǥus te menge etew zà duen,
iyan,
lavew pa he mezesen is kebpenistiǥus te Megbevayà ne midtistiǥusan din he Anak din si Jesus.
10 Is minsan hentei he edtuu he Anak te Megbevayà si Jesus,
nevenaran sikandin te kebpenistiǥus te Megbevayà.
Is minsan hentei he kenà edtuu te kebpenistiǥus te Megbevayà,
ed-isipen din he teruen is Megbevayà su wazè din tuuwi is kebpenistiǥus te Megbevayà mehitenged te Anak din he si Jesus.
11 Is Megbevayà,
imbeǥey zin kenitew is untung he wazà pidtemanan;
ne ziyà ebpuun heini is untung te Anak din he si Jesus.
Iyan heini sikan is kebpenistiǥus kenitew te Megbevayà.
12 Is minsan hentei he nekidsevaha te Anak te Megbevayà,
duen din en untung he wazà pidtemanan.
Is minsan hentei he wazà mebpekidsevaha te Anak te Megbevayà,
wazè din untung he wazà pidtemanan.
Is Kedepitè Tew Ziyà te Megbevayà
13 Sikiyu is nemeketuu en te Anak te Megbevayà,
ebpesuratan ku sikiyu wey niw metueni he zuen niw en untung he wazà pidtemanan.
14 Sikitew is nemeketuu,
dekelà is kebpekesarig tew ke ed-ampù kiw ziyà te Megbevayà.
Netuenan tew he ke zuen minsan hengkey he ebuyuen tew he kenà supak te egkesuatan din,
ibeǥey zin kenitew.
15 Layun sikandin ebpemineg kenitew ke ed-ampù kiw ne tenged dutun netuenan tew zaan he ibeǥey zin is ebuyuen tew.
16 Ke zuen minsan hentei he neehè din he nekesalà is duma zin,
iyan,
is rimeǥas dutun te salà,
ne kenà kemetayen,
ne kinahanglan he iampù din ne is Megbevayà,
ibeǥey zin is untung he wazà pidtemanan dutun te nekesalà.
Iyan egkeǥiyen ku kayi is etew he nekesalà he kenà kemetayen is rimeǥas dutun te salè din.
Duen salà he iyan rimeǥas dutun is kemetayen.
Kenè ku iyan egkeǥiyen he id-ampù tew is etew he nekesalà te iring dutun.
17 Salà is minsan hengkey he mezaat he ed-ul-ulahan,
ne zuen salà he kenà iyan rimeǥas dutun is kemetayen.
18 Netuenan tew he wazà minsan hentei he nehimu he anak te Megbevayà he layun ed-ulaula te mezaat su edlig-enan sikandin te Anak te Megbevayà ne kenè en sikandin egkehilevetan ni Setanas.
19 Netuenan tew he menge anak kiw te Megbevayà,
iyan,
is langun he menge kuntada te Megbevayà dini te kelibutan,
ebeyveyaan sikandan ni Setanas.
20 Netuenan tew zaan he midhendini en te kelibutan is Anak te Megbevayà ne imbeǥey zin kenitew is kedsavut wey kiw mehimu he menge emiǥu te tutuu he Megbevayà.
Nekidsevaha kiw te tutuu he Megbevayà su nekidsevaha kiw te Anak din he si Jesu Kristu.
Iyan sikandin tutuu he Megbevayà,
iyan sikandin puunà te untung he wazà pidtemanan.
21 Menge anak ku,
likayi niw is ked-ezapa te minsan hengkey he kenà iyan is tutuu he Megbevayà.