Is Tarù wey is Tutuu
4
Menge minahal ku he suled,
kenè niw petuluy tuuwi is etew he egkaǥi he mid-ulinan sikandin te Waǥas he Mulin-ulin.
Gezami niw zè pa wey niw metueni ke ebpuun be te Megbevayà is ed-ulin kandin.
Umba egkeǥiyen ku heini su mezakel en is menge ebpenurù te tarù he midlepew zini te kelibutan he mid-ulinan sikandan te teruen he mulin-ulin.
2 Is minsan hentei he mulin-ulin he egkaǥi he mibpeetew si Jesus is mibpilì te Megbevayà he ibpahadì,
ne ziyà ebpuun haazà is mulin-ulin te Megbevayà.
Pinaaǥi kayi egketuusan niw is mulin-ulin he ebpuun te Megbevayà.
3 Iyan,
ke zuen mulin-ulin he egkaǥi he wazà mebpeetew si Jesus is mibpilì te Megbevayà,
ne kenà ebpuun haazà is mulin-ulin diyà te Megbevayà,
kekenà,
diyà ebpuun te kuntada ni Kristu.
Nezineg niw en he zuen edlepew he mulin-ulin he ebpuun te kuntada ni Kristu.
Ne egkeǥiyen ku keniyu he zini en guntaan haazà te kelibutan.
4 Sikiyu,
menge anak ku,
gaked kew en te Megbevayà ne nezaag niw en is menge teruen he mulin-ulin su lavew pa he mekeǥeǥehem is Megbevayà he ziyà ed-ubpà te kenitew,
kenà si Setanas he ziyà ed-ubpà te menge etew zini te kelibutan he kuntada te Megbevayà.
5 Haazà is menge etew he mid-ulinan te teruen he menge mulin-ulin,
kuntada man sikandan te Megbevayà wey supak te Megbevayà is ibpenurù dan.
Ne tenged dutun ebpemineǥen sikandan te menge etew zini te kelibutan he kuntada zaan te Megbevayà.
6 Iyan,
sikitew mulà,
gaked kiw te Megbevayà ne tenged dutun ebpemineg te ibpenurù tew is minsan hentei he emiǥu te Megbevayà.
Iyan,
is minsan hentei he kenà gaked te Megbevayà,
kenà ebpemineg te ibpenurù tew.
Pinaaǥi kayi egketuusan tew ke hentei is mid-ulinan te Waǥas he Mulin-ulin he ebpenurù te tutuu wey ke hentei is mid-ulinan te teruen he mulin-ulin.
Is Tutuu he Gaǥew
7 Minahal ku he menge suled,
kinahanglan he ebpurung kiw egiǥineǥawè su ziyà ebpuun te Megbevayà is gaǥew.
Is minsan hentei he zekelà is gaǥew zin te menge zuma zin,
ne iyan nehimu en he anak te Megbevayà wey emiǥu te Megbevayà.
8 Is minsan hentei he wazè din gaǥew te menge zuma zin,
wazè din hanew te menge ulaula te Megbevayà su is minsan hengkey he ed-ul-ulahan te Megbevayà,
ne iyan kebpaahaa zin te ǥaǥew zin.
9 Impehendini te Megbevayà is sebsevaha zà he Anak din te kelibutan su wey pinaaǥi kandin mekeangken kiw te untung he wazà pidtemanan.
Iyan haazà kebpaahaa zin te ǥaǥew zin kenitew.
10 Is tutuu he ǥaǥew,
kenà iyan is kebmahala tew te Megbevayà,
kekenà,
iyan is kebmahala zin kenitew wey is kebpehendiniya zin te Anak din su wey pinaaǥi te kebpehimatey zin mepesaylu is menge salè tew.
11 Menge minahal ku he suled,
geina te iring dutun is utew zekelà he ǥaǥew kenitew te Megbevayà,
kinahanglan he utew zaan dekelà is gaǥew te kada sevaha kenitew ziyà te menge zuma zin.
12 Wazè pa etew he nekeahà te Megbevayà,
iyan,
emun egiǥineǥawè kiw,
ed-ubpà dini te kenitew is Megbevayà,
ne egkeheǥet is kebmahala ta te Megbevayà dini te ǥehinawa ta.
13 Mibpeulinan ki zin te Waǥas he Mulin-ulin ne tenged dutun egketuusan ta he nekidsevaha ki kandin wey impeubpè din dini te kenita is Waǥas he Mulin-ulin.
14 Sikami is menge epustul,
netuenan dey he impehendini te Megbevayà is Anak din su wey melibri is menusiyà te silut.
Umba netuenan dey su neehè dey sikandin ne edtudtulen dey is neehè dey.
15 Ne ke zuen minsan hentei he egkaǥi he edtuuwan din he Anak te Megbevayà si Jesus,
diyà ed-ubpà te kandin is Megbevayà ne nekidsevaha sikandin te Megbevayà.
16 Ne tenged dutun nesavut tew en he utew zekelà is gagew kenitew te Megbevayà ne umba ebpekesarig kiw.
Is minsan hengkey he ed-ul-ulahan te Megbevayà,
ne iyan kebpaahaa zin te ǥagew zin.
Is minsan hentei he layun dekelà is gagew zin te menge zuma zin,
meheǥet is kebpekidsevaha zin te Megbevayà,
ne ziyà te kandin ed-ubpà is Megbevayà.
17 Edheǥetan din is kebmahala tew kandin dini te ǥehinawa tew su wey wazè tew kehandek keuzemà dutun te andew te kedsusiya zin te nengeulaula te tivuuk he menusiyà.
Umba kenè kiw egkehandek su iring te metazeng is menge ulaula ni Kristu,
metazeng daan is kenitew he ulaula zini te kelibutan.
18 Ne is minsan hentei he ebmahalen te Megbevayà,
wazà kinahanglan he egkehandek sikandin te Megbevayà.
Ne ǥeina te wazà kurang te kebmahala kenitew te Megbevayà in-awè din en is kegkehandek tew kandin.
Umba egkehandek is etew su egkeperateng din is silut kandin te Megbevayà,
iyan,
sikan is etew he egkehandek te Megbevayà,
wazè pa meheǥet diyà te isip din is kebmahala kandin te Megbevayà.
19 Umba utew en mahal sikandin dini te ǥehinawa tew su nehuna kiw zin he mibmahal ziyà te kandin he ǥehinawa.
20 Ke zuen minsan hentei he egkaǥi he utew mahal ziyà te ǥehinawa zin is Megbevayà,
iyan,
ebpekigkuntada sikandin te zuma zin,
teruen sikandin.
Su kenà egkehimu he ebmahalen din is Megbevayà he wazè din maahà ke kenè din daan ebmahalen is duma zin he neehè din en mulà.
21 Su insuǥù kenitew te Megbevayà he is minsan hentei he tutuu is kebmahala zin te Megbevayà,
kinahanglan daan he ebmahalen din is duma zin.