2 Minahal ku he suled,

id-ampù ku sikew ziyà te Megbevayà he mebmeupiya is kebpekesavuk nu wey iveǥey kenikew is meupiya he lawa iring te imbeǥey zin daan kenikew is mezesen he kedtuu.

3 Nelipey a utew zutun te kebpekeuma zini te menge suled tew he ebpuun diyan su midtudtulan e zan he utew meheǥet is kedhemeni nu te tutuu he tuluuwen wey uyun kun daan dutun is menge ulaula nu.

4 Iyan utew ku igkelipey is kegkezineg ku te tudtul he edtuman en te tutuu he tuluuwen is menge anak ku te kedtuu.

5 Minahal ku he suled,

utew ka veliǥeǥawen su mibpurungan nu is menge suled tew he midtuluy ziyan minsan te sikan nu pa sikandan mekilala.

6 Mibpenudtul zan te menge tumutuu zini hein midtiǥum key he utew zekelà is gaǥew nu kandan.

Emun ed-uman dan edtuluy ziyan tevangi nu en maan sikandan te paaǥi he egkesuatan te Megbevayà wey zan mekelaus dutun te kedhipanew zan.

7 Su midhipanew zan wey zan mekesangyew te impenurù ni Kristu,

iyan,

kenè dan ebpetavang te kenà menge tumutuu.

8 Ne tenged dutun kinahanglan he iyan ki is tumutuu ebeǥey ziyà te kandan su wey ki meketavang dutun te kedsengyawa zan te tutuu he tuluuwen.

9 Mibpesuratan ku is menge tumutuu ziyan,

iyan,

si Diyutripis,

kenè din ebpemineǥen is menge suǥù ku.

Iyan egkesuatan din is:

iyan dà sikandin ebayàbayà.

10 Emun ebpekehendiyan a,

edseyseyen ku keniyu is langun he mezaat he ed-ul-ulahan din,

su kenà tutuu is menge memezaat he lalag din he ebpemekesuǥat kenami.

Ne kenà duen dà taman su kenè din ed-elimahan is menge zuma ta he tumutuu ke ebpekeuma zan.

Ne kenè din daan idtuǥut he ed-elimahan sikandan te menge zuma zin he tumutuu ziyan.

Is ed-elima mulà kandan,

kenè din idtuǥut he edtampu zan te kedsimba niw.

11 Minahal ku he suled,

kenè ta iyan ed-iringan is mezaat he ulaula he iring dutun,

kekenà,

iyan ta ed-iringan is meupiya he ulaula.

Is minsan hentei he meupiya is menge ulaula zin,

neǥaked sikandin te Megbevayà.

Is minsan hentei mulà he mezaat is ulaula zin,

wazà diyà te ǥehinawa zin is Megbevayà.

12 Nezeliǥan si Dimitriyu te langun he menge etew.

Egkeehè dan pinaaǥi te menge ulaula zin he edtumanen din is tutuu he tuluuwen.

Edeliǥen dey zaan sikandin ne netuenan nu he tutuu is egkeǥiyen dey.

13 Mezakel pa pezem is egkeǥiyen ku keniyu,

iyan,

kenè ku egkesuatan te edsurat.

14 Egkesuatan ku he kenè en utew egkeuǥet edhendiyan a ne human ki ebpekedlalag.

15 Berakat he melinawen is kebpekesavuk niw ziyan.

Is menge emiǥu nu zini,

ebpengemusta zan kenikew.

Ipengemusta a zaan te langun he menge emiǥu ta ziyan.