Is Kedsevaha te Menge Tumutuu
4
Ne tenged kayi te langun,
siak is pirisu tenged te midtuman ku is menge sugù te Nengazen,
edhengyuan ku sikiyu he ǥeina te midhimu kew te Megbevayà he menge tumutuu zin,
ul-ulaha niw is ulaula he zait he ed-ul-ulahan te tumutuu.
2 Kinahanglan he kenè kew pegalbu,
kekenà,
peketulanged kew wey mebmeinentusen kew.
Ipeehè niw is gaǥew niw ziyà te kada sevaha keniyu pinaaǥi te kebmepelevayen niw.
3 Purungi niw is menge ulaula niw su wey kenà maawà is kegkeupakat niw he imbeǥey keniyu te Waǥas he Mulin-ulin su pinaaǥi kayi te upakat egkesevaha is gehinawa niw.
4 Su sikitew is langun he menge tumutuu,
sevaha kiw zà he lawa,
ne sevaha zà is Waǥas he Mulin-ulin he ed-ulin kenitew,
ne sevaha zà daan is ebperetengen tew he ketulusan tenged te midhimu kiw he menge tumutuu.
5 Sevaha zà is Nengazen tew he iyan si Jesus;
iyan dà sikandin edtuuwan tew;
sevaha zà daan is imbewtismuwi kenitew.
6 Sevaha zà daan is Megbevayà he Amey te minsan hentei.
Iyan sikandin ebayàbayà te minsan hentei he tumutuu,
ne ziyà sikandin te minsan hentei he tumutuu,
ne edterebahu pinaaǥi te minsan hentei he tumutuu.
7 Sikitew is langun,
mibeǥayan is kada sevaha kenitew te ketau sumalà is egkesuatan ni Kristu he ibeǥey kenitew.
8 Su zuen insurat he Lalag te Megbevayà he edhenduen te,
“Dutun te kebetuna kandin pehendiyà te langit mezakel is menge vihag din he mid-uwit din.
Ne zuen daan menge ketau he impemeǥey zin diyà te menge sakup din.”
9 Ne pinaaǥi kayi te migkaǥi he nevatun sikandin,
ibpesavut kenitew te Lalag te Megbevayà he midlugtanà sikandin he zaan dini te lumpad te kelibutan.
10 Ne haazà is midhendini te tanà he iyan si Kristu,
iyan daan sikandin nevatun pehendiyà te langit wey minsan diyà dapit te utew metikang he langit.
Ne umba mid-ulaula zin heini su wey mehimu he ziyà sikandin te minsan hendei te tivuuk he kelimbaǥan.
11 Iyan menge ketau he imbeǥey zin kenitew is:
is duma,
midhimu zin he epustul;
ne is duma,
midhimu zin sikandan he peneuva te Megbevayà;
ne is duma,
ne imbeǥey zin kandan is ketau wey zan ikesangyew is Meupiya he Tudtulanen;
ne is duma pa,
ne imbeǥey zin kandan is ketau wey zan meuwit wey mepenurù is menge tumutuu.
12 Umba imbeǥey zin heini is menge ketau su wey kiw mehimani ne wey tew meulaula is ebpeveelan kenitew te Megbevayà ne wey melig-eni is kedtuu tew te menge tumutuu he iyan lawa ni Kristu.
13 Pinaaǥi kayi egkehimu human he egkesevaha kiw te kedtuu tew wey kegketueni tew te menge ulaula te Anak te Megbevayà.
Ne zutun egkepurung egkeheǥet is kedtuu tew ki Jesus ne zutun wazà kurang te menge ulaula tew iring te wazà daan kurang te menge ulaula ni Kristu.
14 Dutun ne egkehimu he kenè kiw en ebpekeiring te vatà su is etew he iring dutun ne egkehalinhalin is kedtuu zin su melemu ebpeketuu te minsan hengkey he tuluuwen he ibpenurù kandin te menge teruen he etew he metau he edlimbung.
15 Ne sikitew mulà,
kinahanglan he tutuu is ibpesavut tew ziyà te menge zuma tew tenged te mahal sikandan dini te ǥehinawa tew.
Ne pinaaǥi kayi ebpekeiseg is kebpekeiring tew te minsan hengkey he ulaula ni Kristu.
16 Su iring kiw te lawa,
ne sikandin iyan ulu.
Ne sikitew is lawa,
ne ebpekesarig kiw kandin te ulu.
Ne is minsan hengkey he parti kayi te lawa,
ne ebpekesarig daan te menge zuma zin he parti.
Ne emun hustu is baal zutun te kada sevaha he parti,
edtulin haazà is tivuuk he lawa pinaaǥi te kebpekedtetevangà te minsan hendei he parti zin.
Ne sikitew zaan,
ebpekeiseg is kebpekeiring tew te ulaula ni Kristu pinaaǥi te kebpurungi te kada sevaha te zuma zin.
Is Beǥu he Kineiya
17 Tenged te suǥù a te Nengazen,
ebpeketelteleenan ku sikiyu he engkezi niw en is menge mezaat he ulaula he iyan ed-ul-ulahan te menge etew he kenà edtuu te Nengazen wey wazà pulus te ed-isipen dan.
18 Wazè dan hanew te hustu he ibayà ne wazè dan untung he ibeǥey te Megbevayà,
geina te nengepaglung sikandan tenged te kezesen te ǥehinawa zan.
19 Kenè dan en igkeeled is minsan hengkey he ulaula zan he mezaat.
Ne kenè dan daan ed-eǥenen is mahawag he kebayà te lawa zan,
kekenà,
utew zan en egkesuati is meremerik he ulaula.
20 Ne sikiyu mulà,
dutun te kebpeketuu niw ki Kristu,
kenà iyan heini sikan is impenurù keniyu.
21 Tutuu iyan he impesavut keniyu is keaǥi ni Kristu ne impesavut daan keniyu is tutuu he tuluuwen he impenurù din.
22 Tenged kayi engkezi niw is menge isip te zaan he kegkeetew niw su nesakup heini te zaan he menge mezaat he ulaula niw.
Ebpekezezaat keniyu heini pinaaǥi te ebpemekelimbung he kebayè din.
23 Kinahanglan he egkepurung egkeveǥu is isip niw wey ǥehinawa niw.
24 Kinahanglan he edhimuwen kew he veǥu en he etew he iyan sikan is beǥu en he linimbag pinaaǥi te zagwey te Megbevayà.
Egketuusan heini is beǥu he etew pinaaǥi te menge tutuu wey metazeng he ulaula he ibpeulaula keniyu te Megbevayà.
25 Umba,
menge suled,
engkezi niw is kedtarùtarù.
Kinahanglan he tutuu is egkeǥiyen niw ziyà te menge zuma niw.
Su nesevaha kiw he pudu parti te lawa ni Kristu.
26 Emun duen igkepauk niw tigkera niw is gehinawa niw su kela ke ibpekesalè niw.
Ne kinahanglan he te kenè pa edsanlep is andew iawè niw en is pauk te isip niw.
27 Kenè niw ituǥut he pinaaǥi te pauk niw,
ne mevintahai kew ni Setanas.
28 Is tekawen,
engkezi zin is kebpenakew ne medterebahu su wey hustu he paaǥi is kegkuwaa zin te igkeuyag din ne wey metevangi zin is egkengeayuayu.
29 Kinahanglan he kenà ebpekezezaat is kebpemèbè niw,
kekenà,
iyan keǥiya niw is menge lalag he ebpekeveǥey he tavang te kedtuu te menge zuma niw su wey zekelà is pulus diyà te ebpemineg sumalà is egkinehenglanen dan.
30 Ne kenè niw ul-ulaha is minsan hengkey he kenà egkesuatan te Waǥas he Mulin-ulin su iyan sikandin tuus diyan te keniyu he ǥaked kew te Megbevayà,
wey tuus daan he keuzemà egkeuma is andew he zutun edhimesaza te Megbevayà is langun he nepuunan din en he vaal te kedlibriya zin keniyu te kebpekesalà.
31 Engkezi niw is kebpekunkuntedehè niw.
Kenè kew meepes wey mepauk te zuma niw.
Kenè kew pekid-eǥet;
kenè kew ituk;
kenè niw ituǥut he ibmezaat te ǥehinawa niw is minsan hengkey he ulaula te zuma niw,
32 kekenà,
mebpepurpurungè kew te kada sevaha keniyu.
Mebpehidhizuwè kew,
mebpepespeseyluwè kew iring te mibpesaylu kew te Megbevayà tenged te kebpekidsevaha niw ki Kristu.