Is Baal ni Pablo Ziyà te Kenà Menge Hudiyu
3
Ne tenged kayi te langun,
siak si Pablo,
is pirisu tenged te kedsundan ku ki Jesu Kristu,
layun ku sikiyu id-ampù diyà te Megbevayà.
Umba nepirisu a su insangyew ku is Lalag te Megbevayà diyan te keniyu te kenà menge Hudiyu.
2 Is Megbevayà,
tenged te ǥaǥew zin keniyu,
duen insarig din kediey he terebahu he iyan igkezeyzey niw.
Netuenan ku he nezineg niw heini.
3 In-eles dengan heini,
iyan,
impesavut din kediey.
Mehitenged kayi,
duen ingkepesavut ku en keniyu pinaaǥi te surat.
4 Ne emun ebesahan niw heini,
egketuenan niw is nesavut ku mehitenged te in-eles dengan mehitenged ki Kristu.
5 Dengan wazà heini ipezayag diyà te minsan hentei he menusiyà,
iyan,
guntaan,
pinaaǥi te Waǥas he Mulin-ulin,
impezayag en te Megbevayà diyà te menge epustul wey ebpemeneuven din.
6 Ibpesavut ku keniyu heini is in-eles dengan he sikiyu is kenà menge Hudiyu,
pinaaǥi te kedtuuwi niw te Meupiya he Tudtulanen,
edtuvazan kew zaan te Megbevayà te langun he meupiya he idtuvad din te menge Hudiyu.
Ne idragkes kew zaan dutun te lawa ni Kristu.
Ne egkezawat niw is menge penaad te Megbevayà tenged te kebpekidsevaha niw ki Jesu Kristu.
7 Nehimu a he suluǥuen te Megbevayà te kedsengyawa te Meupiya he Tudtulanen.
Tenged dà te ǥaǥew zin kediey wey pinaaǥi te ǥehem din imbeǥey zin kediey heini is ketengdanan.
8 Siak,
lavew kediey is minsan hentei he menge tumutuu te Megbevayà.
Ne minsan pa te iyan heini,
midtuvazan a te Megbevayà pinaaǥi te kedsuǥua zin kediey te kebpenudtul ziyan te keniyu te kenà menge Hudiyu te Meupiya he Tudtulanen mehitenged te utew lavew he zekelà he kenà egketegkad he meupiya he igketuvad kenitew ni Kristu.
9 Ne elin daan insuǥua zin kediey su wey ku ikepesavut diyà te minsan hentei he etew ke hengkey is kedtumana zin te zaan he mid-isip din he ebeelan.
Ne wazà dengan heini ipezayag su in-eles te Megbevayà he nenlimbag te minsan hengkey.
10 Umba wazà heini zengan ipezayag su wey ǥuntaan pinaaǥi zà te menge tumutuu ki Jesus,
ibpaahà te Megbevayà diyà te menge kedesenan wey menge egalen diyà te langit ke hengkey kezekelà is ketau zin he wazè med-iring-iring.
11 Umba mid-ulaula zin heini su edtumanen din is mid-isip din dengan te wazè pa limbaǥa is minsan hengkey.
Ne nehimu zin en heini ǥuntaan pinaaǥi te Nengazen tew he si Jesu Kristu.
12 Ne ǥuntaan tenged te kebpekidsevaha tew ki Jesus wey pinaaǥi te kedsarig tew kandin,
egkehimu en he ebpekeetuvang kiw te Megbevayà pinaaǥi te ked-ampù ne wazè en igkeeled tew kandin.
13 Ne tenged kayi te langun,
kinahanglan,
menge suled,
he kenà igkeawà te kedsarig niw heini is kemereǥenan he egkeantus ku tenged keniyu,
kekenà,
lipey kew su iyan ibmeupiya niw.
Is Kebmahala Kenitew ni Jesu Kristu
14 Ne tenged kayi te langun he intuvad kenitew te Megbevayà,
edluhuzan ku te ed-ampù is Amey tew he Megbevayà.
15 Is langun he menge tumutuu he zini pa te lumpad wey ke ziyè en be te langit,
ne migngezanan din sikandan he pemilya zin.
16 Ne edhengyuan ku sikandin he puun te utew zekelà he ǥehem din,
beǥayi kew zin te utew melig-en he kedtuu pinaaǥi te ked-ulini keniyu te Waǥas he Mulin-ulin,
17 su wey,
pinaaǥi te kedtuu niw,
melumuni is gehinawa niw ni Jesu Kristu.
Ne idhangyù ku zaan he heǥeti zin wey lig-eni zin is kebmahala niw te minsan hentei.
Umba idhangyù ku heini su wey sikiyu,
18 wey is minsan hentei kenitew te menge sakup te Megbevayà,
iveǥey kenitew is kedsavut ke hengkey is kenà egkesukud he kebmahala kenitew ni Kristu ziyà te ǥehinawa zin.
19 Berakat he mesavut niw is gaǥew zin keniyu,
minsan pa te kenà heini egkepurung egkesavut te minsan hentei.
Egkesuatan ku heini su wey metuman diyan te keniyu is wazè din kurang he kegkeulini keniyu te Megbevayà.
20 Edeliǥen tew is Megbevayà su,
pinaaǥi te zekelà he ǥehem din he impelumun din dini te kenitew,
utew zekelà is egkehimu zin su lavew pa is egkehimu zin,
kenà te minsan hengkey he egkeisip ta he ebuyuen.
21 Berakat he zeliǥa sikandin pinaaǥi kenitew te langun he menge tumutuu zin wey pinaaǥi ki Jesu Kristu ǥuntaan he timpu wey te wazè din pidtemanan.