Is Menge Suluǥuen te Megbevayà
3
Menge suled,
hein diyan e pa te keniyu,
wazè ku ikepenurù keniyu is mezalem he penurù iring te kebpenurua ku te menge etew he mid-ulinan te Waǥas he Mulin-ulin su henduen kew te menge vatè pa te kedtuu ki Kristu wey menge etew he ebeyveyaan te suat dan.
2 Umba,
gatas dà ne kenà mehunit he egkeenen is keuyaǥan he imbeǥey ku keniyu,
he ke và dà egkeǥiya,
kenà menge mezalem is impenurù ku keniyu su wazè niw pa zutun mesavut is mezalem he penurù.
Ne minsan guntaan,
kenè niw pa egkesavut is iring keniyan
3 su kemulu kew pa ebeyveyaan te keniyu zà he suat.
Su zuen kun duma keniyu he egkesina ne zuen duma pa he ebpekidtebek,
ne tenged kayi henduen be te ebeyveyaan kew pa te suat niw iring te menge etew he wazè pa medtuu ki Jesus.
4 Ke zuen duma niw he egkaǥi he sumusundan ku sikandin ne ke zuen pa sevaha he egkaǥi he sumusundan mulà sikandin ni Epulus,
utew keladu he kemulu kew pa iring te menge etew he wazà medtuu.
5 Isipa niw man heini.
Siak si Pablo,
hentei a?
Ne hentei zaan si Epulus?
Suluǥuen key zà te Megbevayà.
Pinaaǥi kenami midhimu zin he meketuu kew.
Edtumanen dey zà is ebpeveelan din kenami.
Ne iyan dà ed-ul-ulahan dey.
6 Siak,
iring a te ebpemula.
Ne si Epulus,
iring te ebinyag te pinemula,
iyan,
ke wazà ipetuvù te Megbevayà haazà is impemula wazè din pulus.
7 Ne tenged kayi,
haazà is ebpemula wey haazà is ebinyag,
kenà iyan sikandan edeliǥen,
kekenà,
iyan edeliǥen is Megbevayà su ibpetuvù din haazà is impemula.
8 Ebpeked-iring is pulus te ebpemula wey is pulus te ebinyag ne edsuhulan heini is dezuwa te Megbevayà sumalà is mibeelan dan.
9 Siak wey si Epulu,
ebpetevangè key su telezuma key he suluǥuen te Megbevayà.
Ne sikiyu,
iring kew te kamet te Megbevayà he iyan edterebehuwen dey.
Iring kew zaan te ebelayan te Megbevayà.
10 Ne siak,
henduen a te pandey te Megbevayà su imbeǥey zin kediey is gehem su wey mehimu he iyan a edsavuk diyan te keniyu te vatu he edtukuzan te valey ne selakew en is ebevaley zuen,
he ke và dà egkeǥiya,
selakew en is ebpenurù keniyu ǥuntaan.
Ne kinahanglan he is kada sevaha he ebevaley ne purungi zin is baal zin.
11 Su sebsevaha zà is egkehimu he edtukuzan diyan,
ne iyan dà si Jesu Kristu su wazè en duma.
12 Ne ke zuen ebevaley zutun te ki Jesu Kristu,
mezakel is egkeǥamit din he himan te valey.
Ne heini is menge himan,
ne iyan kehuluǥan din is menge penurù.
Ne penenglitan ke utew ebpeketavang is penurù te sevaha he etew ne iring heini te himan he vulawan,
selapì,
wey menge mahal he vatu su kenà heini egketutung te hapuy.
Ne emun kenà utew ebpeketavang is penurù ne iring heini te kayu zà duen wey karan wey ventung su melemu heini mulà egkevinsulan.
13 Ne keuzemà dutun te andew te kedsusi te Nengazen te menusiyà,
egezaman is baal te kada sevaha he tumutuu su wey metueni ke hustu ve wey ke kenà.
Egezaman pinaaǥi te hapuy ne haazà is baal he iring te kayu wey karan wey ventung ne egkeawà.
Ne haazà is baal he iring te vulawan,
wey selapì,
wey menge mahal he vatu,
ne kenà mulà egkeawà.
14 Ne ke zuen etew he wazà maawà is kandin he vaal ne edsuhulan sikandin te Megbevayà.
15 Ne ke zuen etew he naawè en dutun is kandin he vaal,
egkelibri sikandin gihapun te silut asal wazà suhul kandin.
Iring sikandin te etew he nekeǥawas te valey he nevinsulan he wazà uwiten din.
16 Sikiyu is menge tumutuu te Megbevayà,
utew a egkeinuinu keniyu su henduen be te wazè niw mesavut he iyan kew kes baley he ed-ubpaan te Megbevayà su ziyan te keniyu ed-ubpà is Waǥas he Mulin-ulin he Megbevayà.
17 Ne ke zuen etew he edèdeetan din is ed-ubpaan te Megbevayà,
edsilutan sikandin te Megbevayà su mahal ziyà te Megbevayà is menge etew he iyan ed-ubpaan din.
Ne iyan kew ed-ubpaan din.
18 Kinahanglan he kenè kew mebpetazin te menge ulaula niw su ke zuen sevaha keniyu he ed-isipen din he zuen ketau zin te ked-isip sumalà is ked-isipa kandin te zuma zin he menusiyà,
deyzey ke ed-engkezan din is kandin he ketau wey sikandin mehimu he etew he kenà metau sumalà is ked-isipa kandin te menge etew.
Ne human egkehimu sikandin he metau iyan he venar.
19 Su is ketau kayi te kelibutan,
ne wazè din pulus diyà te Megbevayà su utew lavew is kandin he ketau.
Su zuen insurat he Lalag te Megbevayà he edhenduen te,
“Is ketau te metau he etew he igkelupiǥi zin te zuma,
egkehimu he iyan ibpekesipè din te selaid te Megbevayà.”
20 Wey heini pa zaan is insurat he edhenduen te,
“Netuenan te Megbevayà he wazà pulus te ed-isipen te memetau he etew.”
21 Umba,
kinahanglan he wazà medantal te minsan sevaha keniyu he egkaǥi te sakup sikandin te sengeetew.
Su sikami is langun he ebpenurù,
imbeǥey key te Megbevayà keniyu su wey kew mezeyzey.
22 Sikami si Pablo wey si Epulus wey si Pedro zaan,
iyan key nehimu te Megbevayà he menge suluǥuen niw su wey kew mezeyzey.
Ne minsan is tivuuk he kelibutan wey is egkeulaula keuzemà,
wey is egkeulaula ǥuntaan wey minsan is untung niw wey kebpatey niw,
imbeǥey zaan heini is langun te Megbevayà wey kew mezeyzey.
23 Ne sikiyu,
menge sakup kew zà ni Kristu,
ne si Kristu,
sakup sikandin daan te Megbevayà.