Is Ketudluanan Pinaaǥi te Waǥas he Mulin-ulin
2
Siak,
menge suled,
dutun te aney ku kebpekeuma ziyan,
hein impesavut ku ziyan te keniyu is mehitenged te Megbevayà,
ne wazè ku ǥemita is ketau te kegkaǥi wey is menge ketezengan he mibeelan te etew zà duen.
2 Su neisip ku he iyan ku zà ibpesavut diyan is penurù mehitenged ki Jesu Kristu wey is kedrensanga kandin te krus.
3 Ne hein nekeuma a ziyan te keniyu utew a migkulbai su utew a egkehandek su kela ke kenè ku egkehimu is ebpeveelan kedì te Megbevayà.
4 Ne hein midlelaǥan ku sikiyu wey impesavut ku keniyu is Lalag te Megbevayà,
wazè ku iyan gemita is ketau te kegkaǥi wey is menge mekempet he lalag.
Su is Waǥas he Mulin-ulin,
iyan mibpirma te egkeǥiyen ku pinaaǥi te ǥehem din
5 su wey mehimu he kenà iyan niw meseriǥi is ketau te etew zà duen,
kekenà,
iyan niw meseriǥi is gehem te Megbevayà.
Is Impezayag te Waǥas he Mulin-ulin
6 Ne haazà is menge etew he mezesen is kedtuu zan te Megbevayà,
duen ketau he ibpesavut ku kandan,
asal,
is ketau he ibpenurù ku kandan ne kenà daan ebpuun te etew zà duen wey ziyà te menge pengulu he iyan ebayàbayà dini te kelibutan su egkeewaan en heini te menge ǥehem dan.
7 Heini is ketau he egkeǥiyen ku,
ne iyan kes in-eles he edhimuwen te Megbevayà he wazà metueni zengan te menusiyà.
Dengan dà te wazè pa limbaǥa is minsan hengkey,
daan he mid-isip te Megbevayà heini is edhimuwen din su wey kiw tulusa.
8 Ne haazà is menge kelibutanen he pengulu,
wazè dan mesuati te edsavut ke hengkey is edhimuwen te Megbevayà su ke nesavut dan,
wazè dan pezem iransang te krus kes mekeǥeǥehem he Nengazen te langun.
9 Ne tenged kayi iyan ibpenurù dey is insurat dengan he Lalag te Megbevayà he edhenduen te,
“Is utew meupiya wey egkein-inuwan he wazè pa maahà wey wazè pa mezineg te menusiyà wey wazè pa meisip te minsan hentei he etew,
ne iyan heini mid-andam te Megbevayà he ibeǥey zin diyà te langun he menge etew he mahal sikandin diyà te ǥehinawa zan.”
10 Ne heini is in-eles din dengan,
impesavut din en kenitew pinaaǥi te Waǥas he Mulin-ulin.
Su is Waǥas he Mulin-ulin,
egketuenan din is minsan hengkey,
minsan is utew mezalem he in-eles he menge isip te Megbevayà.
11 Hentei is nesayud te isip te sengeetew ke kenà iyan dà haazà is etew nesayud ke hengkey is diyà te keugelingen he isip din.
Ne iring din ded daan iyan dà is Waǥas he Mulin-ulin nesayud ke hengkey is isip te Megbevayà.
12 Sikitew is menge tumutuu,
imbeǥey kenitew te Megbevayà is Waǥas he Mulin-ulin ne is ed-ulin kenitew,
diyà ebpuun te Megbevayà ne kenà ebpuun diyà te etew zà duen.
Umba imbeǥey is Waǥas he Mulin-ulin kenitew su wey tew mesavut is langun he ibeǥey kenitew te Megbevayà.
13 Ne tenged kayi iyan ibpenurù dey is impesavut kenami te Waǥas he Mulin-ulin,
ne kenà iyan is impesavut kenami te memetau he etew zà duen.
Is ebpuun diyà te Waǥas he Mulin-ulin,
ne iyan ibpesavut dey ziyà te menge etew he mid-ulinan daan te Waǥas he Mulin-ulin.
14 Ne is etew he wazà diyà te kandin is Waǥas he Mulin-ulin,
kenè din edewaten is ibpenurù te Waǥas he Mulin-ulin su wazà pulus kayi ziyà te kandin,
ne kenè din daan egkesavut su iyan dà ebpekeseysey kayi ziyà te kandin is Waǥas he Mulin-ulin.
15 Ne sikan is etew he ziyà te kandin is Waǥas he Mulin-ulin,
egkesavut din mulà is pulus te minsan hengkey he ibpenurù te Waǥas he Mulin-ulin.
Iyan,
haazà is etew he wazà diyà te kandin is Waǥas he Mulin-ulin,
kenà sikandin ebpekesavut ke hengkey is diyà te isip te menge etew he mibeǥayan te Waǥas he Mulin-ulin.
16 Su zuen insurat he Lalag te Megbevayà he edhenduen te,
“Wazà etew he nesayud ke hengkey is diyà te isip te Megbevayà,
ne wazà daan ebpekepenurù te Megbevayà.”
Iyan heini insurat dengan,
iyan,
sikitew mulà,
impetuenan kenitew ke hengkey is diyà te isip ni Kristu.