Is Untung Pinaaǥi te Waǥas he Mulin-ulin
8
Ne sikita is nekidsevaha ki Jesu Kristu,
kenè ki en egkehukuman te silut.
2 Su pinaaǥi te kebpekidsevaha ta ki Jesu Kristu imbeǥey kenita te Waǥas he Mulin-ulin is beǥu en he untung ne tenged kayi nelibri ki en te kebpekesalè ta he iyan edungguan din is kemetayen he wazè din pidtemanan.
3 Wazà tavang he egkekuwà ta pinaaǥi te kedtumana ta te kesuǥuan geina te wazè ta mehimu te edtuman,
iyan,
is Megbevayà mulà,
ne iyan neketavang kenita.
Su midsuǥù din sikan is Anak din he si Jesus he nehimu he etew.
Ne si Jesus,
duen lawa zin he iring te lawa ta su wey zin meseǥazi ziyà te lawa zin is silut te Megbevayà tenged te menge salè tew.
Ne pinaaǥi te kedsiluti zin ki Jesus,
in-awè din is gehem te mezaat he kebayè ta.
4 Umba mid-ulaula heini te Megbevayà su wey ki meketuman te hustu sumalà is insuǥù te kesuǥuan.
Ne egkehimu heini su wazè en kinahanglan he edtumanen ta is mezaat he suat te lawa ta,
kekenà,
ebpeketuman ki te hustu su edtevangan ki te Waǥas he Mulin-ulin.
5 Su is minsan hentei he iyan ebayàbayà kandin is mezaat he suat din,
iyan din dà egkeisip is egkesuatan te menge mezaat he kebayà te lawa zin.
Ne is minsan hentei mulà he iyan ebayàbayà kandin is Waǥas he Mulin-ulin,
iyan dekelà diyà te ǥehinawa zin is egkesuatan te Waǥas he Mulin-ulin.
6 Ne emun iyan ebayàbayà te isip te etew is menge mezaat he suat te lawa zin,
edsilutan sikandin te kemetayen he wazè din pidtemanan.
Iyan,
emun iyan mulà ebayàbayà te isip din is Waǥas he Mulin-ulin,
wazà pidtemanan te untung din,
ne melinew en is kedepitè dan te Megbevayà.
7 Emun ebeyveyaan is isip te etew te menge mezaat he kebayà te lawa zin,
kuntada sikandin te Megbevayà su kenè din edtumanen is menge suǥù te Megbevayà.
Ne kenà duen dà taman su kenà egkehimu he egketuman din.
8 Is etew he ebeyveyaan te mezaat he suat te lawa zin,
wazà ulaula zin he egkesuatan te Megbevayà.
9 Ne sikita mulà,
kenè ki en ebeyveyaan te mezaat he suat te lawa ta su emun dini ed-ubpà te kenita is Waǥas he Mulin-ulin ebeyveyaan ki te Waǥas he Mulin-ulin.
Ne ke zuen etew he wazà diyà te kandin is Waǥas he Mulin-ulin he midsuǥù ni Kristu,
kenà sikandin sakup ni Kristu.
10 Iyan,
emun diyà te keniyu si Kristu,
minsan pa te ebpatey zed is lawa niw tenged te salà,
duen niw en gihapun beǥu he untung tenged te mid-isip kew en te Megbevayà he metazeng.
11 Is Megbevayà,
ne iyan mibanhew ki Jesu Kristu.
Ne emun dini ed-ubpà te kenita is Waǥas he Mulin-ulin he midsuǥù din,
ne ebenhawen ki zin daan pinaaǥi te Mulin-ulin he zini ed-ubpà te kenita.
12 Umba,
menge suled,
utew kinahanglan he edtumanen ta is egkesuatan te Megbevayà ne kenè te en ebpezumdumahan is menge mezaat he kebayà te lawa ta.
13 Su emun kenè niw iyan ed-iniyuǥan is menge suat te lawa niw,
edsilutan kew te kemetayen he wazè din pidtemanan,
iyan,
ke pinaaǥi te kedtavang te Waǥas he Mulin-ulin egkeiniyuǥan niw is menge mezaat he ulaula niw,
ebeǥayan kew te untung he wazè din pidtemanan.
14 Su emun ed-eǥaken is minsan hentei te Waǥas he Mulin-ulin tutuu en he anak sikandin te Megbevayà.
15 Su is Waǥas he Mulin-ulin he imbeǥey kenitew te Megbevayà,
ne wazè kiw zin himuwa he menge uripen he utew egkengehandek te Megbevayà,
kekenà,
midhimu kiw zin he menge anak te Megbevayà.
Ne pinaaǥi te ǥehem te Waǥas he Mulin-ulin egkehimu en he egkeamey tew is Megbevayà.
16 Iyan is Waǥas he Mulin-ulin is ebpesavut kenitew he menge anak kiw iyan te Megbevayà.
17 Ne ǥeina te anak ki zin,
keuzemà egkezawat ta is langun he meupiya he impenaad din kenita,
ne kenà duen dà taman,
su is minsan hengkey he ibeǥey zin ki Kristu,
ibeǥey zin daan kenita.
Iyan,
wey ki zà ebpekeambit te utew meupiya he kebpekesavuk ni Kristu ke ed-entusen ta is menge kemereǥenan tenged te kedtuu ta,
iring te si Jesu Kristu,
nekeantus daan te kemereǥenan.
Is Ebperetengen Tew
18 Ne netuenan ku he is kemereǥenan he egkeseǥazan ta ǥuntaan dini te kelibutan,
ne wazà mekesusuluwan te utew kegkelavew he ibeǥey kenita keuzemà.
19 Ne utew meheǥet is kebperetenga te langun he menge linimbag te timpu keuzemà he zutun ibpaahà te Megbevayà is menge anak din he edtulusen.
20 Su is tivuuk he linimbag,
tenged te iyan egkesuatan te Megbevayà,
midhimu zengan te Megbevayà he maawà is hustu he pulus din.
Iyan,
ebperetengen ta is timpu keuzemà
21 he edhimuwen te Megbevayà he wazè en kegkeredak kayi te tivuuk he linimbag,
ne egkeveǥu is langun iring te egkeveǥu zaan is menge anak te Megbevayà he edtulusen.
22 Ne netuenan ta he is tivuuk he linimbag,
ne iring te vahi he ebeliliten he utew edlised su puun pa zengan taman en guntaan ne utew edlised is tivuuk he linimbag tenged te meheǥet is kebperetenga zan te timpu he id-awà te Megbevayà is kegkezeeti zan wey kegkeredak dan.
23 Ne kenà duen dà taman,
su sikita zaan is nekezawat te Waǥas he Mulin-ulin he iyan tuus he zuen pa keuzemà ibeǥey kenita te Megbevayà,
utew egkeheǥet is kebperetenga ta kayi.
Su utew ta egkesuati he meume en haazà is timpu he zutun edhimesazen te Megbevayà is ked-anak-anak din kenita wey edtumanen din is kedtulusa zin te lawa ta.
24 Daan en he nelibri ki te silut,
iyan,
edteǥazan te pa is kedtumana te Megbevayà kayi.
Ne emun egkaǥi ki he zuen edteǥazan ta,
ibpesavut ta he wazè pa meulaula heini is edteǥazan.
Su wazà etew he edteǥazan din is daan he nehitavù.
25 Iyan,
emun wazè pa meulaula haazà is edteǥazan ta,
kinahanglan he edtigker ki is edtaǥad.
26 Ne elin daan baal te Waǥas he Mulin-ulin is:
sikita is kenà metau,
edtevangan ki zin su kenè ta egketuenan is hustu he id-ampù,
iyan,
is Waǥas he Mulin-ulin,
ne iyan sikandin ebpengeetuvang te Amey tew he Megbevayà pinaaǥi te kedhangyù he kenà egkehimu te kineǥiyan te etew.
27 Ne is Amey tew he Megbevayà he nesayud te menge isip tew,
netuenan din ke hengkey is diyà te isip te Waǥas he Mulin-ulin.
Ne haazà is idhangyù te Waǥas he Mulin-ulin tenged kenitew te menge anak te Megbevayà,
iyan daan egkesuatan te Megbevayà te ebeǥey kenitew.
28 Sikitew is langun he mahal is Megbevayà diyà te ǥehinawa zin,
sikitew is midhimu zin he meketuu sumalà is tuyù diyà te isip din,
netuenan tew he pinaaǥi te minsan hengkey he egkehitavù kenitew,
edtuvazan kiw zin gihapun te meupiya.
29 Su zengan te puunè pa te minsan hengkey,
netuenan te Megbevayà ke hentei is egkehimu he menge anak din ne migkaǥi zin he edhimuwen din sikandan he iring te Anak din he si Jesus.
Ne zutun,
egkehimu si Jesus he kakey tew te utew mezakel he menge hazi zin.
30 Ne zutun,
sikitew is langun he mibpilì din wey mehimu he menge anak din,
impetuu kiw zin daan.
Ne kenà duen dà taman,
su mid-isip kiw zin daan he metazeng he iring te wazè kiw mekesalà.
Ne impenaad din daan he zuen timpu keuzemà he edtulusen kiw zin.
Is Kebmahala Kenitew ni Kristu
31 Ne emun ed-isipen ta is langun kayi,
egketuenan ta he tutuu iyan he iyan duma ta is Megbevayà ne wazà minsan hentei he ebpekekaid kenita.
32 Su minsan is Anak din he si Jesus,
wazè din menuǥuni,
kekenà,
midsuǥù din wey mekepehimatey he elili kenita.
Ne emun iyan haazà gaǥew zin kenita,
kenà egkehimu he kenè din daan ibeǥey kenita is langun he impenaad din kenita.
33 Ne wazà ebpekesumbung kenita te mibpilì te Megbevayà su is Megbevayà,
mid-isip ki zin en he metazeng.
34 Ne wazà daan ebpekekaǥi he zait ki he edsilutan su edtevangan ki ni Jesu Kristu.
Minatey sikandin he elili kenita ne kenà duen dà taman,
su nevanhew en daan.
Ne ǥuntaan utew sikandin lavew su ziyà sikandin ebpinuu te zapit te egkekewanan te Megbevayà ne edtevangan ki zin diyà te etuvangan te Megbevayà.
35 Ne emun iyan haazà ne wazà minsan hengkey he ebpekepesuwey kenita ziyà te ki Kristu.
Minsan ke egkerasey ki te kemereǥenan wey samuk wey pesipala;
minsan ke egkereǥenan ki te vitil ne wazè ta ugelingen;
minsan ke egkekeizan ki ne edhimetayan ki;
ne kenà egkeawà is kebmahal ta ziyà te ǥehinawa ni Kristu.
36 Su zuen insurat dengan he Lalag te Megbevayà he edhenduen te,
“Tenged te midtuuwan dey sikew,
layun key hapit edhimetayi te menge etew.
Iring key te ayam he kerehidu he in-andam te kedlepaa
su ebpespesesaǥad key zà ke keenu key edhimetayi.”
37 Ne minsan pa ke egkerasey ki kenè ki ebpetalew su ebpekeveǥey kenita te kelipey is ked-entusa ta kayi,
ne pinaaǥi te ǥehem ni Kristu,
iyan ki ebpekezaag su utew zekelà is gaǥew zin kenita.
38-39 Ne netuenan ku he wazà minsan hengkey he ebpekepesuwey kenita ziyà te zekelà he ǥaǥew kenita he impaahà te Megbevayà pinaaǥi te Nengazen tew he si Jesu Kristu.
Su minsan kayi te uuyag ki pa wey ke ebpatey ki en be,
ne kenà egkeawà is gaǥew zin kenita.
Kenà egkeawà te menge velinsuǥuen din wey te menge mezaat he mulin-ulin.
Kenà egkeawà te minsan hengkey he egkeulaula ǥuntaan wey egkeulaula keuzemà.
Kenà daan egkeawà te minsan hengkey he kedesenan.
Is menge kedesenan he ziyà te utew metikang wey is menge kedesenan he ziyà te utew mezalem,
wey is minsan hengkey he linimbag,
ne kenè dan ebpekepesuwey kenita ziyà te ǥaǥew kenita te Megbevayà he ibpeehè din kenita pinaaǥi ki Jesu Kristu he iyan Nengazen tew.