Is Kegkelibriya Kenitew
7
Menge suled,
nesavut te en ke hengkey is belaud te gubirnu ne netuenan ta he zizalem ki te menge suǥù te velaud taman te kenè ki pa ebpatey,
ne emun ebpatey ki,
kenè en egkehimu he ibpetuman pa kenita is menge suǥù te velaud.
2 Penenglitan,
insuǥù te velaud he is bahi ke zuen din esawa,
kenà ebpekepeuman ebpekepeesawa emun uuyag pa haazà is esawa zin.
Ne emun ebpatey haazà is esawa zin,
egkehimu ke ebpeuman ebpeesawa.
3 Iyan,
emun wazè pa mebpatey haazà is esawa zin ne ebpekiduma wey ebpekidhulid te sengememaame en,
ne nesupak din is belaud su neselselaan din haazà is esawa zin.
Ne emun ebpatey is esawa zin,
ebpekepeesawa ne kenè en ebpekesalà sikandin su nelibri sikandin dutun te velaud mehitenged te telteleesawa.
4 Ne iring din ded daan,
menge suled,
heini is nehitavù kenitew su zutun te kebpatey ni Kristu he elili kenitew,
ne mibpatey ki zaan,
ne tenged kayi kenè en egkehimu he ibpetuman kenita te minatey en is menge suǥù he imbilinbilin ni Moises.
Ne umba nehimu heini su wey kiw mesakup ni Kristu he nevanhew en ne wey tew metuman is egkesuatan te Megbevayà.
5 Su zengan hein kemulu tew pa edtumana is kenitew he kebayà,
duen menge ulaula he indawey te kesuǥuan,
ne tenged te indawey heini,
ne nasì nehimu he iyan daan heini utew tew egkesuatan te ed-ulaula.
Ne tenged te mid-ulaula tew is iring dutun,
iyan dà egkepaabut tew zengan is kemetayen he wazè din pidtemanan.
6 Ne hein nemeketuu kiw ki Jesus,
nelibri kiw te Megbevayà ne wazè en kinahanglan he iyan tew pa edseriǥan is kedtuman te kesuǥuan,
su zutun te kebpatey ni Jesus minatey kiw zaan ne nevelukasan kiw te kegkeuripen kenitew te salà.
Ne ǥuntaan beǥu en is paaǥi te ked-ul-ulaha tew te egkesuatan te Megbevayà su pinaaǥi heini te kedtavang te Waǥas he Mulin-ulin,
ne kenè en pinaaǥi te zaan he paaǥi he iyan is kenitew he kedtumana te insurat he kesuǥuan.
Is Kesuǥuan wey is Salà
7 Ne kunaan te zuma ke zutun ebpuun te kesuǥuan is menge mezaat he ulaula!
Iyan,
kenà dutun ebpuun su zaan is ulaula he mezaat dini te kenita.
Is kesuǥuan,
ne iyan ebpesavut kenita ke hengkey is mezaat he ulaula.
Su emun wazà izawey ziyà te kesuǥuan is kegkeima,
ne wazè ku ǥeina metueni he mezaat bes is kegkeima he zaan dini te ǥehinawa ku.
8 Daan dini te kedì is kebpekesalà,
ne hein impesavut kediey pinaaǥi te kesuǥuan he salà is kegkeima,
mid-iseg is kegkeima ku ne mid-iseg daan is kebpekesalè ku.
Su emun wazà kesuǥuan he egkesupak ta,
wazà daan egketuenan ta he salà.
9 Hein aney,
wazè ku metueni ke hengkey is kesuǥuan,
ne zutun,
henduen be te wazè ku salà.
Ne hein impenurù kedì is kesuǥuan,
netuenan ku he mezaat bes is menge ulaula ku.
Ne tenged kayi nesavut ku he ziyè e ves ebpekezunggù te kemetayen he wazè din pidtemanan!
10 Umba nehimu is kesuǥuan he imbeǥey te Megbevayà su wey mekeangken is menge etew te untung he wazè din pidtemanan emun kenè dan edsupaken.
Iyan,
nehimu en he iyan idsiluti kedì is kesuǥuan su nesupak ku.
11 Henduen be te mid-ekalan a te mezaat he ulaula su pinaaǥi te mezaat he ulaula ku he supak te kesuǥuan,
human ku mesavut he nehukuman ed bes te kemetayen he wazè din pidtemanan.
12 Is kesuǥuan,
diyà ebpuun te Megbevayà,
ne is langun he menge suǥù dutun,
menge suǥù te Megbevayà,
ne kenà haazà mezaat,
kekenà,
meupiya wey metazeng.
13 Ne emun meupiya is kesuǥuan,
kela ke ebpekekaǥi ki he tenged te meupiya,
he ke và dà egkeǥiya,
tenged te kesuǥuan,
nehukuman ad te kemetayen he wazè din pidtemanan.
Ne kenà iyan haazà su tenged te mezaat he mid-ulaula ku,
midhukuman ad te kemetayen su wey ikepesavut kediey he utew mezaat is kedsupaka ku te kesuǥuan.
Is Kebpekedsupakà te Daan wey Beǥu he Kineiya
14 Netuenan tew he meupiya is kesuǥuan su imbeǥey te Waǥas he Mulin-ulin.
Iyan,
siak,
geina te edtumanen ku is menge mezaat he suat te lawa ku ne nehimu a he iring te uripen te menge mezaat he kebayà.
15 Ne kenè ku egkesavut ke maan is ed-ul-ulahan ku is iring kayi su is meupiya he egkesuatan ku he meulaula ku,
kenè ku egkeulaula.
Ne is menge mezaat he ulaula he utew ku igkeepes,
ne iyan ed-ul-ulahan ku.
16 Ne emun nekesupak a te kesuǥuan,
iyan,
kenè ku pezem egkesuatan he mesupak ku,
ne heini is kenè ku kegkesuat,
ne iyan tuus he zini te isip ku meupiya is kesuǥuan.
17 Ne emun iyan haazà,
ne kenà a iyan ed-ulaula zutun te mezaat,
kekenà,
iyan is daan he menge mezaat he kebayà te lawa ku ed-ulaula zutun.
18 Netuenan ku he wazà minsan hengkey he meupiya he zini ebpuun te mezaat he kebayà te lawa ku,
su minsan ke egkesuatan ku te ed-ulaula is meupiya,
kenè ku egkeulaula.
19 Su is ed-ul-ulahan ku,
ne kenà iyan sikan is meupiya he egkesuatan ku,
kekenà,
iyan is mezaat he igkeepes ku he ed-ul-ulahan ku.
20 Ne emun ed-ul-ulahan ku is kenè ku pezem ed-ul-ulahan,
ne kenà a iyan ed-ulaula kayi,
kekenà,
iyan is mezaat he kebayà te lawa ku he iyan ebpuunan dutun te mezaat he ulaula.
21 Ne layun iring kayi is egkehitavù dini te kedì,
ne emun ed-ulaula a pezem te meupiya,
egkeeǥen a te mezaat he kebayà he zini te lawa ku.
22 Ne sumalà is egkesuatan te ǥehinawa ku,
utew ku pezem egkesuati is kedtumana te egkesuatan te Megbevayà.
23 Iyan,
dini te lawa ku,
selakew is ebayàbayà kedì su edsuǥuen a te menge mezaat he kebayà te lawa ku he supaka ku is hustu he ulaula he egkesuatan te ǥehinawa ku.
Uripen a te mezaat he kebayè ku,
ne ebpeketuman a te suat te lawa ku.
24 Utew merasey is egkeulaula ku!
Hentei is ebpekevelukas kedì kayi te kegkeuripena kedì kayi te mekesesalà he lawa ku he midhukuman en te kemetayen?
25 Ne utew zekelà is kebpeselemati ku te Megbevayà su pinaaǥi te Nengazen tew he si Jesu Kristu nevelukasan e en!
Ne egkesavut niw en is egkeulaula ku.
Su sakup is gehinawa ku te Megbevayà,
ne is lawa ku,
ne sakup mulà te mezaat he kebayè din.