3
Ne emun iyan haazà,
henduen be te wazà pulus te kegkehudiyu zey ne wazà daan pulus te tulumanen dey te kedsirkunsidar.
2 Iyan,
dekelà iyan is pulus su sikami is menge Hudiyu,
insarig kenami is insurat he Lalag te Megbevayà.
3 Ne minsan pa te zuen menge zuma zey te menge Hudiyu he wazà mebpemineg te Lalag te Megbevayà,
kenà egkehimu he kenà edtumanen te Megbevayà is impenaad din dengan.
4 Su minsan ke teruen is tivuuk he menusiyà,
tutuu mulà is minsan hengkey he egkeǥiyen te Megbevayà.
Su zuen insurat dengan he lalag ni Hadì David te kedtistiǥusi zin te ketazeng te Megbevayà he edhenduen te,
“Kenà egkehimu he kenà hustu is kenikew he ketezengan,
su ke idsumbung ka,
layun ebpekezaag is kenikew he ketezengan,”
ke si David.
5 Ne zuen menge pilusupu he etew he egkaǥi te,
“Emun ed-ulaula ki te mezaat,
meupiya zaan haazà su emun egkeisip te menge etew is menge ulaula ta he mezaat,
wey is menge ulaula te Megbevayà,
siguradu egkesavut dan he utew mulà meupiya is menge ulaula te Megbevayà ne ebpekezalig dan te Megbevayà,
ne utew haazà meupiya.
Ne emun,”
ke sikandan,
“nehimu is meupiya tenged te mezaat he mid-ulaula ta,
kenà metazeng is kedsiluti kenita te Megbevayà tenged te mid-ulaula ta he mezaat.”
Ne pilusupu is menge lalag he iring kayi.
6 Su kenà egkehimu he kenà metazeng is Megbevayà su emun kenà sikandin metazeng,
kenà egkehimu he iyan sikandin edhukum keuzemà te tivuuk he menusiyà.
7 Ne zuen daan menge pilusupu he etew he egkaǥi te,
“Deyzey ke egkaǥi ki te tarù su emun egketuenan te menge etew he teruen ki,
egkeisip dan he kenà mulà teruen is Megbevayà ne edeliǥen dan sikandin ne utew meupiya haazà.
Ne emun pinaaǥi te menge tarù ta ebpekelepew he tutuu mulà is menge Lalag te Megbevayà,
maan is edsilutan ki pa tenged te menge tarù ta?”
8 Ne zuen menge etew he egkaǥi he iring kayi is ibpenurù ku,
iyan,
kenè ku edewaten is menge ketezengan he iring kayi su ibpesavut dan he meupiya is ked-ulaula te mezaat emun pinaaǥi zutun egkehimu is meupiya.
Is menge etew he iring kayi is ibpenurù dan,
utew metazeng is kedsiluti kandan te Megbevayà.
Wazà Minsan Sevaha he Metazeng
9 Ne sikami is menge Hudiyu,
kunaan niw vuwa ke utew key zeyzey,
kenà is menge etew he kenà menge Hudiyu,
iyan,
kenà heini venar.
Daan ku en impesavut keniyu he is tivuuk he menusiyà,
Hudiyu se kenà Hudiyu,
ne pudu ebpemekeulaula te mezaat.
10 Su zuen insurat he Lalag te Megbevayà he edhenduen te,
“Wazà minsan
sevaha
he etew he ed-isipen
te Megbevayà he metazeng.
11 Wazà mesayud te hustu mehitenged te Megbevayà ne wazà daan etew
he ebpen-ahà te hustu he ibayà pehendiyà te Megbevayà.
12 Su nemekesuwey zan pudu te hustu he ibayà;
mid-ulaula zan is langun te mezaat;
ne wazà minsan sevaha kandan he ed-ulaula te metazeng.
13 Utew ebpekezezaat is kebpemèbè dan iring te nemahù diyà te leveng he wazà bumbuni.
Teruen dan ne is egkeǥiyen dan,
ne iring te hereg te uled
su utew ibmesakit te ǥehinawa te menge zuma zan.
14 Utew mesakit is kebpenrawak dan.
15 Ne kenà duen dà taman su melemu zan ebpekevunù.
16 Ke minsan hendei zan ebpekepevayà,
ebpekezezaat dan
ne ebpekeuwit dan te kemeresayan.
17 Wazè dan metueni is melinawen he ulaula.
18 Ne kenè dan daan ed-isipen
he igkehandek dan
is kedsupak dan te Megbevayà.”
Iyan heini kes migkaǥi te insurat he Lalag te Megbevayà.
19 Ne netuenan ta he is ibpesavut kenita kayi te Lalag te Megbevayà,
ne ibpesavut daan diyà te menge etew he nesakup te kesuǥuan he iyan key is menge Hudiyu.
Ne pinaaǥi kayi egketuenan ta he wazà minsan hentei he etew he ebpekekaǥi he kenà sikandin dait he edsilutan su nekesupak te Megbevayà is tivuuk he menusiyà.
20 Su wazà minsan hentei etawa he egkeisip te Megbevayà he metazeng pinaaǥi te kedtumana zin te kesuǥuan su layun din egkesupak is kesuǥuan.
Umba imbeǥey is kesuǥuan su wey tew mesavut he mesinupaken kiw ves te menge suǥù te Megbevayà.
Is Paaǥi te Kebmetazeng
21 Ne ǥuntaan,
impezayag kenitew te Megbevayà is paaǥi wey kiw zin meisip he metazeng.
Ne kenà heini pinaaǥi te kedtumana te kesuǥuan,
asal migkaǥi heini is paaǥi zutun te insurat dengan he Lalag te Megbevayà.
22 Ed-isipen kiw te Megbevayà he metazeng emun edtuuwan tew si Jesu Kristu.
Is minsan hentei he etew,
ne ed-isipen te Megbevayà he metazeng emun edtuuwan din si Jesu Kristu su wazà ibpelavi te Megbevayà te minsan hentei he etew.
23 Nekesalà is tivuuk he menusiyà ne utew en sikandan meziyù te ketulusan he ibeǥey te Megbevayà.
24 Iyan,
tenged dà te ǥaǥew kenitew te Megbevayà ed-isipen kiw zin gihapun he metazeng he henduen be te wazè kiw mekeulaula te mezaat su midlibri kiw ni Jesu Kristu.
25 Midsuǥù sikandin te Megbevayà wey mehimu sikandin he pemuhat he elili kenitew,
ne tenged te kegkepelisi kenitew te lengesa zin ebpeseyluwen te Megbevayà is menge salè tew emun edtuuwan tew sikandin.
Midhimu heini te Megbevayà su wey tew mesavut he metazeng is hukum din,
minsan pa zengan tenged te meinentusen sikandin,
wazè din dè pa siluti is menge etew tenged te menge salè dan.
26 Iyan,
kinahanglan he zuen silut tenged te menge salà te menusiyà,
umba midsilutan din si Jesus.
Ne tenged dutun egketuenan tew he metazeng is kedhukum te Megbevayà ne tenged kayi egkehimu he ed-isipen din he metazeng is minsan hentei he edtuu ki Jesus.
27 Umba,
wazà igkezantal te minsan hentei.
Kenè ki ebpekekaǥi he iyan ketezengan ke maan is ed-isipen ki te Megbevayà he metazeng su midtuman ta is kesuǥuan su iyan idewata kenita te Megbevayà is kedtuu ta ki Jesus.
28 Tenged kayi migkaǥi ku en he iyan dà ketezengan ke maan is metazeng is ked-isipa kenita te Megbevayà,
kenà iyan is kedtumana ta te kesuǥuan,
kekenà,
iyan is kedtuu ta ki Jesus.
29 Ne siguradu zuen egkaǥi he is Megbevayà,
ne Megbevayà te menge Hudiyu zà,
iyan,
kenà heeyan tutuu,
su iyan sikandin Megbevayà te tivuuk he menusiyà,
Hudiyu se kenà Hudiyu.
30 Su sebsevaha zà is Megbevayà ne ed-isipen din is menge Hudiyu he metazeng emun edtuuwan dan si Jesus.
Ne is menge etew he kenà Hudiyu,
ed-isipen din daan sikandan he metazeng emun edtuuwan dan si Jesus.
31 Ibpesavut ku he iyan dà ketezengan ke maan is ed-isipen ki zin he metazeng is kedtuu ta,
iyan,
kenè niw isipa he tenged kayi wazè en pulus te menge suǥù te Megbevayà su tenged te kedtuu ta ki Jesus,
hustu en dutun is kegketumana ta te menge suǥù din.