Ruma 2

Is Hukum te Megbevayà

1-2 Netuenan ta he utew metazeng is idsiluti te Megbevayà te menge etew he ed-ulaula te menge mezaat he iring kayi,

iyan,

sikew is egkaǥi he utew mezaat heini is menge ulaula kayi te menge etew,

wazè nu zaan kebpekeǥawas su edsudien nu is mezaat he ulaula te zuma,

iyan,

mezaat daan is ed-ul-ulahan nu.

Ne tenged kayi zutun te kedsudia nu kandin,

nesudì nu zaan is kenikew he ulaula.

3 Ne emun edsilutan te Megbevayà is ed-ulaula te mezaat,

sikew is ed-ulaula zaan te mezaat,

ne edsudì ka te menge zuma nu,

iyan ke pe be kenà siluti zin daan.

4 Kunaan nu vuwa ke ǥeina te utew mepelevayen wey metulanged is Megbevayà,

ne kenè en kinahanglan he ebpezumdumahan nu is menge lalag din.

Iyan,

iyan ketezengan ke maan is utew veliǥeǥawen is Megbevayà su ed-eǥaken ke zin su wey nu meiniyuǥi is mezaat he ulaula.

5 Ne minsan pa zutun,

mezesen pa utew is gehinawa nu ne kenè ka egkesuat he ed-iniyug te mezaat he ulaula;

ne kada andew ed-iseg ebmeveǥat is silut he idrasey kenikew keuzemà dutun te andew te kedsilut te Megbevayà.

Ne zutun he timpu ibpeehè din kenitew is metazeng he kedhukum din.

6 Su ibeǥey zin diyà te langun is dait he ibeǥey te kada etew sumalà is mid-ulaula zan.

7 Iyan,

duen menge etew he edhemenan dan is meupiya he ulaula su iyan ed-isipen dan layun is kedeliǥa wey is kedtulusa kandan keuzemà te Megbevayà wey is kegketehuza zin kandan keuzemà.

Ne untung he wazè din pidtemanan is ibeǥey zin kandan.

8 Iyan,

duen daan duma he menge etew he iyan dan ed-isipen is kandan he egkesuatan ne kenè dan edtuuwan is tutuu he tuluuwen,

kekenà,

iyan dan edtumanen is kenà hustu.

Ne kenà deisek dà is pauk te Megbevayà he ibpeehè din kandan,

kekenà,

utew meveǥat is idsilut din kandan.

9 Su is langun he menge etew he ed-ulaula te mezaat,

lavew en is Hudiyu pehendiyà te kenà Hudiyu,

kemeresayan wey kegkeseeng is idsilut kandan.

10 Iyan,

is menge etew he ed-ulaula mulà te meupiya,

lavew en is Hudiyu pehendiyà te kenà Hudiyu,

edtulusen sikandan keuzemà te Megvevayà,

ne ibpetehuzan din sikandan ne ibeǥey zin diyà te kandan is melinawen he kebpekesavuk,

11 su is Megbevayà,

wazè din ibpelavi te minsan hentei.

12 Is menge etew he kenà menge Hudiyu,

wazè dan metueni ke hengkey is insuǥù te kesuǥuan he imbilinbilin ni Moises.

Ne ke ebeelan dan is mezaat,

edhukuman gihapun sikandan keuzemà te Megbevayà,

iyan,

kenè din egemiten is kesuǥuan dutun te kedhukumi zin kandan,

ne idsilut din kandan is kemetayen he wazè din pidtemanan.

Ne is menge etew he Hudiyu,

netuenan dan mulà is insuǥù dutun te kesuǥuan,

ne emun ebeelan dan is mezaat,

edhukuman sikandan te Megbevayà sumalà is nesupak dan dutun te kesuǥuan.

13 Su emun iyan ta edseriǥan is kesuǥuan,

kenè egkehimu he ed-isipen ki te Megbevayà he metazeng pinaaǥi zà te kebpemineg te insuǥù dutun te kesuǥuan,

kekenà,

kinahanglan he wazà minsan hengkey he sayep ta zutun te kedtumana ta te kesuǥuan.

14 Is menge etew he kenà menge Hudiyu,

wazà sikandan mesayud te kesuǥuan he imbilinbilin ni Moises,

iyan,

duen timpu he egketuman dan is insuǥù dutun te kesuǥuan su minsan pa te kenè dan egketuenan is kesuǥuan,

duen diyà te ǥehinawa zan ebpekepenurù kandan ke hengkey is meupiya he ed-ul-ulahan.

Ne tenged dutun ebpekekaǥi ki he zuen kesuǥuan diyà te ǥehinawa zan.

15 Pinaaǥi te menge ulaula zan he meupiya egketuusan ta he ibpenurù kandan te ǥehinawa zan is insuǥù te kesuǥuan.

Netuenan dan diyà te isip dan ke hengkey is meupiya wey ke hengkey is mezaat he ed-ul-ulahan su zuen ke egkeǥiyen dan he meupiya is ulaula zan ne zuen ke keǥiya zan he mezaat.

16 Ne kenà heini egkelipatan te Megbevayà keuzemà te andew he zutun pinaaǥi ki Jesu Kristu edsusiyen din is minsan in-eles he menge isip te langun he menge etew.

Iyan heini ibpenurù pinaaǥi kayi te Meupiya he Tudtulanen he idsangyew ku.

Is Kesuǥuan wey is Menge Hudiyu

17 Ne sikiyu zaan is menge zuma ku he menge Hudiyu,

kunaan niw ke egkeseriǥan niw is kedtumana niw te kesuǥuan ne ibpezalig niw is upakat niw te Megbevayà.

18 Netuenan niw is egkesuatan te Megbevayà,

ne nesavut niw ke hengkey is hustu he ed-ul-ulahan su impenurù keniyu is kesuǥuan.

19 Kunaan niw ke iyan kew ebpekeaǥak te menge etew he nengelakap is isip dan,

ne kunaan niw zaan ke iyan kew sulù he ebpeketayew te ibayè dan pehendiyà te Megbevayà.

20 Kunaan niw ke iyan kew ebpekepenurù te menge etew he wazà mesayud te Megbevayà,

ne kunaan niw zaan ke iyan kew ebpekepenudlù te menge etew he sikan pa mekeistudyu te hustu.

Umba iyan heini ed-isipen niw su insarig keniyu te Megbevayà is kesuǥuan ne utew hustu is ketau wey utew tutuu is tuluuwen he ebpuun dutun.

21 Ebpekepenurù kew te zuma,

ne maan is kenè niw ebpenuruen is gehinawa niw?

Su ibpenurù niw he kenà meupiya is kebpenakew,

iyan,

tekawen kew!

22 Ibpenurù niw he mezaat is kegkevuta ta te kenè ta esawa,

iyan,

egkevuten niw is kenè niw esawa!

Utew niw igkeepes is ledawan he ed-ezapen te kenà Hudiyu,

iyan,

edseled kew zutun te valey he zutun ed-ezapa is menge ledawan wey kew mekepenakew.

23 Ibpezalig niw is kedtumana niw te kesuǥuan,

iyan,

edsupak kew ǥihapun te kesuǥuan,

ne tenged kayi egkesudian is Megbevayà.

24 Ne mehitenged kayi,

duen impesurat dengan te Megbevayà he edhenduen te,

“Tenged keniyu te menge Hudiyu,

is menge etew he kenà Hudiyu,

edsumpeliten dan is Megbevayà.”

Iyan haazà impesurat dengan.

25 Sikiyu is menge Hudiyu,

kunaan niw ke zekelà is pulus te kebpesirkunsidar niw,

ne zuen iyan pulus te kebpesirkunsidar ta emun egkepurungan ta te edtuman is kesuǥuan,

iyan,

ke kenè ta egkepurungan te edtuman is kesuǥuan ne iring ki zed te menge kenà Hudiyu he wazè mebpesirkunsidar.

26 Ne iring din ded daan penenglitan,

ke zuen etew he kenà Hudiyu ne egkepurungan din te edtuman is kesuǥuan,

edewaten sikandin gihapun te Megbevayà he iring te nesirkunsidar en.

27 Ne minsan ke kenà Hudiyu sikandin,

pinaaǥi te kedtumana zin te kesuǥuan,

igkepeehè din he edsilutan kew is menge Hudiyu te Megbevayà su edsupak kew mulà te kesuǥuan.

Ne iyan kew pezem kes mibilvilinan te kesuǥuan ne iyan kew nesirkunsidar!

28 Su is tutuu he Hudiyu,

ne kenà iyan dà is Hudiyu he midtuusan is lawa zin pinaaǥi te kedsirkunsidara kandin,

su is tutuu he kedsirkunsidar,

ne kenà iyan is kedtuusi te lawa.

29 Ne iring din ded daan su is tutuu he Hudiyu,

ne iyan is etew he midtuusan te Megbevayà is gehinawa zin pinaaǥi te Waǥas he Mulin-ulin,

ne kenà pinaaǥi te kedtumana te kesuǥuan.

Ne is etew he iring kayi,

ne egkehimu he kenà sikandin egkezalig te menge zuma zin he etew,

iyan,

egkezalig sikandin mulà te Megbevayà.