E Iesu e ranga bera noura
2
A matsi galapien koru i tar,
alia e koloto menagi a man raranga teka i tamilimiou,
taraha alia e ngilin taguhu ragou limiou ba limiou tema tatei kato homi mi.
Kaba te kato homina a töa katuun,
ara e kamera a katuun te matsköna,
e Iesu Kristo te ranga bera noura tere Tamarara.
2 Taraha,
e Iesu te sakahis raioura tere Sunahan tara pöata te mateien.
Nonei ema kato pepeisa beraira a ka teka.
Kaba nonei e kato mei a ka teka tega taguhu meraien u katuun hoboto tara mamana han i puta.
3 Te hengo hanige riara u raranga tere Sunahan,
ara e atei silera ara u katuun hamana i tanen.
4 Na te poeiena a katuun,
“Alia e katuun hamana uagu tere Sunahan,”
kaba nonei ema hengoe neien,
nonei a katuun a gamogamo na u raranga u mana ema ka neia i torinen.
5 Kaba a katuun te hengo hanigeiena u raranga tere Sunahan,
nonei a katuun te ngil hamana korueiena e Sunahan.
Na katuun te ngilin atei sil korueiena tega ka haniga gono menaien e Sunahan,
nonei e tatei hengoena u raranga i tanen.
6 Esi a katuun te poeiena nonei e ka gono mena e Sunahan,
a katuun teka ega markato has uu te markato uu e Iesu.
U raranga u tsimus tere Sunahan
7 A man hahikapien,
alia ema koloto nagi tu raranga tu tsimus i tamilimiou.
E möa.
Alia e koloto negu u rarangana i manasa tu hengo naiam limiou tara pöata tu hengo mam namia limiou e Iesu.
U rarangana i manasa teka nonei u raranga tu hengo hakapa naiam limiou.
8 Kaba u raranga te koloto mena gilia i tamilimiou e tsimus hasina.
Na u katuun i tari te markato uu e Iesu na te markato has uami limiou ba nori te atei siler te mana uana u raranga teka.
Taraha,
u kuhil e tia hamanasana ba u ualesala hamana te butuna.
9 A katuun te poeiena nonei e kana turu ualesala,
kaba e paköeiena a hahatoulana i tanen,
nonei e ka noa hasna turu kuhil.
10 A katuun te ngil hamana korueiena e toulanen e kana turu ualesala,
na nonei e möa ta ka tega kato homieien.
11 Kaba a katuun te paköeiena a hahatoulana i tanen e kana turu kuhil.
Nonei e here nei a katuun te silana tara maroro a kuhil.
Na nonei ema atei sile nei ime te la uanen,
taraha u kuhil e hasaheiena a matanen.
12 A matsi galapien alia e koloto uagu i tamilimiou,
taraha e Iesu e luba hakapein a man markato a man omi i tamilimiou.
13 Na lia e koloto uagu i tamilimiou,
a pal kapan,
taraha alimiou e atei silemiou e Iesu te kaia i mam te habuteia e Sunahan u kolö na u puta.
Na lia e koloto uagu i tamilimiou,
a pal hitots,
taraha alimiou u la salsaluhe hakapeiam e Satan.
14 Alia e koloto uagu i tamilimiou,
a matsi galapien,
taraha alimiou e atei silemiou e Tamarara.
Na lia e koloto has uagu i tamilimiou,
a pal kapan,
taraha alimiou e atei silemiou e Iesu e kaia i mam te habuteia e Sunahan u kolö na u puta.
Na lia e koloto has uagu i tamilimiou,
a pal hitots,
taraha alimiou e tagala miou na limiou e pile hakarapoto namiou u raranga tere Sunahan i torimilimiou,
na limiou u la salsaluhe hakapeiam e Satan.
15 Alimiou goma ngilemi a markatona i puta.
Na limiou goma ngil hasemi a manka te butu gono mena a markatona i puta.
A katuun te ngileiena a markatona i puta ema ngile nei e Tamarara.
16 Nori u katuun teka te ngileier a markatona i puta:
a katuun te matesilena a manka man omi,
a katuun te ngil korueiena tega tara menaien a manka man omi,
a katuun te saala koruena a peisanen.
A man ngilngil hoboton töa teka e butu nama tara markatona i puta.
E ma butu nameia tere Tamarara.
17 A markato na u ngilngil u omina i puta e tia hobotona romana,
kaba a katuun te kukuteiena u ngilngil tere Sunahan e töatöa nitöana romana.
A katuun te korupakö nena e Kristo
18 A matsi galapien,
nonei i romana a kapakapana pöata.
Alimiou u hengo noahas neiam tega butu uama romana a ka te korupaköni e Kristo.
Na u katuun u parpara te korupakö ner e Kristo i butu hakapa.
A ka teka e haröto raneira a pöata i romana a kapakapana pöata.
19 U katuun teka i laba hakapa raioura,
taraha nori ima katuun hamana uai tara hun katuun i tarara.
Sanena nori ti katuun uu i tarara,
nori sanena e ka haniga gono meraioura.
Kaba pöata ti laba raienra,
ba u katuun e atei sil taleier nori hoboton töa ema katuun uari tara hun katuun i tarara.
20 Kaba limiou i lu hakapaneiam u Namnamei u Göagono tere Iesu Kristo,
na limiou hoboto e kame miou a niatei.
21 Alia ema poeiegi alimiou ema atei silemi a manka te manana,
ba lia te koloto uagu i tamilimiou.
E möa.
Alia e koloto uagu i tamilimiou taraha alimiou e atei silemiou a manka te manana,
na limiou e atei sil hasemiou e möa ta töa ta ka ta gamo tega tatei butuma tara manka te manana.
22 Na a katuun te poeiena e Iesu ema Kristo nei te hopö kapiin e Sunahan,
nonei a katuun a gamogamo koru.
A katuun te tori tsuga nena e Tamarara na e Iesu a Pien Tson i tanen,
nonei a katuun teka te korupakö nena e Kristo.
23 A katuun te tori tsuga nena a Pien Tson tere Sunahan ema katuun uanei tere Tamarara.
Kaba a katuun te hatei nena e Iesu nonei a Pien Tson tere Sunahan,
nonei e pala uana tere Tamarara.
24 Alimiou go pile hakarapoto naiam u raranga tu hengo mam naiam limiou.
Na te ka noana u raranga tu hengo mam naiam limiou i torimilimiou,
ba limiou te ka gono nitöa memou a Pien Tson tere Sunahan,
na e Sunahan e Tamarara.
25 Na nonei a ka te ranga hakapein e Kristo,
tego hala rien ra,
nonei a nitöatöa te ka nitöana.
26 Alia e koloto megi a ka teka,
taraha a palair u katuun ena mots gamo rariou limiou.
27 Kaba u Namnamei u Göagono ti lu mameiam limiou tere Kristo,
nonei e ka gono mera noulimiou.
Na limiou goma tokumi te möa uana ta tson hihatuts i tamilimiou.
Taraha,
u Namnamei tere Sunahan e hatuts ranei limiou a mamanaka.
Na manka te hihatuts nanen e manana.
E möa tego gamouaien.
Na limiou ego ka nitöa mia tere Kristo temar ranga uu Namnamei tere Sunahan.
28 A matsi galapien,
ka gono nitöa meiam e Kristo.
Taraha,
a pöata tena la namen romana,
aragi tuol hakarapoto bara tema tatei matsingolo roi tena tuol roua ra i matanen.
29 Na te atei silemia limiou e Iesu nonei a katuun a matskö,
ga lö e atei sil talem a katuun te kato hanigana nonei a pien tere Sunahan.