U hahuoluna u pas te kolotein e
JON
1
1-2 Alia e Jon,
a tson a kapan i tamilimiou.
Alia e koloto menagi u pas teka i tamölö a tahol te hopö kapiin e Sunahan na galapien has i tamölö.
Alia na u katuun hoboto te atei silem u hihatuts u mana,
e ngil hamana koru ramou limiou,
taraha u raranga u mana e ka nitöana i torirara.
3 E Sunahan e Tamarara na e Iesu Kristo a Pien Tson i tanen,
turu ngilngil na tara nimana i tanen,
e tatei taatagi rariou ra bate taguhu rariou ra bate hala rari ra a masalohana.
U nihamana na u ngilngil
4 Alia e sasaala koru megu te sabe mena gilia,
te kukute menari a palair a galapien i tamölö u raranga u mana te hatei raira e Tamarara e Sunahan.
5 Kaba lia ema koloto menagi tu raranga tu tsimus i tamölö.
E möa.
Alia e koloto negu u raranga ti lu mamira te poeiena,
ara a hun katuun tere Iesu egi hiangilngil.
6 Tegi ngil korueia ra e Sunahan,
bara te hengo haniga hasera u raranga i tanen.
Na u raranga i tanen i hatei mam noahasin tegi hiangilngil uu ra.
7 A para a katuun a gamogamo te hula la ria tara mamana han,
bate holis ner te butun katuun hamana uu e Iesu Kristo.
Na katuun te omiena e Kristo e markato has uana teka,
nonei a katuun gamogamo.
8 Alimiou go haneiam,
ma hapolase mi a manka man niga ti kui hatagala sili ra.
Alimiou go kato nitöa sileiam tego lu mena milimiou a manka man niga te hopö kap berai limiou e Sunahan.
9 A katuun te poeiena u hihatuts tere Kristo ema antuna neia turu ngilngil i tanen bate kato silena u tana u hihatuts,
e Sunahan ema ka neia tara katuun teka.
Kaba a katuun te kukute nitöanena u hihatuts tere Kristo nonei e ka uana tere Tamarara na Pien Tson i tanen.
10 Temi hihatuts nena ta katuun u raranga tema matskö neia turu hihatuts tere Kristo,
ba limiou tema tatei lu mena mien i luma i tamilimiou,
batema tatei ranga hatami has mia i tanen.
11 Na te ranga hatami tala moua limiou i tanen,
e here talenei alimiou e taguhe men tara toukui a omi te katoe nen.
U kapakapana u raranga
12 Alia e ngilin hatei gilö u raranga u parpara,
kaba alia e raman koloto nagien turu pas.
Alia e ngilin na taregu a matamölö bate hiararanga gono megou lö,
bara te töan sasaala nitöara.
13 A galapien tere toulamölö,
te hopö kapiin e Sunahan,
e hala neruma u rarangan haniga taren i tamölö.
Alia e Jon