Ara e tagala bala nera a markatona i puta
5
U katuun hoboto te hamaner e Iesu nonei a Mesaia te hopö kapiin e Sunahan,
nori a galapien tere Sunahan.
Na katuun te ngileiena e Tamarara e Sunahan,
nonei e ngil haseiena a pien tere Sunahan.
2 Ara e atei silera ara e ngil koru raiera a galapien tere Sunahan,
tara pöata te ngil hase rara e Sunahan bate kukute hanigeiera u raranga i tanen.
3 Te ngil korue rara e Sunahan ba ra te kukute hanigeiera u raranga i tanen.
Ba u raranga i tanen tema tatei hala raneira ta nitiama
4 Taraha,
a galapien hoboto tere Sunahan e antunan tagala salsaluhe baner a markatona i puta.
Na nitagala te tagala salsaluhe ba nena a markatona i puta nonei u nihamana i tarara.
5 A katuun te hamanena e Iesu nonei a Pien Tson tere Sunahan,
nonei lasi a katuun te tagala saluhe banena a markatona i puta.
E Sunahan e hatei nena e Iesu Kristo
6 Nonei a katuun teka e Iesu Kristo,
ti baptaise ii u ramun.
Na u rahatsing i tanen e oloia tara tou mate i tanen.
U ramun na u rahatsing i tanen has e hatei hamana nena nonei e Iesu a Pien Tson tere Sunahan.
Nu Namnamei tere Sunahan has e hatei hamana nanen,
taraha u Namnamei tere Sunahan e manana bate ranga hamanana.
7 Nori a topisa i habulungana hobotein u raranga i tanen,
8 u Namnamei,
na u ramun,
na u rahatsing i tanen.
A topisa ka teka i haniga hoboto.
9 Ara e roron hamaneiera a ka te hatei ranei ra a katuun.
Na ragi hamana hasi a ka te hatei ranei ra e Sunahan,
taraha u raranga i tanen e mana koruna.
Nonei e hatei nena a Pien Tson i tanen.
10 A katuun te hamanana tara Pien Tson tere Sunahan e atei haniga silena te mana uana u raranga teka.
Kaba a katuun te hahamana nena e Sunahan nonei a katuun te poeiena,
“E Sunahan a katuun a gamogamo.”
Taraha,
nonei e hahamana nena a ka te ranga benei e Sunahan a Pien Tson i tanen.
11 Na nonei a ka teka te hatei raneira e Sunahan:
e Sunahan e hala raira a nitöatöa te ka nitöana,
na nitöatöa teka e kana tara Pien Tson i tanen.
12 A katuun te ka gono mena a Pien Tson tere Sunahan nonei e ka has mena a nitöatöa teka.
Na katuun tema ka gono menei a Pien Tson tere Sunahan nonei ema ka has menei a nitöatöa teka.
A nitöatöa te ka nitöana
13 Alia e koloto menagi a manka teka i tamilimiou u katuun te hamana mia tara Pien Tson tere Sunahan,
taraha alia e ngilegu alimiou ego atei haniga sileiam te ka mena milimiou a nitöatöa te ka nitöana.
14 Ara egima matoute ii e Sunahan,
taraha,
tara pöata te singo sile riara ta ka i tanen nonei e hengo ranoura.
15 Ara e atei silera e Sunahan e hengo silena mamanaka te singo sile rara,
na nonei e hala nanou a manka te singo sile rara.
16 Te tare mialö a töa katuun tara pala te hamana ria tere Iesu e kato homina ba limiou te singo silemen tere Sunahan,
be Sunahan te hale noien a nitöatöa.
Kaba te kato homi koru nen bate laba nena a nitöatöa tere Sunahan,
alia ema ranga nagi alimiou ego singo sileiam a katuun teka tere Sunahan.
17 A mamana markato a omi hoboto e omina.
Kaba palaina markato a omi ema tatei luba nanei a katuun a nitöatöa tere Sunahan.
18 Ara e atei silera a katuun te pien uana tere Sunahan ema tatei kato homi hiton nei,
taraha a Pien Tson tere Sunahan e pepeito kap nitöa nanen,
na e Satan ema antunan kato homi naneien.
19 Ara e atei silera ara galapien tere Sunahan na mamana han hoboto i puta e kana tara nipepeito tere Satan.
20 Ara e atei silera a Pien Tson tere Sunahan e la silema i puta tegomi hala meraien ra a niatei tegi tatei atei sil menai ra e Sunahan hamana.
Ara e ka gono mera e Sunahan hamana na e Iesu Kristo a Pien Tson i tanen.
Nonei a Sunahan hamana teka,
na a katuun te pala uana tara Pien Tson i tanen e ka mena a nitöatöa te ka nitöana.
21 A matsi galapien i tar,
alimiou ego ka halehana ba naiam a man got gamogamo.
Alia e Jon