U pas tutuun te kolotein e
JON
U rarangana tara nitöatöa
1
Alam e koloto silemi u pas teka tego habulungana menami limiou u Rarangana tara Nitöatöa.
Nonei e ka mam noahas te habuteia e Sunahan u kolö na u puta.
Ba nonei e butun katununa ba lam e tara peisanem a mata mulam me hengo hasim,
me hasebele hase mia a limamulam i tanen.
2 A nitöatöa teka e butu halesalama ba lam e tare men me habulungana namen,
na nitöatöa teka e ka nitöana.
Nonei a nitöatöa te kagono mei e Tamarara,
memi töan butu halesalana i tarara.
3 Alam e hatei nem a ka tu tari lam na ka tu hengoe nilam bara te hiakaka haniga hobotora,
bate ka gono mera e Tamarara na e Iesu Kristo a Pien Tson i tanen.
4 Alam e koloto menami u raranga teka i tamilimiou bara te tatei sasaala hoboto nitöara.
E Sunahan nonei u ualesala
5 Nonei u raranga teka tu hengo naia lam tere Iesu ba lam e hatei namen i tamilimiou:
e Sunahan nonei u ualesala na e möa koru ta tsi tabubun kuhil tega kaia i tanen.
6 Na te pei mena reira,
ara e ka haniga gono mera e Sunahan bara te tataala tsipon ria turu kuhil,
ara e gamo talara na ra ema katoe rei taka tega mana.
7 Kaba te tataala ria ra turu ualesala noahas i tanen,
bara te ka haniga hobotora,
ba u rahatsing tere Iesu a Pien Tson i tanen te galus ba nena a man markato a man omi hoboto i tarara.
8 Na te pei mena reira ara ema ka merei ta markato ta omi,
ara e gamoera a peisarara,
na u raranga u mana ema ka neia i torirara.
9 Te ranga hatei na riara a man kato homi i tarara,
be Sunahan te töan luba nena a man markato a man omi i tarara bate galus ba has nena a manka man omi hoboto te kana i tarara,
taraha nonei e kato hamana nitöa neiena a ka te ranga nanen bate kato hamatskö nitöa nanen.
10 Te pei mena reira ara ima kato homii,
ara e kato here narei,
“E Sunahan a katuun a gamogamo.”
Ba u raranga i tanen tema ka neia i torirara.