A galapien tere Sunahan
3
Tara,
e Tamarara e Sunahan e ngil koru ranoura,
bate ngö raneira a galapien i tanen.
Na u mana koru,
ara a galapien hamana koru tere Sunahan.
U katunura i puta tema pala uari tere Sunahan ema atei sil has rarira,
taraha nori ema atei sil haserien.
2 A man hahikapien,
ara a galapien hamanasa tala tere Sunahan.
Nonei ema haröto noa raneira tegina markato uu ra romana.
Kaba ara e atei silera a ka teka:
pöata te butu halesala nama romana e Kristo bara te tare rou a peisanen bate here hase roien.
3 U katuun hoboto te hahanei siler e Kristo bate sasaalar,
nori e markato hagogoso has uaier temar gogoso has uana e Kristo.
4 U katuun hoboto te kato homir e tori tsuga ner a Lo tere Sunahan,
te markato has uana a markato a omi.
5 Alimiou e atei silemiou e Kristo e butu silema tegomi luba menai a man markato a man omi.
Na nonei ema ka menei ta markato ta omi.
6 A katuun te ka gono mena e Kristo ema tatei kato nitöa nanei a markato a omi.
Na katuun te kato nitöa nena a markato a omi ema atei sile neien,
na ena mala tara hase neien.
7 A matsi galapien,
te katsin gamo rana limiou ta katuun,
alimiou goma hamane mien.
A katuun te kato haniga nitöana,
nonei a katuun a matskö,
te markato has uana e Kristo.
8 A katuun te kato homi nitöana nonei a pien tere Satan,
taraha e Satan e solon kato homi i mam noahas batemi antunana i romana.
Na a Pien Tson tere Sunahan e butu silema tegomi kato hatia menaien a toukui tere Satan.
9 A katuun te pala uana tere Sunahan ema tatei kato homi nei,
taraha a nitöatöa tere Sunahan e kana i tanen.
Na katuun te tuhanama tere Sunahan ema antunan kato homi nei,
taraha nonei a pien i tanen.
10 A ka teka e haröto nena a katuun te pien uana tere Sunahan na katuun te pala uana tere Satan:
a katuun tema kato haniga nei ema pien uanei tere Sunahan.
Na katuun tema ngile nei a hahatoulana i tanen ema pala has uanei tere Sunahan.
Aragi hiangilngil
11 Nonei u raranga teka tu hengo mam naiam limiou:
aragi ngili a tabina katuun.
12 Ara gima here ii e Kein nonei e pala uu tere Satan,
ba nonei e atung hamateiena e toulanen e Ebol.
Nonei e atung meien a markato i tanen e omi ba markato tere Ebol te matsköna.
13 A man munmun toulana,
ma asingoto nami tegi pakö merai limiou u katunura i puta.
14 Kaba ara e atei sil talera ara i laba nema a tou mate me aroho uarima tara nitöatöa.
Taraha ara e ngil korueiera a man hahatoulana i tarara,
a pal katuun te hamana ria tere Iesu.
A katuun tema ngile nei e toulanen e ka noana tara tou mate.
Nonei e ka halhal ba nena a nitöatöa tere Sunahan bate here nei a katuun a mate.
15 A katuun te paköeiena u toulanen e here nei a katuun a hihipuli.
Na alimiou e atei silemiou a nitöatöa te ka nitöana ema ka neia tara katuun a hihipuli.
16 Ara e mar atei sil mena rei u ngilngil hamana teka:
e Kristo ema peitsnai a nitöatöa i tanen,
ba nonei e mate sil ranoura.
Na ara gima peits has nai a nitöatöa i tarara,
kaba aragi markato has uu iesana bara te mate sil hasera a man hahatoulana i tarara,
a pala te hamana ria tere Iesu.
17 Kaba a katuun te ka mena a mamanaka bate atei sil hasena e toulanen e moana ta kannou ba nonei tema taatagi naneien,
ga ime temar ngil mena neien e Sunahan?
Ge möa tala.
18 A matsi galapien i tar,
ara gima ranga tuun nai te ngil merarira u toularara.
E möa.
Aragi ngil hamana raien bate taguhu raren.
Ara gima matoute ii e Sunahan
19 Na te markato tala uarara teka,
bara te atei silera ara u katunura turu ranga u mana.
Kaba pöata te hakats tuun rara bate poeiera,
“Alia e kato homigu,”
aragi hakats kapiin a ka teka:
e Sunahan e roron taatagi rena u katuun na nonei e atei silena a mamanaka hoboto.
20 Te markato uarara teka ba torirara te tatei tagolala poutsuna i matana e Sunahan.
21-22 A man hahikapien,
tema kout raneira a torirara,
ba ra tema matoutun tuol roi i matana e Sunahan bate luera a ka te singo sile rara.
Taraha,
ara e hengo hanigeiera u raranga i tanen bate katoera a manka te kato hasasaale nen.
23 Na u raranga tere Sunahan teka:
aragi hamanaia tere Iesu Kristo a Pien Tson i tanen ba ra te hiangilngilira,
nonei teka u raranga tere Sunahan.
24 A katuun te kukute hanigeiena u raranga tere Sunahan,
nonei e ka gono menou e Sunahan,
be Sunahan te ka has noa i tanen.
U Namnamei u Göagono te halani e Sunahan,
nonei te haröto renara e Sunahan e ka gono mera noura.