E Pol na u aposol gamogamo
11
Alia e ngilegu alimiou go haka ba buna moulia balia te kato begu a tsitabubun ranga a tsi tutu.
Kaba lia e taregu alimiou e hengoe moulia.
2 Alia e hakats hapara ragou limiou temar hakats has uana e Sunahan.
Taraha,
alimiou e heremi a tahol a kukubei,
na lia u hopö kap merai limiou tego tölo mena milimiou a töa puku lahas a tson,
nonei e Kristo.
Alimiou u peiam nonei lasi a töa Tsunono te hamana uami limiou.
3 Kaba lia e matoutegu,
alimiou ena mots heremi e Eva te hengo sila nai u gamo tere Satan a kökötsi,
batema hakats sil lenemi e Kristo puku lahas a töa.
4 Taraha!
Tena la menama romana ta katuun a taina a Iesu tsi u taina u namnamei u göagono tsi u taina u bulungana u niga te halhal nena a Iesu na u Namnamei u Göagono na u Bulungana u Niga tu la mema lam,
alimiou e toul here noahas me moien temar toul menai e Eva e Satan.
5 Alia e peiegu u aposol gamogamo teka ema pan bala nari lia.
6 Alia ema tatei raranga balagi,
kaba lia e atei silegu a ka te ranga negu lia.
Alia u haröto hakapa rai limiou a mamana niatei na mamana markato a niga.
7 Alia u kato homi,
tu hala puta menai a peisar tego hapan merai lia limiou bate rarare pukpukuegua u Bulungana tere Sunahan i tamilimiou?
E möa.
8 Alia u lui a monin hitaguhu tara palair a hun katuun tere Kristo tegomi taguhu merai lia limiou.
9 Na pöata tu ka gono meraia lia limiou ba moni i tar e makmakumuna,
alia uma singoe ii ta moni i tamilimiou.
Taraha,
a matsi hahatoulana ti lama i Masedonia i mi pioue ii lia a manka tu ngili lia.
Alia uma mala singoe ii ta moni i tamilimiou,
na lia ema antunan hatiama ragi limiou bate singoe gou ta moni tara man pöata te la nama.
10 Alia e hatei hamana ragia limiou tara solo tere Kristo,
u ranga te hatei la nena a markato teka i tar ema hapiou naria tara man han i Gris.
11 Taraha e hana?
Alia e rama ragou limiou?
E möa.
E Sunahan e atei silena alia e ngil ragou limiou.
12 A ka te katoe gulia,
alia e kato noahase gouen.
Bu katuun te ngiler egi soloseri,
na egi tara mareieri tema tatei peiroi,
nori e mar kui has uaier temar kui uamu lam.
13 U katuun teka ema aposol hamanari.
E möa.
U katuun u gamogamo te kato here nari a peisaren u aposol tere Kristo.
14 E manana,
e Satan e kato here has nai a peisanen a angelona turu ualesala.
15 Ba tema tutu nei tegi gamo has uu katunun kui tere Satan bate kato hereri nori u katunun pepeito kap turu lotu te hihatuts nena a markato a niga.
Nori ena lu hase riou a nihahuna te matsköna tara man markato i taren.
U kamits na u tori tiama tere Pol a aposol
16 Alia e ranga leligu,
alimiou goma poeiemi alia e tutugu.
Kaba te pei mia limiou alia e tutugu,
bara,
lu here tala namilia a katuun a tutu balia te solosei hasegu a peisar.
17 Alia ema kukute talegi u raranga tere Sunahan.
E möa.
Alia e ranga heregi a katuun a tutu bate soloseiegu a peisar.
18 U katuun u para e kukuteier a markatona i puta bate solo seseier a peisaren,
alia has e markato uagou iesana.
19 Alimiou e peimiou alimiou e atei korumiou,
kaba limiou e sasaala noahas memiou te hengo merami u katuun u tutu.
20 Alimiou ema ka hamana memi ta niatei.
Taraha,
a pal tson teka e hakui pukpuku rariou limiou bate a angoso rariou limiou na e gul haser a moni na mamanaka i tamilimiou,
na alimiou ema hapiou ramien.
Nori e sigala rariou limiou bate tapaler a pole milimiou.
21 Alia e ranga here noa hasegi a katuun a tutu.
Tema matoutun ranga sesei narien ta ka,
alia e ranga heregi a katuun a tutu,
ema matoutun ranga sesei has goi.
22 Nori a tei Hibru?
Alia has a toun Hibru.
Nori a tei Israel?
Ga lia has a toun Israel.
Nori e hatubuna ria tere Abraham?
Ga lia has.
23 Nori u katunun kui tere Kristo?
Bara,
alia e ranga heregi a katuun a tutu.
Ga lia a katunun kui te niga bala ragen.
Tara,
alia u kui hatagala bala raien na lia u ka haparaia tara karabus.
Alia i singateiou a para pöata,
na u roron mate karasa has.
24 U Jiu i lahuse ii lia a wipb u topisa u maloto na tosiec a pöata na ka teka e butu a tolima a pöata nitöa.
25 Topisa a pöata u katuun i singate ii lia a pata.
Na töa pöata alia i titi hateiou.
A topisa a pöata alia u ka ia tara tolaala te omi ia i tasi.
Na tara töa pöata alia uolo ia i tasi tara töa lan na töa bong.
26 Tara man tou lala i tar,
a ka a para e torohanan kato homi naiou lia:
a man ramun te saputu piou,
u kopkop,
na u Jiu,
na u katuun tema Jiu ri.
A man nomi e butu has ia i tar tu kaia lia tara man taun na tara makum a palaka na i tasi has.
Na u hatoulana na u hahahinana gamogamo i tar i torohanan kato homi haseiou lia.
27 Alia u kamits koru mei a toukui pan i tar.
A para a bong alia u namala soho ii.
Alia u bes koru na u maka koru has.
Tara parpara a pöata alia uma kamei ta kannou na tu hasobö na ta makumun soho.
28 Tagono talamena a mamanaka,
alia e ka has megu u hakats pan koru te pepeito kap mera gilia a man hun katuun tere Kristo.
29 Pöata tema hamana hatagala neia a töa katuun,
alia e hasagoho hase gen.
Pöata te kato homie ria a töa katuun bate kato homina,
ba torir te taktakots koru mena a raharaha.
Ga e noa talana.
Alia goma ranga sesei nai a manka teka.
30 Tego ngilin ranga seseia lia,
alia u ranga sesei ni a manka te haröto nena alia ema tagalagi.
31 E Sunahan e Tamana e Iesu a Tsunono e atei silena alia ema gamo gi.
Aragi solosei nitöa naien tara mamana pöata!
32 Tara taun i Damaskus,
u katunun pepeito tere Aretas a king i taratara kapiin a man tamana tara ololo tara taun tegi pile kap menaien lia.
33 Kaba man hahikapien i tar i hakoul mei lia a baskete te tara here ii a tohene a kapan tara binroa i hapalana ololo,
ba lia e busugu.