A man hiharöto tere Pol na manka te haröteien e Sunahan
12
Alia e ranga hangisei leligu,
noahasina tema habute noien taka.
Alia e ngilin hatei ragi limiou a man hiharöto na manka te haröte ii lia a Tsunono.
2 Turu töa u maloto na u tohats u hiningal te la kapa,
alia i lu menai i Kolö iasa nitöa.
Alia ema atei silegi a ka teka e butu hamana tsi alia u tara tuni u hiharöto.
E Sunahan te ateina.
3 Kaba lia e atei silegu alia u la sei uu i Kolö.
Toum romana alia u la sei gono mei u tuenrei tsi u namnamei tuun.
E Sunahan te ateina
4 Alia u hengoema a manka man kapan koru tema antunan hatei nari turu mar ranga turu katuun,
a manka man göagono tema tatei haröto naria i puta.
5 Alia e tatei ranga sesei negu a ka teka,
kaba lia e raman ranga sesei negu a peisar.
Alia e ranga sesei tuun las nagou tema tagala uagi lia.
6 Kaba tego ngilin solosei menai lia a peisar,
alia ema ranga here goi a katuun a tutu,
alia e ranga nagou u mana.
Kaba lia ema soloseie goi a peisar,
taraha alia ema ngile gi ta katuun ega kukuti u raranga i tar tara manka tu tarema lia na tara manka tu hengoema lia bate soloseie noulia.
7 Alia i hatare ii a man para a man hiharöto pan koru tere Sunahan.
Nonei ema ngile ii tego hakats sesei menai lia a peisar,
ba nonei e haniga nena tego sagoho menai lia a kamits i peisar.
Nonei a kamits teka e here nei a katunun kui tere Satan te hakamitse noulia bate hatu kap nena tego hakats sesei koru menai lia a peisar.
8 A topisa a pöata alia u singo uu tara Tsunono tego luba menaien a ka teka.
9 Kaba nonei e pei i tar,
“A nihitaguhu i tar e antunana i tamölö,
taraha a nitagala i tar e butuna tara nipata i tamölö.”
Balia te sasaalagu bate ranga sesei negu a manka te haröto nena alia ema tagalagi,
ba nitagala tere Kristo te tatei kagono menoulia.
10 Aa,
alia e sasaala megu tema tagala uagi lia na te ranga hohomi menarilia u katuun i tar,
na te hakamits menari lia,
na nomi na u tori tiama te butu has ria i tar.
Te butu silana a manka teka tema tagala uagilia tara solona e Kristo,
alia e sasaalagu.
Taraha,
a pöata te haröto nena a manka teka alia ema tagalagi,
nori e haröto has naier a nitagala tere Kristo.
E Pol e hakats koru rena a tei Korin
11 Alia e ranga here gulei a katuun a tutu.
Kaba lia e kato silegi a ka teka tego söata menai lia tu ranga tu niga i tamilimiou.
Alia a katuun papala,
kaba lia ema tetenei nagi u aposol u nigan ranga i tamilimiou.
12 A pöata tu kaia lia i gusumilimiou,
e Sunahan e harötein alia a aposol i tanen,
te kato menaien u mamana u mar mirakol.
13 Alia u markato has uu i tamilimiou tu roron markato has uamalia tara palair u hun katuun tere Kristo.
Alimiou e hakats silemiou tuma singo menai lia ta monin hitaguhu?
Haromana koru,
taatagi namoulia tara markato teka.
14 Alia e kato taatago poniegu tegona tara merai limiou,
a hatopisana a pöata.
Na lia ema hasösö ragoui limiou ta ka go hala namuma limiou.
Alia ema ngilegi a manka i tamilimiou,
alia e ngil tuun ragou limiou.
A galapien ema tatei hanoueri e tsinaren na e tamaren.
E möa.
E tsinaren na e tamaren te hanou raier a galapien.
15 Alia e sasaala megou te hala mena gilia u moni na peisar hoboto i tamilimiou bate taguhu ranou limiou.
Alia e ngil koru ragou limiou,
kaba,
nonei toum te kato ranou limiou balimiou tema ngil balemi lia?
16 A palai i tamilimiou e hatanganar bate poeier alia uma gulei ta moni i tamilimiou.
Kaba palai i tamilimiou e poeier alia u angöngoso raiou limiou bate gamo ragou limiou.
17 Kaba ime tu mar a angoso merai lia limiou?
Toum romana turu katuun tu hala mera mei lia i tamilimiou?
E möa koru!
18 Pöata tu hala ne la lia e Taitus na palair u hahatoulana,
nori i a angoso has raiou limiou?
E möa.
Taraha alia na e Taitus,
alam e tataala mem u töa puku u Namnamei na markato i tamulam e hihinatuena.
19 Alimiou romana e pei toum lase miou alam e ranga kökopo nem a man ranga teka bate taguhu pouts ranou lam?
E möa.
Alam e ranga nem u raranga te hala nema e Kristo i matana e Sunahan,
na mamanaka te katoe mulam a matsi hahatoulana,
e taguhu ranou limiou.
20 Taraha,
alia e matoutegu tena la pouts guma lia romana,
alia ema ngile goi a manka tena tare goulia na limiou ema ngil hase moi tena mar ranga ua goulia.
Alia e matoutegu alia e na sabie gou te hia o omi uamiou limiou bate hia raharaha miou bate hakats peisa namiou a peisamiou.
Alimiou e namos ranga hohomi silemou a palai bate tuts sil ramen,
bate ranga hangisei namiou a peisa milimiou bate kato hatutu has miou.
21 Aa,
alia e matoutegu tena la pouts romana guma lia i tamilimiou,
e Sunahan toum e hamatsingolo menoi lia a markato i tamilimiou.
Balia te tabe me gou,
a parpara i tamilimiou ema hapolasa noahaseri a man markato a man omi i taren.
U katuun ti tsikolo na te lulu tsonir na ti kato a man palaina a man markato a man omi i manasa ema hapolasa noahaseri a man markato a man omi teka.