E Pol e ranga hatagala silena a toukui i tanen
10
Alia e Pol,
e ranga hataatagi hatagalagu na e ranga hatami gia i tamilimiou,
te markato has uana e Kristo.
A palai i tamilimiou e poeier alia e hala putegu a peisar te ka gono meragi lia limiou,
kaba te ka halehana gialia,
alia e ranga hatagala koru gia i tamilimiou.
2 Alia e hatei mam ragou limiou,
alia ema ngilin ranga hatagala gia i tamilimiou tena butu goua lia i tamilimiou.
Kaba lia e ranga hatagala goua turu katuun te poeier,
alam e kato here rami u katuun te kukutier u ngilngilina i puta.
3 E manana,
alam e ka mia tara han i puta teka,
kaba lam e hiatatung mia turu namnamei.
4 Alam ema hiatatung memi a mankaan hiatatunguna i puta.
E möa.
Alam e hiatatung mem a man kaan hiatatung a man tagala tere Sunahan te antunan kato homiena a manka te tagala koruna.
5 Alam e kato ba nem a mamanaka te hatu kap nena na te hipus nena tegi atei sil menai u katuun e Sunahan.
Alam e palis hasem u hakhakats turu katuun te omi korur bate kukuteier u ranga tere Kristo.
6 Na pöata te hengo haniga nitöa ramoua limiou alam,
ba lam te tatei hahuna noahas ramou u katuun te hipusur.
7 Tara a ka tego tarilö.
Te pei mialö alö a katuun tere Kristo,
tara marei talei,
ga lam has u katuun tere Kristo.
8 E manana,
toum alia e ranga sesei hapara negu a nitsunono te hala railam e Sunahan,
kaba a nitsunono te hala railam e Sunahan ema pita pute neilö kaba nonei e söataseie noulö,
na lia ema antunan matsingolo negoi tego ranga sesei uu lia i tamilimiou.
9 Alia ema torohanan hamatout meragi limiou a man pas te kolotegu lia.
E möa.
10 A palai i tamilimiou e pei toume riou,
A man pas tere Pol e ka mena u raranga u tagala koru,
kaba te ka gono mera nen ra,
nonei a katuun a pata siba na u ranga i tanen ema ka menei ta nitiama.
11 Kaba u katuun teka egi atei sil,
u raranga te koloto nagia lia turu pas tara pöata te ka gia lia i lehana ena kato hase goua lia tara pöata tena ka gono meragoua lia u katuun teka.
12 Möa tu hakats bala,
alam ema ongolon solosei peise mi a peisamulam bate poeiem alam e hihinatue gono has merem a palair u katuun i tamilimiou te ranga sesei pouts naier a peisaren.
Nori e hiahanhantuna pouts naier a peisaren bate ona meri a peisaren a man lo peisa i taren.
A markato teka e tutu koruna.
13 Alam ema antunan ranga sesei pinopino nami a man toukui na ielesala tema atei silemilam.
Kaba lam e ranga sesei las namou a toukui te hala railam e Sunahan,
ba tena antuna puku has noua i tamilimiou.
14 Alimiou e ka mia iahana toukui na nipepeito te hala railam e Sunahan na lam uma arohe ii a nipepeito teka tara pöata tu rangaia lam i tamilimiou.
E möa.
Alam koru tu la tutuun sokö mema u Bulungana u Niga tere Kristo i tamilimiou.
15 Na lam ema ranga sesei heremi alam tu kati a toukui te kato a taina katuun.
E möa.
U pannen u ngil i tamulam e markato uana teka,
te pan susul hatagala noua u nihamana i tamilimiou ba makumun kui i tamulam te tataabala susul has nou.
16 Ba lam te tatei na habulungana nem u Bulungana u Niga tara man han i pal mam i tamilimiou,
a man han tema hihatuts noa neia ta katuun.
Ba u katuun tema tatei pei roi alam e solosei memi a peisamulam a han ti kui la a palair u katuun.