7
A matsomi i tar,
te hala tala nena e Sunahan u mamana u raranga u mana teka,
aragi kato hagogoso ba tala nai a peisarara a mamanaka te kato hakorkorianena u tuenrei na u namnamei i tarara.
Aragi matouti e Sunahan bate torohanan kato hagogoso sokön töa nera a peisarara.
A nisasaala tere Pol
2 Alimiou go ngil koru pouts ramou lam.
Alam uma kato homie ii ta töa ta katuun i tamilimiou.
Alam uma habirits ba nai ta töa ta katuun,
tere Sunahan.
Alam uma angöngose ii ta töa.
3 Alia ema ranga negi a ka teka tego saka merai limiou u ranga.
E möa.
Alia u ranga hakapein alam e ngil koru ramou limiou,
noahasina tena mate hoboto rouara tsi tena töatöa hoboto has rouara.
4 Alia e saala koru ragou limiou bate sasaala has meragou limiou.
A mamana nomi e butuna i tamulam,
kaba lia e ongolo koru noa hasigu.
A nisasaala i tar e möa ta nönöa nen.
5 I murina tina tukuia lam i Masedonia,
alam uma husa ii.
A nomi e butuia i tamulam tara mamana pala.
Alam na palair u katuun u hiaraharaha,
na torimulam e matout koru has.
6 Kaba e Sunahan e roron kato hasasaala rena u katuun te kamer a nitaatagi,
na nonei e kato hasasaala has raiou lam tara pöata te tukuia e Taitus.
7 Na e Taitus e kato hasasaala has raiou lam te habulungana menaien tu markato hasasaala has mena mien limiou.
Nonei e pei alimiou i ngilin tara korue moulia bate taatagi korumiou bate tagala sil hase moulia.
Ba pöata tu hengo naia lia a ka teka ba lia e sasaala korugu.
8 Alia e atei silegu u pas i tar e kato hataatagi raiou limiou.
Alia ema hakats nagi a ka teka,
noahasina te kato hataatagi meraien limiou.
Alia u taatagi mam mei tu kato hataatagi merai limiou tara tsitabubun pöata.
9 I romana alia ema sasaala megi ti kato hataatagi merai limiou,
kaba tu sagoho kamits uaiam limiou bate hapalis ba namiou a markato a omi.
E Sunahan noahas te kato hataatagi raiou limiou ba limiou ema sagohe mi a man raranga tu hala ni lam.
10 A nitaatagi na nimatsingolo te roron halanena e Sunahan e kato rena u katuun bate habirits ba ner a markato a omi be Sunahan te lu pouts ranen.
A nitaatagi teka ema kato homie nei a katuun.
Kaba a nitaatagi na i puta turu tsiktsiki teka e habutena romana a tou mate.
11 Tara,
a nitaatagi te halani e Sunahan e kato haniga raiou limiou:
alimiou e hakats hatagala tala namiou a markato i tamilimiou.
Alimiou e tagala koru silemiou tego haröto mena milimiou a markato a niga.
Alimiou e raharaha memiou a markato a omi bate matoutmiou.
Alimiou e sagoho koruemiou a manka teka bate tagala silemiou a markato a niga.
Na limiou e ngilin hahuna koruemiou a katuun te kato homina.
12 Alia u ma koloto sile ii u pas teka a katuun te kato homina,
tsi a katuun ti kato homii.
E möa.
Alia u koloto silema tego haröto merai limiou i matana e Sunahan,
te ngil koru mera milimiou alam.
13 Nonei a ka teka te kato hasasaala raiou lam.
Aa,
na e Taitus e kato hasasaala has lel merai lam a nisasaala i tanen,
taraha alimiou hoboto u kato hasasaala mam me men.
14 Alia u saala raiou limiou tere Taitus ba limiou e kato hamanemiou u raranga i tar.
A mamanaka ti ranga hamana naia lam i tamilimiou e butu hamana.
Na ti saala menai lam alimiou tere Taitus e butu hamana has.
15 Na e Taitus e ngil koru lel meranoui limiou te hakats pouts mena neien tu hengo hanigan töa mena milimiou u raranga i tanen na tu toul haniga me mien limiou a nisasaala,
noahasina tu matout uaiam limiou.
16 Alia e sasaala korugu,
taraha,
alia e hamanegu alimiou e kukute mou a man markato a man matskö na man niga.