6
Te kui gono tala memia lam e Sunahan,
alam e ranga hatagala koru mera moulimiou,
goma hapolase mi e Sunahan te taatagi koru raiou limiou.
2 Taraha nonei e pei,
“Tara pöata tu taatagi raia lia u katuun,
alia u hahengo uu i tamilimiou,
na turu lanin hilu pouts,
alia u taguhu raiou limiou.”
Tara,
i romana,
nonei a pöata a niga te kato haniga renara e Sunahan.
Tara,
nonei a pöata te tatei lu pouts ranouara e Sunahan.
3 Alam e tataala hatskapa korum batema ngilin kato homi nami ta katuun ba nori te tatei ranga homi nariou a toukui te kate mulam.
4 Kaba,
te kui be mialam e Sunahan tara mamanaka te katoe mulam,
a nomi na toukui pan a parpara e butuna i tamulam na lam e roron makmakum ba has nem a manka te ngile mulam,
kaba lam e hamana haniga noa hasim.
5 Nori i singata raiou lam,
na i karabus raiou lam,
na i hiagetageta me torohanan kato homi rariou lam.
Alam u kui hatagala koru me kalata halanim me mate has mem a bes.
6 Alam e kato hanigam ne atei silem a ka a mana ne tuatamim na e niga mia turu katuun.
Na man markato teka e haröto nena alam u katunun kui tere Sunahan.
U Namnamei u Göagono te hakui ranou lam ba lam te ngil hamana has rem u katuun.
7 Alam e ranga hamanam na lam e ka mem a nitagala tere Sunahan.
Alam e kui mem a markato a niga na matskö tara pal matou na u raranga tere Sunahan tara pal keruka.
8 A palair u katuun e hapan rariou lam bate solosei rariou lam.
Ba palai te sigala rariou lam bate ranga hohomi rariou lam.
U katuun e poeier alam u gamogamo,
kaba u raranga i tamulam e mana nitöana.
9 U katuun e atei sil rariou lam,
kaba nori e kato here rari lam u katuun papala.
Alam e heremi u katuun te katsin mater kaba lam e töatöa noam.
Alam e sagohem a kamits pan kaba lam ema matemi.
10 U katuun e kato here rari lam u katuun te taatagir,
kaba lam e sasaala noa hasim.
Alam u katuun tu möa ta moni,
kaba lam e hala noa has nem a manka man niga tere Sunahan turu katuun u para.
Alam u möa koru ta ka ni puta,
kaba lam e ka noa has mem a mamanaka a niga tere Sunahan.
11 A matsomir i Korin,
alam e ranga hamatskö koru uaiem i tamilimiou,
alam e hatei baba nem a manka i torimulam.
12 Alam ema pile kap nami te ngil koru mera milam alimiou.
E möa.
Alimiou te pile kap namiou tego ngil koru mera milimiou alam.
13 Alia e ranga here mera gilimiou a galapien i tar.
Alimiou go ngil ramou lam temar ngil has mera milam alimiou.
Aragi ka halhal ban a ka a omi
14 Na limiou goma ka gono merami u katuun te hahamanar bate taguhu ramen tara markato i taren.
E möa.
Ime temar kui haniga uariou a markato a niga na markato a omi?
E möa.
U ualesala na u kuhil ema tatei ka hobotori.
15 E Kristo na e Satan e tatei hiahanhanigar?
E möa koru.
A katuun te hamanana,
na katuun te hahamanana ema tatei ka has meri u töa u hakats.
16 U saha u hanhaniga te kamer a luma tere Sunahan na u kesa?
Taraha,
ara e here rei a Luma tere Sunahan te töatöana.
Te mar ranga peisa noa has uu e Sunahan,
“Alia ena ka goua i toriren
bate hula la goua i gusuren.
Alia e Sunahan i taren
na nori u katuun i tar.”
17 E kato uana teka ba Tsunono te pei hasena,
“Alimiou go laba ramen
bate ka halhal ba ramen.
Alimiou go rama koru naiam a ka a korkoriana,
balia te töan lu ragou limiou.”
18 “Alimiou ena hatamana moua romana i tar,
na limiou ena galapien tson,
na ena galapien touhaliou uamou i tar.
Temar ranga uana a Tsunono te tagala soköna.”