A manka te hala nena u Namnamei u Göagono
12
A matsi hahatoulana,
alia e ngilegu alimiou go atei sileiam a man nitagala te hala nena u Namnamei u Göagono turu katuun.
2 Alimiou e atei silemiou a pöata tu tematan noa mia limiou,
alimiou u kukuteiam a markato ti hatsunono menai u kesa tema töatöa nei.
3 Na lia e hatei ragi limiou,
a katuun te ranga sila na turu Namnamei u Göagono tere Sunahan ema antunan ranga nanei,
“Iesu egi korupaköni.”
Na katuun tema kamenei u Namnamei u Göagono tere Sunahan ema antunan pei hase nei,
“Iesu a Tsunono.”
4 E kamena mamana mar nitagala,
kaba u töa puku u Namnamei te hala ranen.
5-6 Na e ka has mena a mamana mar toukui kaba nonei noahas e Sunahan te kato hatakeiena a man toukui teka turu katuun hoboto i tanena
7 E Sunahan e hala ranei ra u Namnamei u Göagono i tanen bara te taguhu raiera u katuun hoboto.
8 A töa e haleri a nitagala tego ranga meien u hakats u niga,
na tabi e haleri a nitagala tego habulungana menaien a niatei a niga.
9 Nonei noahas u Namnamei teka te halenei a tana katuun a nitagalana turu nihamana,
na tabi e hala haseri a nitagalana tego kato haniga pouts menaien a katuun te ka mena a siki.
10 Tara tai,
e haleri a nitagala tego kato menaien a man mirakol,
na tai e haleri a nitagala tego ranga menaien u rangan propet,
na tai e hala haseri a nitagala tego ona menaien u spirit u niga na u spirit u omi.
U Namnamei tere Sunahan e hala hasenei a tana katuun a nitagala tego ranga menaien u tana u mar ranga ba tai te haleri a nitagala tego hatarare menaien ime temar mouna uana u raranga teka.
11 A mamanaka teka,
u töa puku u Namnamei te katoenen.
Nonei e halana tara man tötöa man katuun hoboto turu ngil peisa i tanen.
A katuun a para turu töa u tuenrei
12 Na u tuenrei e ka has mena a mamana makum,
na mamana makum turu tuenrei e noahasina te para uaren,
nori hoboto u töa puku u tuenrei.
Te kato has uana e Kristo.
13 Na u töa u Namnamei ti habaptais iara hakapan töa me katoeiera u töa u tuenrei.
U Jiu,
na u Grik,
na u katunun kukui puku,
na u katuun tema kukui puku has ri.
Ara hoboto i haua raia turu töa u Namnamei tere Sunahan.
14 U tuenrei ema töa puku nei a makum.
E möa.
E ka mena a makum a parpara.
15 Tego poeia u mou,
“Tema ualima gia lia,
alia ema pala has uagi turu tuenrei,”
u mou e pala noahas uana turu tuenrei.
16 Na tego poeia u talinga,
“Alia ema matagi na lia tema pala has uagi turu tuenrei,”
u talinga e ka noahas uana turu tuenrei.
17 Sanena u tuenrei hoboto ega mata peisa,
esi tena hengo nou?
Na sanena u tuenrei hoboto tega talinga peisa,
esi tena soka nou?
18 Kaba u tuenrei ena markato uanei teka,
e Sunahan e hakeia a mamana makum turu tuenrei turu ngil peisa i tanen.
19 Sanena tego ka meien a töa puku a makum,
ga ime tala te kana u tuenrei?
20 Kaba e möa.
U tuenrei e ka mena a makum a parpara,
kaba u töa puku noalahas u tuenrei.
21 U mata ema antunan pei nei turu ualima,
“Alia ema ngile gi lö.”
Na u baku ema antunan pei nei turu mou,
“Alia ema ngile gi lö.”
22 E möa.
A man makum turu tuenrei tema tagala bala nei e ka noahas mer a toukui pan i taren.
23 Na man makum turu tuenrei te pei rara ema niga koru nei,
ara e hakopo rarien u hasobö.
Na man makum turu tuenrei te hamouse rara,
ara e tara kap haniga koru raren.
24 Kaba ara ema mar hakats uarei teka tara man makum turu tuenrei te taratara hanigana.
E Sunahan e markato menai u tuenrei tarara teka,
ba ra te tarakap haniga nera a man makum te here nei ema niga koru nei.
25 Ba man makum turu tuenrei tema tatei hia tsugtsuga ri,
kaba nori gi hia taratara kap haniga nitöani a peisa ren.
26 Te kamits na a töa makum turu tuenrei,
a man makum turu tuenrei hoboto e kamits gono has meren.
Na te hapane ria a töa makum,
a makum hoboto turu tuenrei e sasaala gono has meren.
27 Alimiou tala u tuenrei tere Kristo,
na man tötöa i tamilimou a man makum turu tuenrei i tanen.
28 Na e Sunahan e halani a mamana mar toukui tara man tötöa tara hun katuun i tanen.
Tara makum tutuun nonei e hatuolir u aposol,
na tara hahuoluna a makum nonei e hatuolir u propet,
na tara a hatopisana makum nonei e hatuolir u tson hihatuts,
na pala te antunan katoner u mirakol,
na u katuun te antunan kato haniga pouts raier u katuun,
na u katuun te taguhu raier a palai,
na niatei na tara toukui na tara tson mammam,
na tai te antunan ranga nena u mamana u mar ranga.
29 Ga nori hoboto u aposol?
Tsi nori hoboto u propet?
Tsi nori hoboto u tson hihatuts,
tsi u katuun te katoeier a man mirakol?
30 Ga nori hoboto e antunan kato haniga pouts raier u katuun?
Tsi e antunan ranga ria turu mamana u mar ranga?
Tsi e atein hatarare hoboto ner temar mouna uana u ranga?
E möa,
nori e ka mer a man tötöa a man toukui taren.
31 Kaba limiou go tagalaiam bate hasoso sile miou a man nitagala te niga balana.
Na lia e haröto tala ragoui limiou a maroro te niga bala koruna.