U hahuoluna u pas te koloto menai e Pol turu kristenira i
KORIN
1
Alia e Pol i ngö silei tego aposol uu lia tere Iesu Kristo.
Taraha,
nonei a toukui te ngil mei lia e Sunahan,
alia go katoeien.
Alam mere Timoti e toularara,
e koloto menami u pas teka,
turu katuun tere Sunahan i Korin.
Na e la has uana turu katuun hoboto tere Sunahan te ka ria tara provins i Akaia.
2 A nikalala na masalohana tere Sunahan e Tamarara,
na Tsunono e Iesu Kristo e tatei kagono meranou limiou.
U hanhaniga na turu hitaguhu tere Sunahan
3 Aragi solosei e Sunahan e Tamana a Tsunono i tarara e Iesu Kristo.
Nonei te hatamana nena a nitaatagi na nonei te Tsunono nena a mamana a markato te hasokolei menari a katuun.
4 Nonei te hasokolei ranou ra tara mamana nomi te butuna i tarara bara tena tatei hasokolei has raiera u katuun te kamer a nomi.
Alam e tatei mar hasokolei has mera mien temar hasokolei has mera neira e Sunahan.
5 Taraha,
te kamits hapara sil mena reira e Kristo,
e Sunahan e hala hapara has nenama romana a niniganiga i tanen bate hala sila nenamen tere Iesu Kristo.
6 Tara pöata has te söate mialam a nikamits,
a nikamits teka e kato haniga ranou limiou bate las mera nei limiou tere Sunahan.
Na te hala rari lam a niniganiga alimiou has e hala raroui a niniganiga te söata hahalongolo has mena milimiou a kamits te sagohe milimiou.
7 Alam e hamanem,
te sagoho has memilimiou a mar kamits te sagohe mulam,
alimiou ena lu hase mou a niniganiga tena hala ranouilam e Sunahan.
8 A matsi hatoulana,
alam e ngilem alimiou go atei sileiam a nomi te butuia i tamulam tara provins i Eisia.
Alam u söata a kamits a kapan koru,
te tagala balein a nitagala i tamulam,
ba lam e katsin mate hakapam.
9 U mana koru,
alam u pei lasi alam go mate.
Kaba a ka teka i kato sile ii alam goma tatei hamanaia i oulumulam,
kaba lam go hamanaia tere Sunahan,
te hatakeiena a katuun te matena.
10 Nonei e luba raialam tara nimate a kapan koru,
na lam e hamanem nonei ena luba lel has ranoua lam tara nimate.
11 E Sunahan e taguhu ranoulam te singo sil mera milimiou alam.
Ba u katuun te haniga uariou i tanen taraha,
nonei e hengoena a man singosingo i tamilimiou tara nitataala a niga i tamulam.
12 U mana nitöa,
alam e tatei sasaalam bate ranga mem u hakats u gogoso nitöa ti marka uu lam tara niniganiga te hala railam e Sunahan,
ba lam te kato hamatsköm bate kato haniga mia tara han i puta teka na i mata milimiou has.
Alam uma kato mei a manka teka a niatei i tamulam,
kaba tara niatei tere Sunahan.
13 Taraha,
alam e koloto nem a ka te antunan tare milimiou bate atei sile men.
Toum romana i murimuri alimiou na atei sile mou temar ranga sila ua mulam.
14 Tema lu hanige moien limiou tara pöata teka,
ba tara pöata tena kopis pouts nama romana e Iesu a Tsunono,
alimiou na sasaala mera moulam temar sasaala has mera moi lam alimiou.
15 Alia u hamani a ka teka balia te la pouts ua guma i tamilimiou a hahuolina pöata,
batemi kato hasasaala ragou limiou.
16 Alia u hakatsin tegona tara mam merai limiou bate töan la uagu tara provins i Masedonia,
balia te kopis pouts guma batemi tara lel ragou limiou,
ba limiou te tatei taguhe moulia tego la lel uu lia tara provins i Judia.
17 Alimiou ena mots harangata sei namiou te hula palis menagi lia a nilala i tar.
Alimiou e pei lasemiou alia e kato pinopinoegu a man nilala i tar.
E möa.
Pöata te hakats mam nagia lia a ka tego kati lia,
alia ema hakats heregi a katununa turu tsiktsiki teka.
Alia ema hatangana gi kaba u hakats tar e peiena,
E möa.
18 Alia e ranga mera gou limiou i matana e Sunahan,
a pöata te hatangana gia lia,
a torir ma tatei poenei,
E möa
19 Alam mere Silbanus na e Timoti u hihatutsia i tamilimiou me hatei rami limiou e Iesu Kristo a Pien Tson tere Sunahan.
Nonei has ema tatei hatangana nei bu hakats i tanen te poeiena E möa.
U raranga tere Iesu e roron mana nitöana.
20 U mamana u ranga hamana hoboto tere Sunahan e butun mana sila ma tere Iesu,
te pei sila na rira “U mana” tara pöata te singo ria ra.
Bara te ranga sila narien tara solona e Iesu bate soloseiera e Sunahan.
21 Kaba e Sunahan noa lahas te hatagala ra noulam na limiou tegi tuol hatagala beira e Kristo.
Nonei te hala railam a toukui teka.
22 Nonei e böto kap sil raira tegi katuun uu ra i tanen,
me hala has raneira u Namnamei i tanen,
a ka tutuun te hatei raneira a mamanaka te ranga hamana naien ena la nama romana.
23 Alia e singo hatagala gia tere Sunahan te tatei ranga be noulia tara nimana turu ranga te ranga negu lia.
Alia u ma la mei i Korin,
taraha alia u raman tego ranga hatagala uu lia i tamilimiou.
24 Kaba ema poeie nei alam go hatei rai limiou ime tego mar hatakui menai limiou u nihamana i tamilimiou.
Alam e ngilin kui gono mera mou limiou ba limiou te saputu memiou a nisasaala,
taraha,
alimiou u ka hakapa meiam u nihamana te tuol hakarapoto mia limiou.