2
Na lia e kato hakape gula u hakats i tar,
alia ema antunan la lel goi i tamilimiou batena kato hataatagi ragou limiou.
2 Taraha,
te kato hataatagi ragoua lia limiou,
be si lel tala tena kato hasasaale noulia?
E möa tala.
Taraha,
u katuun te kato hataatagi regulia,
ime tegi markato hasasaala merien lia?
3 Ba lia temar koloto tala uagu teka,
taraha alia u raman tego kato hataatagi mena milimiou alia,
alimiou u katuun tego kato hasasaale moulia.
Alia e kamegu a nihamana i tamilimiou hoboton töa,
a nisasaala i tar,
a nisasaala has i tamilimiou.
4 Alia u kamei a nitaatagi pan na u tori u tiama koru bate koloto ngangala uagu i tamilimiou,
tegoma kato hataatagi merai limiou,
kaba tego hahatei merailia limiou turu pannen u ngil te ka megu lia i tamilimiou.
E Pol e luban a markato a omi tara töa katuun
5 Kaba te katoena a katuun a ka te kato hakamitsena a katuun,
nonei ema kato hataatagi pepeise lalei lia,
e möa,
kaba limiou hoboton töa has.
Alia ema ranga sulasula gi.
6 A nihahuna tu hala hakape milimiou a katuun teka e antunana i tanen.
7 Alimiou go solopaleiam a markato a omi i tanen bate angose men.
A nitaatagi pan koru e namots kato homi nitöa nanen.
8 Na lia e ranga hatagala koru meragou limiou go haröto poutse mien temar ngil mena mien limiou.
9 Tara mar niatei teka ba lia te koloto uagu i tamilimiou,
bate taregu tego hehengo uaiam limiou,
tsi e möa.
10 Te solopale mia limiou a markato a omi tara töa katuun,
alia has e solopale gen,
u mana koru a ka te solopale gula lia tegi solopali,
alia e kato beragien limiou i matana e Kristo.
11 Be Satan tema tatei gamo ranei ra.
Ara e atei silera temar gamo mera neien u katuun.
E Pol e kaia i Troas
12 Pöata tu tukuia lia tara taun i Troas tego hahatei menai u Bulungana u Niga tere Kristo,
a Tsunono e kalata bei lia a tamana na tara mamana toukui i tanen.
13 Kaba lia uma kamei ta niniganiga,
taraha alia uma antunan sabei e toularara e Taitus.
Ba lia e laba regu u katuun i Troas me lauagu i Masedonia.
E Kristo e hantuna sil ranei ra tegi tagala saluhe uu ra
14 Aragi haniga uu tere Sunahan.
Nonei te mammam here raneira u soldia ti tagala saluheia tara hiatatung,
taraha ara e pala uaier tere Kristo.
E Sunahan e taguhu ranoura,
bara te polaser u Bulungana u Niga tere Kristo turu katuun hoboto,
bate here nei u soka u masi nitöa te hatei nena te atei sil menarienra tara mamana makum.
15 Taraha,
ara u soka u nigan töa tere Kristo te hala menaien tere Sunahan te kana i gusura u katuun tena lu pouts rariou na turu katuun has tena tia riou.
16 Turu katuun tena tia riou,
alam e soka heremi alam u mate.
Kaba turu katuun te karia tara maroro te lauana i Kolö,
alam e soka haniga heremi u soka te hala nena a nitöatöa.
Esi koru te antunan katoena a toukui teka?
17 Taraha,
alam ema here rami a palair u katuun te kato here nari u raranga tere Sunahan a toukuin moni i taren bate hahol sile rien tegi lu menaien ta moni.
E möa.
Tara solona e Kristo alam e ranga hamana mia i matana e Sunahan,
taraha,
nonei te hala raiou lam ba lam te habulungana hamatskö nem u raranga te hala namen.