A markato te hiangilngil uar
13
Tego antunan ranga menai lia u ranga turu katuun na turu angelo has,
ba tema ngile gi a tana katuun,
u raranga i tar e here nei a ti te ling pinopinona tsi a belö pan.
2 Na te ka megia lia a nitagala turu propet,
na nitagala tego atei sil menai lia a mamanaka te mousuna na mamana niatei,
na te ka megia lia u nihamana te tatei hasula megi lia a man pokus bate moana tu ngil tara tana katuun,
alia a katuun papala tuun.
3 Alia e tatei hala ba negu a mamanaka hoboto i tar,
na lia e tatei hala has negu a peisar batena haatser.
Kaba tema ngil mena gi lia a taina katuun,
a man markato teka ema taguhe noi lia.
4 A markato te hiangilngil uaier e markato uana teka:
u ngil ema tatei sökananei na e tuatamina,
na u ngil ema tatei tara ngil nei na ema tatei hangisei nei,
nema tatei ranga hapan has nei bate soloseiena a peisanen.
5 Na u ngil e kato hamatsköna tara taina katuun na ema tatei hakats peisa nanei a peisanen pouts,
na ema tatei raharaha boroboro nei,
na ema tatei tori homi has nei.
6 U ngil ema sasaala menei te kato homi uaier,
e sasaala las mena te kato haniga uaier.
7 U ngil e tagala silena mamanaka,
noahasina tara saha ka te butuna.
E hamanena mamanaka bate hamana silena tego butu hamana uaien romana,
na ema tatei sökana has nei.
8 A markato te hiangilngil uaier ema antunan kapa nei.
Kaba u rangan propet ena kapa nou,
na te ranga menari u mamana u mar ranga ena kapa nou,
na te ranga menari a niatei ena kapa has nou romana.
9 Taraha,
ara ema atei hantue rei,
na ra ema ranga hantue has narei u ranga hamatskö tere Sunahan.
10 Kaba a ka te niga nitöana e butu nou romana,
na pöata te butu nouen ba manka tema niga koru nei te kapa nou.
11 Pöata tu tetenei noaia lia,
alia u ranga herei a pien,
alia u hakats herei a pien,
na lia u katoi a markato tara niatei tara pien.
Kaba pöata tu pan ia lia,
alia u hanöa ban a markato tara pien.
12 Taraha,
i romana ara e tara hakukuhil tuun ria turu galas,
kaba i murimuri ara e tara halesala korura romana.
Ara e atei sil tunera ats tabubu,
kaba ra ena atei haniga moto rou romana temar atei haniga sil mera rira.
13 A topisa a ka teka te ka nitöana:
a markato te hamana uaier tere Sunahan,
na markato te hamana sil menari a manka man niga,
na markato te hiangilngil uaier.
Kaba markato te hiangilngil uaier te pan saluhena.