A tson te kato homi koru
5
Alia u hengoin u ranga te poeiena a töa i gusumilimiou e katoena a markato a omi koru tema tatei kato haseri u tematan.
U raranga e poeiena a töa tson e sösoho gono mena a tahol tere tamanen.
2 Alimiou e masa koru las memiou a markato teka te kana i tamilimiou?
Alimiou go tabe meiam a nimatsingolo.
A tson te kato homina egi tsuga banaia tara han i tamilimiou.
3 E manana,
a peisar e ka halehana ba renou limiou,
kaba u namnamei i tar e kana i tamilimiou,
bate here nei alia e ka gono mera goulimiou.
Na lia u hopö kap hakapein a nihahuna tara katuun te kato a markato a omi koru teka.
4 Alimiou go hagum hobotoiam tara solona e Iesu a Tsunono i tarara,
ba namnameir tena ka gono mera noulimiou na nitagala has tere Iesu a Tsunono i tarara.
5 Na limiou go hakei mia a katuun teka i limana e Satan tegi kato homi menai a peisanen na markato a omi i tanen,
be Sunahan te tatei lu poutsena romana u namnamei i tanen turu Lan Pan tara Tsunono i murimuri.
6 A nimasa i tamilimiou ema niga nei.
Alimiou e atei silemiou u raranga te poeiena,
“A tsitabubun is e hapanena a beret hoboto.”
7 Na limiou go ba neiam a markato a omi te here nei u is,
ba torimilimiou te tatei gogosona,
ti kato has uu Jiu ti roron ba has menaien u is i mam tara kannouna turu Paska ba nori te töan gogosor.
Na e here has nei ara e ka hamanasa ria tara kannouna turu Paska,
taraha e Kristo e markato uana tara tunan sipsip ti haatsi,
e mate sil tego luba menaien a man markato a man omi i tarara.
8 Na ragi ban a man markato a man omina i manasa ba torirara te gogosona bara te ranga nera u mana.
9 Alia u koloto mam uala i tamilimiou,
me hatei ragule limiou tegoma ka gono mera milimiou u katuun te katoeier a markaton tsikolo na tahol a lulu tson.
10 Alia uma ranga nai u tematan te tsiktsikolor tsi te gono beri a peisaren a manka na u kopkop na u katuun te hatsunoner u kesa.
E möa.
Sanena limiou goma ka gono merami u mar katuun teka,
ba limiou te laba namiou a han i puta.
11 Alia u rangein tegoma ka gono mena milimiou a katuun te ngöe nei a peisanen e toularara bate tsikolona tsi e gono benei a peisanen a manka na e hatsunonena u kesa na e tuts silena a tana katuun na e roron spakina na e kopkopina.
Alimiou goma nou gono has memi a mar katuun teka.
12-13 E ma ka uanei i tar tego ona merai lia u katuun te hahamanar.
E Sunahan te ona ranouen.
Kaba limiou go tsimou reiam u katuun te hamanar te pala uaier i tamilimiou.
Na limiou go tsuga ba naiam a katuun a omi i gusumilimiou.