A markato te sasaala mena e Sunahan
12
A matsi hahatoulana,
e Sunahan e taatagi koru ranoura.
Na lia e ranga hataatagi mera goulimiou,
alimiou go hala koru naiam a peisa milimiou bate here nei u haats u tötöa tere Sunahan bate herenei a ka a gogoso te haleri e Sunahan ba nonei te hanigeie nen.
Nonei a maroro te tatei mar hatsunono sila mena milimiou e Sunahan.
2 Alimiou goma kukutiemi a markato tara han i puta teka.
E möa.
E Sunahan e ngilin hala ranei limiou u hakats u tsimus bate habiritsena a torimilimiou ba limiou te atei sile mou u ngil tere Sunahan bate hanigei men,
a ka te nigana na ka te sasaala mena e Sunahan na ka te matskö nitöana.
3 E Sunahan e taatagi sileiou lia be hale nei lia a nikapan tara aposol.
Na lia te ranga mera goulimiou hoboto a man tötöa,
alimiou goma poeiemi alimiou e kapan miou.
E möa.
Hakats hamatskö naiam a peisa milimiou a man tötöa e antunana te mar hamana uami limiou,
bate katoemiou a toukui te matsköna,
taraha e Sunahan e hala hoboto raira a nihamana.
4 A peisana a katuun e ka mena a makum a parpara,
na nori hoboto e ka mer a man toukui i taren.
5 Na e kato has uana iesana turu kristen.
Ara e parpara ra kaba ra a töa hun katuun puku noahas te hamana uara tere Kristo.
Ara a töa a hun katuun bara te hihitaguhira.
6 E Sunahan e hala raira a man tötöa a man nitagala tegi kato haniga menai ra a mamana mar toukui.
Te haleia lö e Sunahan a nitagala tego lu menai lö u ranga hamatskö i tanen bate rararie men,
ba lö te rarare hapopo namien te mar hamana uamölö.
7 Te haleia lö e Sunahan a nitagala tego taguhu menai lö a tai,
balö te hitaguhu hasim.
Te haleien lö a nitagala tego hihatuts uu lö,
balö te hihatuts hasim.
8 Te ka memia lö a nitagala tego hatagala menai lö a nihamana tara palai,
balö te kato hasemen.
Te hitaguhu mia lö tara moni,
alö a tatangana.
Te tara kap ramia lö a palai,
ba lö te hipakoko hanigam batema karousmi.
Te taatagi sile mia lö a palai,
balö te taguhu ramen bate sasaalam.
9 Alimiou go hiangilngil hamana iam ba tema gamo mi.
Rama naiam a ka te omina bate pile kap namiou a ka te nigana.
10 Hiangilngil iam te kato uar a man hahatoulana hamana.
Na limiou go hapaneiam a tai i tamilimiou.
11 Alimiou go kui hatagala iam batema karousmi.
A torimilimiou ega sasaala koru te kui bemi limiou a Tsunono.
12 A ka te hamana sile milimiou e tatei hasasaala ranou limiou.
Te butuna u tori tiama,
ba limiou te tuatamimiou.
Alimiou go singo nitöa uaiam tere Sunahan.
13 Alimiou go hala has rami a palair u kristen a manka i tamilimiou,
bate lu has merami u katuun i luma i tamilimiou.
14 Kato haniga raiam u katuun te kato homi rariou limiou,
ne möa tu ranga hohomir,
singo be ramia tere Sunahan ega taguhu raien.
15 Sasaala gono me raiam a pala te sasaalar,
bate tabe gono has meramiou a pala te taber.
16 Kaka haniga gono meraiam u katuun,
möa tu hapanpan iam.
Kaka haniga gono meraiam u katuun papala,
ba tema pei mi alimiou lahas te ka memiou a niatei.
17 Te kato homina a katuun i tamölö,
möa tu palisi.
Kato sil a markato a niga te hanigeier u katuun hoboto.
18 Torohana hatagala sil tego ka haniga koru merai lö u katuun hoboto.
19 A matsomi,
e möa koru tego hipou uaiam limiou.
Nonei a ka peisa tere Sunahan.
Taraha,
i koloto naia turu Buku u Göagono te pei menai e Sunahan,
“Alia te hipou gou.
Alia te palise gou a markato a omi.”
20 Na u Buku u Göagono e pei hasena:
“Te besna a katuun te rarahe noulö,
balö te hanoue men.
Na te makana a katuun te rarahe noulö,
balö te haue men.
Te markato uamoulö teka,
balö te kato hamatsingole men.”
21 A markato a omi ema tatei tagala saluhe ranei limiou.
E möa.
Alimiou go tagala saluhe naiam a markato a omi te haröto menami lö a markato a niga.