U haharuei tara sipsip te taia
15
U katunun lulu takis u parpara na palair u katuun u omi i lama memi hahengo ria tere Iesu.
Luk 15:1-10
2 Ba u Parasi na u tson hihatuts tara Lo e ranga haraharaha ner e Iesu me poeier,
“A katuun teka e kapiena rena u katuun u omi na e nou gono has mera nen!”
3-4 Be Iesu e hatei ra neien u haharuei teka,
“Tego ka meia ta töa i tamilimiou a 100 tara sipsip ba töa i taren te taiana,
gaha tega katoeien?
Nonei ga la bar a 99 sipsip tara makum te ka rien batena sakiena a sipsip te taia,
e antunana tego sabe pouts menaien.
5 Pöata tena sabe poutse nen a sipsip te taia,
ba nonei te sasaala koruna bate hopöe nen i halahalanen.
6 Ba nonei te söata pouts mena neien i han batena ngö gögono rena u hahikapien i tanen na u katuun te sukusukur bate poeiena i taren,
‘Sasaala gono memoulia.
Taraha?
Alia u sabe poutsi a sipsip i tar te taia!’”
7 Be Iesu e poeiena,
“Na lia e ranga mera goulimiou,
e markato has uana iesana,
i Kolö e sasaala koru has meriou a töa katuun a omi te palis ba nena a man markato a man omi i tanen.
Na nisasaala teka e pan bala nanou a markato te sasaala mena rouien a 99 tara katuun a niga.”
U haharuei tara moni te taia
8 Be Iesu e poeiena,
“Ga sanena ta töa ta tahol ga ka mei a maloto a silva moni ba töa te tiana,
ga nonei e katoe nou aha?
Nonei ega hakulupi u lam,
bate sasaloena a luma i tanen,
bate tara haniga koruna tara mamana makum,
e antunana tego sabe pouts menaien a moni.
9 Pöata te sabe poutse nouen a moni,
ba nonei te ngö gögono rena u hahikapien i tanen na u katuun te sukusukur bate poeiena,
‘Sasaala gono memoulia.
Taraha?
Alia e sabe poutse gula a moni tu hatie lia.’”
10 Be Iesu e poeiena,
“Na lia e ranga mera goulimiou,
e markato has uana iesana,
u angelo tere Sunahan e sasaala koru has meriou a töa katuun a omi te palis banena a man markato a man omi i tanen.”
U haharuei tara pien tson te taia
11 Be Iesu e poeiena,
“A töa katuun e ka mei a huol a pien tson i tanen.
Luk 15:11-32
12 Ba hahuoluna a pien e ranga mena e tamanen me poeiena,
‘O Tamar,
alö go hale mei lia a manka tu hopö kap bei lö alia ba lia te pile peisa nagen.’
Be tamanen e lu kaakata talena a manka i tanen me hala raneien a huol a pien tson i tanen.
13 Ema mala pina koru ii ba hahuolina a pien te hahol nena a mamanaka hoboto i tanen me luena a moni me la uana tara han i lehana.
Ba nonei ena hakapa pinopinoena a moni i tanen tara man markato a man omi te katoeien.
14 Nonei e hihol ba hakapein a man moni hoboto i tanen,
ba pan nen a bes e butu hobotona tara han te ka ien,
nonei ema ka lel tala mei ta ka.
15 Ba nonei ena kuina tara töa katununa tara han teka.
Ba katuun teka e hala mena neien tara makum te kaia a heis poum i tanen,
ba nonei ena taratara kap rena u poum.
16 Nonei e bes koru na kannou tena hanou raien u poum e tara hanigan töa.
Kaba e möa ta katuun tega haleien ta ka.
17 “Ba pöata te talesala sil poutseia u hakats i tanen a manka te katoeien,
ba nonei e poeiena,
‘U katunun kui tere tamar e ka mer a kannou a para,
kaba lia e ka gia teka bate mate koru megu a bes!
18 Alia e takei gou bate la pouts uagou tere tamar ba lia tena pei gou,
O Tamar,
alia u kato homi ia i matana e Sunahan na i tamölö.
19 Ema antuna len tale nei alia egi ngö lelei a pien i tamölö.
Alö go kato here namei lia a katunun kui i tamölö.’
20 Ba nonei e takeina me la uana tere tamanen.
“Nonei e ka noaia i lehana be tamanen e tara sabie nen me taatagi koru nanen.
Ba nonei e piata uana i tanen mena lukute nen me taatagi koru nanen.
21 Ba pien tson e poeiena i tanen,
‘O Tamar,
alia u kato homi ia i matana e Sunahan na i tamölö.
Ema antuna tale nei alia gi ngö lelei a pien i tamölö.’
22 Kaba e tamanen e pei turu katunun kui i tanen,
‘Lue muma u hasobö u niga batemi hasoge mien.
Hasesei iam!
Ba limiou te hasogo hase miou a ring a goul i kabelenen na u sendol i mounen!
23 Na lue muma a tunan bulmakau a pan haniga koru batemi nase men,
ba ra te katoera a kannou pan bate sasaalara.
24 Taraha?
A pien tson i tar e here ii a katuun te mate,
kaba e töatöa poutsuna.
Nonei e tia me butu pouts nama.’
Ba nori e tanian nou talar me sasaalar.
25 “Turu lan teka a pien tson a hamua e ka noa ma i kui.
Ba nonei e gala uanama i han me hengoena u katuun i köma bate sani ria i luma.
26 Ba nonei e ngöena a töa katunun kui me poeiena,
‘Aha te sasaala mer u katuun?’
27 Ba katunun kui e poeiena i tanen,
‘E toulamölö e tuku pouts lala na e tamamölö e kato hamate hakape lala a tunan bulmakau a bokoko.
Taraha?
Nonei e lu poutse lala a pien tson i tanen na nonei e niga noa hasina.’
28 Kaba pien a hamua e raharaha koru me raman tasuna.
Be tamanen e lakasa nama me ranga hatamina i tanen.
29 Ba nonei e ranga palisena e tamanen me poeiena,
‘Alia u kui hatagala koruia i tamölö turu mamanu hiningal,
na lia u mamala hipus nai u ranga i tamölö.
Kaba lö u mamala hale ii lia ta töa ta tunan meme tego nou gono mei lia a man hikapien i tar.
30 Kaba a pien tson i tamölö teka e ba pinopino naia a moni i tamölö turu touhaliou ri maroro!
Kaba pöata te la pouts uana men i han,
ba lö te kato hamate bemien a tunan bulmakau a bokoko!’
31 Be tamanen e poeiena i tanen,
‘A tsi pien i tar,
alö e ka gono nitöa memou lia,
na mamanaka hoboto i tar emu manka has lö.
32 Aragi sasaala bate masa korura.
Taraha?
E toulamölö e here ii a katuun te mate,
kaba e töatöa poutsuna!
Nonei e tia kaba e la poutsuma!’”