3 Ané me ngá wók mora kíŋŋ deé sɔ́ étɔɔ́ édzwée,

deé dzó ná,

“Dággán!

Étɔbɔga Nzamá é ntɔɔ́ bábe bot;

véa Émyen aa ye tɔbɔ énzénzaŋ deba,

bá bá ye bɔ é bot beñ,

Nzamá émyen ñí aa ye fe tɔbɔ bábe bɔ́.

4 Aa ye bɔ́ fími míige mése méye é mís meba.

Awú dăá ye bera bɔ,

etɔɔ́ meyep dá dăá ye ki bera bɔ,

ngé ki dú,

ngé ki mitéñ;

amú ná é mam ósúá mé sés fe.”

5 Éde éñí á mbé a tɔɔ́ étɔɔ́ édzwée a ngá dzó ná,

“Dággé!

Ma bɔ mam mése mifefeñ.”

A bera fe dzó ná,

“Tsiligé,

akála ná ébí bí ne bebébélá ya beñá bífíá.”

6 Éde fe a ngá bera ma dzó ná,

“É mana yaá!

Ma me ne Alfa ya fe Omega,

Atáraga ya fe Asúgánn.

Éñí a belé evéé,

ma ye ñí vé mefɔ́m mendzímm méye éniŋ dás.

7 Éñí aa ye wún,

aa ye ñɔŋ é mam má tsígá;

véa ma ye bɔ é Nzamá weñ,

ñí aa ye fe bɔ é mwán wɔm.”

8 “Ve miyeyéñá,

be kaa bwíni,

bebɔ ebírán,

beywíñ bot,

bebɔ nsémm eveák,

bevala bot,

bekaŋ biyemá,

ya minéneá míse bá ye ñɔŋ é tsígá deba átwaá dá yóŋ ya ndúán ya efit;

édí te édɔ é ne áwú beáñ.”

9 Éde é baángel zaŋgbéá bé mbé bé belé mekɔ́p zaŋgbéá ndzálánn ya bíbúúbúu zaŋgbéá byá súgan,

mbɔ́ɔ́ ye été a ngá sɔ́ á ŋga kɔ́bɔ ya ma,

eé dzó ma ná,

“Nzaá!

Ma ye wa ke lére mbɔ́m,

Mwann Ntómá ngéá.”

10 Ané a ngá ke ya ma á nsísim été á mora nkoó enziŋ óyóp,

véa éñe a ngá lére ma mfúfúp kísoan,

Yerusalen,

éñí aa sigi a dzóp,

eé sɔ́ ébe Nzamá;

11 a mbé á belé fe é dúmá Nzamá.

Míkwikwiñ myeñ mí mbé ané ákwá é ne ededea mvéáñ,

amvála ané akwá kristál jaspe.

12 Aa mbé a belé mora ongóo,

o tɔɔ́ oyaáp óyóp,

ya mibéñ awóm ya mí beáñ.

Á mibéñ áyóp,

ñí ya baángel awóm ya bé beáñ,

biyola byá bí tɔɔ́ fe ntsilann,

ébyɔ bí ne ébí awóm meyɔŋ ya meyɔŋ mé beáñ méye bwán bé Israel.

13 Ébe á mfá nlódzóp wá kúlu,

mibéñ mí léa;

ókwiññ,

mibéñ mí léa;

á nkyeññ,

mibéñ mí léa;

á mfá nlódzóp wá dzím ñí ya fe mibéñ mí léa.

14 Véa,

ongóo ye á kísoan wá ó mbé fe ó belé awóm mibókga ya mibókga mí beáñ,

été éñe á mbé ya bíyola é baapostol awóm ya bé beáñ Mwann Ntómá.

15 Éde éñí a ngá kɔ́bɔ ya ma,

aa mbé a belé ovakga ntúmm koŋ,

á mfá ye ná aa vak kísoan,

ya mibéñ míye été ya fe mbókga weñ.

16 Véa kísoan e mbé ya mifá mí nii,

ntéññ ya ndam abímm avɔ́ɔ́.

Ané a ngá vak kísoan ya ntúmm ovakga,

mekwá binzuk bí beáñ ya mekwá mitet mí beáñ (2,200 km).

Véa ntéññ ya ndam ya eyála,

bí ne abímm avɔ́ɔ́.

17 Éde a ngá vak mfim óngóo,

ané ó ngá kwíñ ya bemetro mewóm mé saman ya bemetro bé tán (65 m),

ovakga mwann mot,

éwɔ ángel a ngá belan ya wɔ.

18 Véa,

mfim óngóo ó mbé nlóŋán ya akwá kristál jaspe.

Ve kísoan da e mbé ya ñá mfaŋ koŋ ébyen,

deé fonan ya ñá mfaŋ kristál ébyen.

19 Mibókga mí óngóo míye á kísoan,

mí mbé mbamba nkomann ya amvála ákwá áse é ne ededea eban:

ósúá akwá jaspe;

édí beáñ akwá safiro;

édí léa akwá ágata;

édí nii akwá esmeralda;

20 édí tán akwá ónise;

édí saman akwá kornalina;

édí zaŋgbéá akwá krisólito;

édí mmom akwá berilo;

édí ebuú akwá topasio;

édí awóm akwá krisopraso;

édí awóm ya mbɔ́ɔ́ akwá jasinto;

édí awóm ya beáñ akwá amatista.

21 Éde,

awóm mibéñ ya mibéñ mí beáñ mí mbé mbɔann ya mekwá mé perla;

kada mbéñ mbɔ́ɔ́ ye été,

akwá perla avɔ́ɔ́;

nseŋ kísoan wá ó mbé fe ya ñá mfaŋ koŋ ébyen,

amvála ané é kristál da yéne áyát.

22 Véa,

meé ndzí yén templo enziŋ été,

amú ná,

Ntí é Nzamá a ne ya nguuése éñe a né é templo deñ,

bá Mwann Ntómá.

23 Kísoan dăá yi nlódzóp,

ngé ki ngomdan,

á mfá ná bé lére dɔ eyéá;

amú ná,

é dúmá Nzamá dá bwaa dɔ,

Mwann Ntómá éñe fe a ne é láma deñ.

24 Éde meyɔŋ mé bot mése má ye wulu éyéá deñ été;

véa,

bekéza béye á sí mifá mí nii bá bá ye sɔ́ ya é dúmá deba á kísoan te été.

25 Mibéñ míye été myăá ye dzip tám enziŋ omos,

(akála ná alú dăá ye bɔ ó weñ.)

26 Bá ye sɔ́ ya é dúmá ya fe éwógá meyɔŋ mé bot á kísoan te été.

27 Dzóm enziŋ ye é ne mvin dăá ye ñíi été amvála enziŋ;

ngé ki éñí aa niŋ á nkaŋann biyemá été,

ya fe mineá;

ve fáve ébá bíyola byeba bí ne ntsilann ábá ye éniŋ Mwann Ntómá.