19
Niané mam méte me ngá lot,
véa éñe me ngá wók mora kíŋŋ,
amvála ané éñí míyónn mora nkuna bot á dzóp été,
deé dzó ná,
“Aleluya!
Akoroga ya dúmá ya nguu edzwée
bí ne ébí é Nzamá wea;
2 amú ná,
nkíkgán misaŋ weñ
ó ne bébélá ya nzósoó.
Akála ná,
é mora endendea miningá
é ngá ywíñ é sí ñí ntuk ya nsémm eveák,
a kík yaá dɔ misaŋ,
a kun yaá fe ébe é mó miningá te,
mékií áloá deñ a ngá kúlu.”
3 Éde bé ngá bera dzó éyɔŋ beáñ ná,
“Aleluya!
Ótsírá weñ wá bét
mbéámbéá ya mbéámbéá.”
4 Ané betébosú mewóm mé beáñ ya bé nii bábe mitétéá bíniŋ mí nii,
bé ngá ku ya mesú ó sí,
bé ŋga kaŋ é Nzamá a tɔɔ́ étɔɔ́ edzwée,
béé dzó,
“Amén!
Aleluya!”
É fét bidzí Mwann Ntómá
5 Véa éñe kíŋŋ e ngá sɔ́ étɔɔ́ edzwée deé dzó ná,
“Lugán é Nzamá wea,
mína áloá deñ áse
ya ébá bá kɔ ñí wɔŋŋ,
abobot ya bora bé bot.”
6 Éde me ngá wók amvála ané é kíŋŋ mora nkuna bot,
ya amvála ané éduŋŋ ásɔk mendzímm,
ya amvála ané éduŋŋ bora bendzáláŋ,
deé dzó ná,
“Aleluya!
Amú ná Ntí é Nzamá wea
a ne ya nguuése
éñe aa dzwée.
7 Bí yénŋánán mvéáñ,
bí sánŋánán,
bí váán fe ñí dúmá;
akála ná é fét álúkgán Mwann Ntómá
é sian yaá,
ngéá ñí a mana yaá koman.
8 Bá bé vé yaá fe ñí ná,
á bwát mébwát mé ne ededea mvéáñ,
émá má feañ ya mifúbánn.”
(Akála ná,
benzósoó mibɔann
ébɔ́ bé ne mébwát mitɔ́pbán mí bot mé ne ededea mvéáñ.)
9 Éde ángel a ngá dzó ma ná,
“Tsiligé édí:
Mvɔmm ya ébá bé tɔbɔ yaá mbánán á fét bidzí ye álúkgán Mwann Ntómá.”
Ané a ngá bera ma dzó ná,
“Ébí bí ne bébébélá bífíá Nzamá.”
10 Véa éñe me ngá ku ñí á mebɔ ósí,
ná ma kaŋ ñí;
éde ñí a ngá dzó ma ná,
“O táa dɔ bɔ!
Ma me ne fe mbɔ biséññ ntéññ mbɔ́ɔ́ ané wa,
ntéññ mbɔ́ɔ́ fe ané é bɔbéñɔŋ bé belé é ngañiá Yesus.
Kaŋŋe Nzamá!
Amú ná é ngañiá Yesus éñe á ne nsísim ye á nkúlánn medzó.”
Mélúmán Mwann Ntómá
11 Éde me ngá yén dzóp é yɔ́ɔ;
ó véa,
mfúm nkalbeñ ó ntɔɔ́;
éñí ñí á mbé a tɔɔ́ wɔ áyóp a ne eyola ná,
Bébélá ya Tételé mot;
véa aa kík misaŋ ya ábɔ melúmán á nzósoó été.
12 É mís meñ amvála ané nkaba ndúán,
nló weñ áyóp wá abwiññ bekorona bé diadema;
a belé fe eyola ntsilann ná,
mot enziŋ ăá yem fáve émyen.
13 A baga fe elíŋŋá é tɔɔ́ nduann á mekií été,
éyola deñ dá é ne fe ná,
“Éfíá Nzamá.”
14 Éde mísámá melúmán mí ne á dzóp,
mí baga mébwát mé ne ededea mvéáñ,
mifúm,
ya mifúbánn,
myá myá bee fe ñí á mifúm mikalbeñ áyóp.
15 Ánu deñ été,
dá akáp nzwaokeŋ aa kwíñ,
á mfá á bábá ya ñí meyɔŋ mé bot;
ñí aa ye fe mɔ dzwée ya ntúmm ekyeñ,
eé tsibi ekiliga vino ye méyéá méye ólúnn é Nzamá á ne ya nguuése.
16 Ya fe ébe élíŋŋá deñ,
á mfá ábeñ,
a belé eyola é tɔɔ́ ntsilann ná:
KÉZA YE Á BEKÉZA,
YA NTÍ YE Á BEDZWÉE.
17 Éde me ngá yén ángel enziŋ a téle á nlódzóp été,
ané a ngá yónán ya mora kíŋŋ,
eé dzó ánwann áse dá yéle á nyem dzóp ná,
“Nzaán ákóán é mora fét bidzí Nzamá;
18 á mfá ye ná,
míní dzí míson bekéza,
ya míson bekomandée,
ya míson biwólo bí bot,
ya míson mikalbeñ ya é bot bá tɔbɔ myɔ áyóp;
míson bot bésesé,
filí bot ya aloá,
abobot ya bora bé bot.”
19 Véa éñe me ngá yén ebibiñ tsít,
ya bekéza béye á mesí,
ya mísámá melúmán myeba bé kóán á mfá álúmán ya éñí á mbé a tɔɔ́ á nkalbeñ áyóp ya fe nsámá melúmán weñ.
20 Éde bé ngá biñ ebibiñ tsít,
bá nnéneá nkúlu medzó ó ngá bɔ weé bɔ biyágán bí mam ébe mfá weñ;
ya ébyɔ,
a ngá bɔ eé duk ya byɔ ébá bé ngá ñɔŋ é ndem ebibiñ tsít ya ébá bé ngá kaŋ éyemá deñ.
Ané bé ngá wea bé beáñ béte mitétéá átwaá ndúán dá yóŋ ya efit été.
21 Véa,
ébá bevɔ́ɔ́ bá bé ngá tɔbɔ nwúán ya é nzwaokeŋ e ngá kwíñ ébe ánu éñí á mbé a tɔɔ́ á nkalbeñ áyóp;
éde anwann áse é ngá dzéñ ya míson myeba.