Babilonia aa ku
18
Niané mam méte me ngá lot,
véa éñe me ngá yén ángel mfé eé sɔ́ á dzóp,
a belé nguu edzwée ndén,
ané é sí ñí e ngá tɔbɔ éyéá été ya é dúmá deñ.
2 Éde a ngá yónán ya mora kíŋŋ,
eé dzó ná,
“Á ku yaá!
Babilonia éñí nnén,
á ku yaá!
Á veŋan yaá étɔbɔga bembéa mísísim,
é vóm nsísim mvin óse wá tɔbɔ,
ya é vóm ónwann óse ó ne mvin
ya áŋgónó wá wá tɔbɔ fe.
3 Amú ná meyɔŋ mése mé ñú yaá
vino ye á meyéá méye á nsémm eveák weñ.
Bekéza béye é sí ñí bé mana yaá bɔ
medzíán bábe bɔ́,
bebɔ akira bá bé mana yaá fe bík
ya é nguu edzwée ye ábwiññ éniŋ tugá deñ.”
4 Éde me ngá wók kíŋŋ fé á dzóp été,
deé dzó ná,
“Á áyɔŋ dam,
kólogán ébe éñe,
á mfá ye ná míní nza ñɔŋ
ngap ébe misémm myeñ,
ya fe ná
míní bɔ kaa ñɔŋ bíbúúbúu byeñ.
5 Akála ná mísémm myeñ mí mana yaá kóán
angós akekwíñ á dzóp été.
Nzamá ñí a síman yaá fe bíbírán byeñ.
6 Váán ñí ámvála
méyáán ñí a ngá vé fe.
Váán ñí dɔ táŋ biyɔŋ bí beáñ,
amvála ané míbɔann myeñ mí ne.
É kɔ́p á koman yaá,
mína komŋán fe ñí dɔ táŋ biyɔŋ bí beáñ.
7 Éde ya ámvála a ngá vé émyen dúmá,
eé niŋ á tugá été;
néa,
mína váán fe ñí eñan ya endáglé.”
“Amú a dzó yaá a nlém weñ été ná,
‘Ma me tɔɔ́ amvála ané kéza miningá,
me sés nkús,
eywiññ dá măá ye ki wórán amvála enziŋ.’
8 Ya dzam te édɔ,
bíbúúbúu byeñ byá ye sian ébe mos mbɔ́ɔ́;
awú,
ya dú,
ya nzeñ;
bá ye fe ñí dzígi á ndúán été.
Akála ná,
Ntí Nzamá éñí aa kík ñí misaŋ,
a ne ewólo.”
9 Éde,
békéza béye é sí ñí bé mana yaá bɔ nsémm eveák ya fe ániŋ á tugá été bábe bɔ́,
bá ye yi ya átɔbɔ éywiññ ákála deñ e tám bá yén otsírá ye á ntumá weñ.
10 Véa,
bé téle oyaáp ya ekɔwɔŋŋ ákála éndáglé deñ,
bé ŋga dzó ná,
“Ngwáa!
Ngwáa ya mora kísoan,
á Babilonia,
éwólo kísoan!
Akála ná,
nkíkgán misaŋ we ó sian yaá
fáve ébe áwola déá.”
11 Bebɔ akira béye é sí ñí bá ye yi ya fe átɔbɔ ya meyep ákála deñ;
amú ná kaa fe ya é mot aa bera kus é byém byeba,
ná;
12 byém bí koŋ,
ya ébí bíye á ngoós,
ya ébí bíye á mekwá mé ne ya ededea eban,
ya ébí bíye á mekwá mé perla,
ya ébí bíye á mebwát mé ne ededea mvéáñ,
ya ébí bíye á bitóp bí kéza,
ya ébí bíye á bitóp bí seda,
ya ébí bíye á bítóp bí ne nsínn evélé,
ya élé áse dá yem num,
ya é dzóm áse é ne mbɔann ya marfil,
ya é dzóm áse é ne mbeann elé,
ya zíiŋ,
ya ekyeñ,
ya mekwá mé mármol;
13 ya bílwá byá yem num,
ya amomón,
ya otsírá mbamba enum,
ya mbwánn enum,
ya mekémle mé mirra,
ya vino,
ya mbwánn ólíba,
ya mbamba arina,
ya trigo,
ya beñát,
ya mitómá,
ya mikalbeñ,
ya bikálík,
ya aloá,
ya biniŋ bí bot.
14 É byém bíse nlém we ó ngá bíra dziŋ,
bí mana yaá kólo ébe wa,
ya ébí bíse bí mbé wa binén ya mibeŋ
byá bí mana yaá fe wa ke oyaáp,
wa wăá ye ki bera koan ya byɔ.
15 Éde bébɔ akira bé ngá kuan byém bíte,
bé mana bík,
bá bá ye fe tébe oyaáp ya ekɔwɔŋŋ ákála éndáglé deñ,
bé ŋga yi ya átɔbɔ ya meyep;
16 béé dzó ná,
“Ngwáa!
Ngwáa ya mora kísoan,
éñí e mbé e baga mébwát mé ne ededea mvéáñ,
ya émá mé ne nsínn evélé,
ya mebwát mé kéza;
e tɔɔ́ nkomann ya byém bí koŋ,
ya mékwá mé ne ededea mvéáñ,
ya fe mekwá mé perla.
17 Amú ná abwiññ ákúmm dwe
é mana yaá dzáŋ
fáve ébe áwola déá.”
Véa ndulu byéa áse ya é bot bése bá wulu á byéa été,
ya bebɔ biséññ bése béye á byéa ya ébá bése bá niŋ ya máŋ,
bé ngá tébe oyaáp.
18 Éde,
niané bá dága otsírá ye á ntumá weñ,
bé ŋga síli ya kíŋŋ oyaáp óyóp ná,
“Kísoan fé dá fonan ya mora kísoan?”
19 Véa éñe bé ngá kúp asuúp á míló myeba ya áyónán,
ya áyi,
ya átɔbɔ ya meyep,
bé ŋga dzó ná,
“Ngwáa!
Ngwáa ya mora kísoan,
ya éñí é mot áse aa belé byéa á máŋ été,
aá mana bík ya ákúmm deñ;
amú ná ó mana yaá tɔbɔ nlamann fáve ébe áwola déá.
20 Á dzóp,
sánŋe ya édí é kwíñ yaá ébe éñe,
ya fe mína mífúfúp mí bot,
ya baapostol,
ya bekúlu medzó,
akála ná Nzamá a lére yaá
nkíkgán misaŋ weñ ébe éñe ákála denan.”
21 Éde ngunguú ángel enziŋ ó ngá bóro mora akwá,
amvála ané é mora akwá bá kwa ya dɔ bidzí,
ané a ngá wea dɔ á máŋ été,
eé dzó ná,
“Ya ámvála miyinbe dí édɔ Babilonia,
mora kísoan bá ye ñí kpoo ya dɔ,
băá ye ki ñí bera yén.
22 Véa,
băá ye bera wók mékíŋŋ bebom memvét ébe wa,
ya émá beyee byeá,
ya émá bebom andzáŋŋ,
ya émá belɔ́ŋ metɔ́ŋ.
Băá ye ki bera koan ya nkékéŋŋ mbɔ byém enziŋ ébe wa;
băá ye ki bera wók amvála enziŋ ébe wa
éduŋŋ ákwá bá kwa ya dɔ bidzí.
23 Eyéá láma dá dăá ye ki bera bwaaban ébe wa;
é kíŋŋ é ndómán é ŋga lúk yaá
éñí é ngwan é ŋga ke yaá álúk
băá ye dɔ bera wók ébe wa.
Amú ná bébɔ akira bwe
ébɔ́ bé mbé bora bé bot é sí ñí,
ya ná,
meyɔŋ mése má má mana fe tɔbɔ á méduk été
ya mévalan mwe.
24 Été fe éñe bé ngá koan
ya mékií bekúlu medzó,
ya émá mifúfúp mí bot,
ya fe émá ébá bésesé
bé ywíñ yaá é sí ñí.”