Mora endendea miningá
17
Éde ángel mbɔ́ɔ́ ye é baángel bé mbé bé belé mekɔ́p zaŋgbéá a ngá sɔ́,
á ŋga kɔ́bɔ ya ma eé dzó ma ná,
“Nzaá!
Ma ye wa ke álére nkíkgán misaŋ é mora endendea miningá é tɔɔ́ ábwiññ mendzímm áyóp;
2 ya éñí bekéza béye é sí ñí bábe bɔ́,
bé mana yaá bɔ nsémm eveák,
é bot bé tɔɔ́ é sí ñí bá bé mana yaá fe fían ya é vino ye éniŋ endendea deñ.”
3 Ané a ngá ke ya ma éyáŋŋ á nsísim été,
véa éñe me ngá yén miningá a tɔɔ́ évélé ebibiñ tsít áyóp,
a tɔɔ́ ndzálánn ya biyola méteá,
ebibiñ tsít te é mbé ya miló zaŋgbéá ya awóm mila.
4 Éde miningá te,
a mbé a baga bitóp bí kéza ya nsínn evélé,
a tɔɔ́ nkomann ñúu mvéáñ ya byém bí koŋ,
ya mékwá mé ne ya eban,
ya mekwá mé perla,
a mbé fe a belé kɔ́p ó wéá e tɔɔ́ ndzálánn ya é mam Nzamá aa víni,
ya nsémm eveák,
ya eniŋ endendea;
5 véa ábobon asú weñ ñí eyola é tɔɔ́ ntsilann ná,
é dzam dá nzaman kén mot:
“BABILONIA ÉÑÍ NNÉN,
ÑIÁ BINDENDEA BÍ BININGÁ,
YA ÉÑÍ É MAM NZAMÁ AA VÍNI É SÍ ÑÍ.”
6 Ané me ngá yén miningá a tɔɔ́ fían ya mékií mifúfúp mí bot ya fe mékií bévé ngañiá Yesus.
Niané me ngá yén ñí,
éde me ngá bíra daŋ ku avoó.
7 Ané ángel a ngá dzó ma ná,
“Dzé wa ku ya dɔ avoó?
Ma ye wa kat é dzam dá nzaman kén mot ébe miningá ya ebibiñ tsít dá ke ya ñí,
édí é belé miló zaŋgbéá ya awóm mila.
8 Ébibiñ tsít o mvá yén,
é mbé,
ve é sés ki fe;
é ntɔɔ́ ná é nkún nzu áváma,
deé sɔ́ édwá dzíbi été,
véa é kéñ fe á ntsamann.
Éde bot béye é sí ñí,
ébá bíyola byeba bĭí ndzí tɔbɔ ntsilann ábá ye éniŋ été,
bá ye ku mevoó,
niané bá yén ná ebibiñ tsít é mbé,
é sés fe,
ye ná dá ye bera váma.
9 (Ó vá,
éñe aa lére nló ó belé fak.)
Miló zaŋgbéá,
mí ne mikoó zaŋgbéá,
é vóm miningá a tɔɔ́ áyóp.
Mí ne fe bekéza zaŋgbéá,
10 bé tán bé ku yaá,
mbɔ́ɔ́ éñe a ne;
éñí mbɔ́ɔ́ ăá bé sian,
éyɔŋ aa ye sian,
dá yian ná á tɔbɔ oyomm abɔ́ŋŋ tám.
11 Éde ebibiñ tsít é mbé ná,
é sés fe,
édɔ é ne é kéza mmom;
é ne békéza zaŋgbéá été,
dá dá ke fe á ntsamann.
12 Áwóm mila myá o mvá yén,
é ne áwóm békéza é ne ná dăá bé ñɔŋ edzwée;
ve dá ye ñɔŋ edzwée ané bekéza táŋ áwola avɔ́ɔ́ fufúlu bábe ebibiñ tsít.
13 Ébá béte bá sóŋ dzam avɔ́ɔ́,
édɔ ná bá ye kee ebibiñ tsít é nguu edzwée deba.
14 Ébá béte,
bá ye bɔ melúmán ya Mwann Ntómá.
Ve Mwann Ntómá ñí aa ye bɔ́ wún,
amú ná éñe a ne Ntí ye á bedzwée,
ya Kéza ye á bekéza;
ébá bá bé ne fe bábe bɔ́ bé ne mítélán mí bot,
mítɔ́pbán mí bot,
ya bebébélá bé bot.”
15 Éde a ngá dzó ma ná,
“Méndzímm o mvá yén,
é vóm endendea miningá dá tɔɔ́ áyóp,
a ne meá,
mikuna mí bot,
meyɔŋ,
ya mikɔ́bɔ.
16 Áwóm mila dá o mvá yén ébe ebibiñ tsít,
émí míte myá ye víni endendea miningá,
véa myá ye ñí lama ya átéle ñí swéswéññ,
myá ye dzí míson myeñ,
ya fe ádzígi ñí á ndúán été;
17 Amú ná Nzamá a vé yaá bɔ́ á mílém myeba été ná bé dzálá nkómánn weñ:
béé sóŋ dzam avɔ́ɔ́ á mfá ye ná bé kee ebibiñ tsít édzwée ngɔ́mán deba,
akekwíñ ané bífíá Nzamá byá dzálában.
18 Éde,
é miningá ñí o mvá fe yén,
a ne é mora kísoan da dzwée bekéza béye é sí ñí.”