Mekɔ́p méye méyéá Nzamá
16
Éde me ngá wók mora kíŋŋ aa sɔ́ á templo été,
eé dzó baángel zaŋgbéá ná,
“Keŋán áswii mekɔ́p zaŋgbéá méye méyéá Nzamá ó sí.”
2 Ané éñí ósúá a ngá ke,
a swii é kɔ́p deñ ó sí;
éde mbémbéa fóó ya eñan a ngá kwíñ ébe ébá bé mbé bé belé é ndem ebibiñ tsít,
béé kaŋ fe éyemá deñ.
3 Ané éñí beáñ a ngá ke swii é kɔ́p deñ ó máŋ,
ané mé ngá veŋan mekií amvála ané émá mbim;
éde ntétéá dzóm óse ye ó máŋ ó ngá wú.
4 Ané éñí léa a ngá ke swii é kɔ́p deñ áswíñ ya fe á mefɔ́m méndzímm,
éde bí ngá veŋan mekií.
5 Véa éñe me ngá wók ángel ye á mendzímm aa dzó ná,
“O ne nzósoó,
éñí a ne,
éñe fe á mbé,
Á mfúfúp mot;
akála ná o kík yaá é mam má nsaŋ;
6 amú ná baá kúlu mékií mifúfúp mí bot ya bekúlu medzó,
wa o vé yaá bɔ́ ná bá bé ñú fe mekií;
bá yian ya dɔ.”
7 Éde me ngá wók eé dzó áltar ná,
“Ãá,
á Ntí é Nzamá a ne ya nguuése,
nkíkgán misaŋ we ó ne bébélá ya nzósoó.”
8 Ané éñí nii a ngá ke swii é kɔ́p deñ á nlódzóp,
éde bé ngá vé wɔ ná ó dzígi bot ya ndúán.
9 Véa éñe bot bé ngá tɔbɔ ndzíkgán ya mbémbéa ayóŋ;
bé ŋga tea Nzamá,
éñí a belé nguu edzwée ébe bibúúbúu bíte,
bá kaa ki dzoban á mfá ye ná bé vé ñí dúmá.
10 Éde éñí tán a ngá ke swii é kɔ́p deñ étɔɔ́ édzwée ebibiñ tsít,
ané édzwée ngɔ́mán deñ é ngá tɔbɔ ó dzíbi ósí,
bé ŋga ke bá ñála medém ya mitéñ;
11 bé ŋga tea fe Nzamá ye á dzóp ákála mítéñ myeba ya fe ákála mefóó meba,
bá kaa ki dzoban ébe míbɔann myeba.
12 Ané éñí saman a ngá ke swii é kɔ́p deñ á mora oswíñ Ewúfrates;
éde mendzímm méye été me ngá mana vée,
á mfá ye ná é nzenn bekéza béye é vóm nlódzóp wá tée eé tɔbɔ nkomann.
13 Véa éñe me ngá yén misísim mí mvin mí léa mií fonan ya mikɔ́ŋŋ,
myá kwíñ ánu dragón,
ya édí ebibiñ tsít,
ya édí nnéneá nkúlu medzó;
14 amú ná bé ne é bembéa mísísim bá bɔ biyágán bí mam,
ébá béte bá ke bá ke ébe bekéza bése béye mésí mése,
ná bá koan bɔ́ á mfá ye ébe é mora nseŋ mélúmán é mora mos é Nzamá a né ya nguuése.
15 “Dággé!
Ma ma nzu ñí amvála ané ndzídzíp.
Mvɔmm ya éñí aa tɔbɔ evéveññ,
a baale fe mébwát meñ ná a nza wulu swéswéññ,
véa bé ŋga yén fe ósoán weñ.”
16 Éde bé ngá koan bɔ́ é vóm ó ne eyola á nkɔ́bɔ Ebreo ná Armagedon.
17 Ané éñí zaŋgbéá a ngá ke swii é kɔ́p deñ á nyem dzóp,
véa éñe mora kíŋŋ a ngá kwíñ á templo été ná,
“É bɔban yaá.”
18 Éde bevéveés bé ngá bɔ,
ya mekíŋŋ ya bendzáláŋ,
ané mora mfógán sí ó ngá bɔ ámvála dăá bé tára bɔban atéé ye mwann mot a tɔɔ́ éniŋ dzí;
ededea onén ya áŋgónó mifógán mí sí.
19 Éde mora kísoan a ngá kánan mengap mé léa,
bekísoan béye á meyɔŋ bá bé ngá mana fe tɔbɔ ntsamann.
Véa éñe mora Babilonia a ngá ke Nzamá ósímánn,
á mfá ye ná á ñúu ñí é kɔ́p vino ye méyéá méye ólúnn weñ.
20 Ané etuŋŋ ése é ngá dzáŋ;
mikoó myá kaa fe bera koan ya myɔ.
21 Éde bora metééga álot ané bekíl mewóm mé beáñ ya bekíl bé tán (25 kg),
mé ngá sɔ́ á dzóp été méé ku bot ó ñúu;
véa bot bé ŋga tea Nzamá ákála ébúúbúu metééga;
amú ná ébúúbúu deñ te é mbé ededea áŋgónó.