Bot 144,000 bá yee dzeá
14
Éde me ngá dága,
véa éñe me ngá yén Mwann Ntómá a téle á nkoó Sión áyóp,
éñe ya bot táŋ ntet binzuk ya binzuk mewóm mé nii ya binzuk bí nii (144,000) ná,
bé mbé bé belé ntsilann á mesú meba,
éyola deñ ya éyola Éséá.
2 Éde me ngá wók kíŋŋ deé sɔ́ á dzóp été,
ané éduŋŋ ásɔk mendzímm ya amvála ané é kíŋŋ mora ndzaláŋ;
éde é kíŋŋ me ngá wók,
ané bebom memvét béé bom mémvét meba.
3 Véa bé ŋga yee mfefeñ dzeá ébe ású etɔɔ́ édzwée ya ébe ású mitétéá bíniŋ mí nii ya ébe ású bétébosú;
éde mot enziŋ ñí ĕé mbé ki yem dzeá te,
fáve ébá béye á ntet binzuk ya binzuk mewóm mé nii ya binzuk bí nii (144,000),
ébá béye bé ngá tɔbɔ nkoránn ébe é sí ñí.
4 Ébá béte,
ébɔ́ bé ne ébá béye bĕé ndzí kop mvin ya biningá,
bé ne fá bindúnn.
Ébá béte,
ébɔ́ bá bee Mwann Ntómá é vóm ásesé aa ke.
Ébá béte,
ébɔ́ bé tɔbɔ yaá nkoránn énzénzaŋ bot amvála ané é ngap ósúá á mfá Nzamá ya fe á mfá Mwann Ntómá.
5 Bĕé ndzí ki koan ya mineá ánu deba été;
bé ne fá kaa bidzo [ébe ású étɔɔ́ édzwée Nzamá].
É fwéñ baángel bé léa
6 Véa éñe me ngá yén ángel mfé eé yéle á nyem dzóp a belé mbéámbéá mbamba fwéñ,
á mfá ye ná á kat dɔ é bot bé tɔɔ́ é sí ñí;
ébe mot áse,
ébe meyɔŋ mése,
ébe nkɔ́bɔ óse ya fe ébe dzeá áse;
7 eé yónán ya mora kíŋŋ ná,
“Kɔgán Nzamá wɔŋŋ,
váán fe ñí dúmá!
Amú ná áwola nkíkgán misaŋ deñ,
é sian yaá.
Kaŋán éñí a ngá vele dzóp ya sí ya mefɔ́m méndzímm!”
8 Éde ángel mfé,
éñí beáñ ñí a ngá bee ñí,
eé dzó ná,
“Á ku yaá,
mora Babilonia á ku yaá!
Éñí a ngá ñúu meyɔŋ mése vino ye á meyéá méye á nsémm eveák weñ.”
9 Ané ángel mfé,
éñí léa a ngá bee bɔ́,
eé dzó ya mora kíŋŋ ná:
Ngé mot enziŋ aa kaŋ ebibiñ tsít ya éyemá deñ,
a ñɔŋ fe ndem ású deñ ngé ki é wéá weñ,
10 ñí aa ye fe ñú é vino ye á meyéá Nzamá,
éñí a ntɔɔ́ nkomann,
kaa mbunann ya dzóm á kɔ́p ye ólúnn weñ;
aa ye fe ñú endáglé ya ndúán ya efit ébe ású mífúfúp mí baángel ya ébe ású Mwann Ntómá.
11 Véa otsírá ye éndáglé deba wá bét mbéámbéá ya mbéámbéá;
éde ébá bá kaŋ ebibiñ tsít ya éyemá deñ,
ya fe éñí áse aa ñɔŋ ndem ye éyola deñ bĕé belé awaabé,
ané alú ané omos.
12 Ó vá,
éñe étɔɔ́ mbán mífúfúp mí bot é ne,
ébá bá dzálá mémvéná Nzamá bé tɔbɔ fe ya Yesus mebúnn.
13 Éde me ngá wók kíŋŋ deé sɔ́ á dzóp été ná,
“Tsiligé:
‘Mvɔmm atéé ye émuú ya béwú bá wú ébe Ntí.’ ”
Nsísim aa dzó ná,
“Ãá;
á mfá ye ná bé waabe ya bíséññ byeba,
amú ná míbɔann myeba myá bee bɔ́.”
Bá yoo bot
14 Ané me ngá dága,
me yén mfúm nkút,
éñí á mbé a tɔɔ́ wɔ áyóp,
eé fonan ya é Mwán Mot.
A belé korona koŋ á nló weñ,
é wéá weñ wá fe ya akáp mkpárá.
15 Ané ángel mfé a ngá kwíñ á templo été,
eé yónán ya éñí á mbé a tɔɔ́ á nkút áyóp ná:
“Sámŋe mkpárá we ná o yoo;
é tám bá yoo é kwíñ yaá,
é dzóm bá yoo dá é ntɔɔ́ fe ewólo.
16 Éde éñí á mbé a tɔɔ́ á nkút áyóp a ngá baa mkpárá weñ ó sí,
ané sí e ngá tɔbɔ nyoann.
17 Véa éñe ángel mfé a ngá bera kwíñ á templo é ne á dzóp,
a belé fe akáp mkpárá.
18 Ané mfé ñí a ngá kólo altar,
a belé nguu edzwée ébe ndúán;
éde a ngá lwée ya mora kíŋŋ éñí á mbé a belé akáp mkpárá,
eé dzó ñí ná,
“Sámŋe é nzwaokeŋ dwe ná ó ñɔŋ bisaŋle bíye á ndzík vino bíye ó sí,
amú ná bíbumá byeñ bí ntɔɔ́ biwólo.”
19 Véa éñe ángel a ngá baa mkpárá weñ ó sí,
á ŋga ñɔŋ bibumá bí ndzík vino bíye ó sí,
ané a ngá wea byɔ á mora ekiliga ye á meyéá Nzamá été.
20 Éde bé ngá tsibi ekiliga te á kísoan átán,
ané mekií mé ngá kwíñ akekwíñ ákofet ménu mikalbeñ ntéññ táŋ ané mekwá mitet mí léa (300 km).