Bibibiñ bétsít bí beáñ
13
Éde me ngá yén ebibiñ tsít deé kwíñ á máŋ été,
é belé awóm mila ya miló zaŋgbéá;
á mila áyóp,
awóm bekorona bé diadema;
á miló áyóp ñí ya éyola abyann.
2 Ebibiñ tsít me ngá yén é ngá fonan ya ondɔ́ŋŋ,
mébɔ meñ má amvála ané émá oláábe,
anu deñ dá ané édí mgbemgbem.
Éde dragón e ngá vé ñí é nguu deñ ya étɔɔ́ edzwée deñ ya bora nguu edzwée.
3 Ané me ngá yén nló mbɔ́ɔ́ ye á míló myeñ ó tɔɔ́ ya avéŋŋ áwú;
ve ávéŋŋ awú deñ te,
daá let.
Véa éñe eniŋ ngúrá é ngá ku avoó,
é ŋga bee ebibiñ tsít.
4 Éde bé ngá kaŋ dragón,
akála ná daá vé ebibiñ tsít nguu edzwée;
bé ŋga kaŋ fe ebibiñ tsít,
béé dzó ná,
“Nzá aa vegan ya ebibiñ tsít,
nzá ki a ne bɔ melúmán bá ñí?”
5 Ané bé ngá vé ñí anu ná á kɔ́bɔ bora bifíá ya meteá,
bé vé fe ñí nguu edzwée ná á belan ya dɔ táŋ ngwan mewóm mé nii ya ngwan é beáñ (42).
6 Véa éñe a ngá ndama ánu deñ,
ná aa tea Nzamá ya éyola deñ ya étɔbɔga deñ ya fe ébá bé tɔɔ́ á dzóp été.
7 Éde bé ngá vé ñí ná á bɔ melúmán ya mifúfúp mí bot ya áwún bɔ́;
bé vé fe ñí nguu edzwée ébe meyɔŋ mése ya meá mése ya mikɔ́bɔ míse ya bot bése.
8 Véa,
é bot bése bé tɔɔ́ éniŋ ngúrá bá ye ñí kaŋ,
ébá bíyola byeba byéé ndzí tɔbɔ ntsilann ábá ye éniŋ átée ye eniŋ é ngá tɔbɔ mvelann,
ábá é ne édí Mwann Ntómá bé ngá tára kík.
9 Ngé mot enziŋ a belé melɔ́,
á béágé!
10 Ngé mot enziŋ a ne ná aa yian ke á mikómm,
aa ye fá ke á mikómm.
Ngé mot enziŋ a ne ná
aa yian wú ya nzwaokeŋ,
aa ye fá wú ya nzwaokeŋ.
Édzíp ya mbwínánn mifúfúp mí bot édɔ dí.
Ebibiñ tsít efé dá kwíñ á sí été
11 Éde me ngá yén ebibiñ tsít efé deé kwíñ á sí été,
é belé mila mí beáñ,
mií fonan ya émí mwann ntómá,
ve deé kɔ́bɔ amvála ané dragón.
12 Ané a ngá belan ya é nguu edzwée ése ebibiñ tsít ósúá ébe á mfá weñ.
Á ŋga bɔ fe ná,
eniŋ ngúrá ya é bot bé ne été bé kaŋ ebibiñ tsít ósúá,
édí ávéŋŋ áwú deñ é ngá let.
13 Véa á ŋga bɔ fe bora biyágán mendem,
akekwíñ ná atwaa ndúán da aa bɔ ná eé sɔ́ á dzóp é ŋga sigi ó sí,
á bot été.
14 Ya mendem méte,
émá baá lík ñí ná á bɔ ébe ású ebibiñ tsít,
á ŋga duk ya mɔ é bot bé tɔɔ́ éniŋ ngúrá;
deé dzó bot béye éniŋ ngúrá ná bé bɔ éyemá ebibiñ tsít,
édí é mbé é belé avéŋŋ nzwaokeŋ,
ya fe ná é bera tɔbɔ ntétéá.
15 Éde bé ngá lík ñí ná á vé eyemá eniŋ;
á mfá ye ná éyemá ebibiñ tsít é kɔ́bɔ ya fe áywíñ é bot bése bá bɔ kaa ákaŋ éyemá ebibiñ tsít.
16 Véa aa bɔ fe ná bésesé,
abobot ya bora bé bot;
mikúkúmm ya mitétéññ,
filí bot ya aloá,
bé vé bɔ́ ndem á wéá méyóm ngé ki á tételé ású.
17 Ya fe ná,
mot enziŋ a táa kus ngé ki ákuan,
fáve éñí a belé ndem:
Éyola ebibiñ tsít,
ngé ki é nɔmɔ ye éyola deñ.
18 Ó vá éñe fak e ne:
É mot a ne ya osímánn á láŋŋe é nɔmɔ ebibiñ tsít;
akála ná nɔmɔ a ne éñí mot,
nɔmɔ te a ne mitet mí saman ya mewóm mé saman ya bé saman (666).