Bá yén Miningá ya Dragón
12
Éde mora ndem e ngá léreban á dzóp été:
miningá a baga nlódzóp,
ngomdan da mébɔ meñ ásí,
á nló weñ áyóp wá fe ya é korona e ne ya atéteñ awóm ya á beáñ.
2 Miningá te a mbé abum,
á ŋga tat ya mitéñ mí myeé ya endáglé ná aa byéñ.
3 Ané ndem fé e ngá bera léreban á dzóp été:
véa,
mora evélé dragón,
é belé miló zaŋgbéá ya awóm mila,
ya bekorona bé diadema zaŋgbéá bá á miló myeñ áyóp;
4 éde ya é ngémm deñ,
á ŋga dulu é ngap léa ye átéteñ ye á dzóp,
eé wea dɔ á sí.
Ané dragón e ngá ke tébe é miningá á mbé ná á ŋga byéñ yaá ósú,
á mfá ye ná niané aa byéñ,
aa min é mwán weñ.
5 Éde a ngá byéñ mwán fám,
éñí a ntɔɔ́ ná aa dzwée meyɔŋ mé bot mése ya ntúmm ekyeñ;
ané bé ngá dzíga bét ya é mwán miningá te akekwíñ ya ñí ébe Nzamá ya étɔɔ́ édzwée deñ.
6 Véa miningá ñí a ngá túp,
a kéñ éyáŋŋ été,
é vóm Nzamá a ngá koman á mfá ye ná bé baale ñí ó wéñ táŋ melú enzuk ya melú mitet mí beáñ ya melú mewóm mé saman (1,260).
7 Ané alúmán é ngá laa á dzóp été:
Miguel bábe é baángel beñ bé ŋga lúman ya dragón;
dragón te da é ŋga lúman fe ya bɔ́ bábe é baángel beñ.
8 Ve bĕé mbé ya nguu ná bé wún,
véa ébɔ́ kaa ki fe bera ákoan ya afóo á mfá weba á dzóp été.
9 Néa éñe bé ngá tsílán ya mora dragón,
nnomm ñó ó ne eyola ná Déble ya Sátan;
éñí aa duk eniŋ ngúrá.
Éde bé ngá wea ñí á sí,
ya é baángel beñ bá bé wea fe á sí bábe bɔ́.
10 Ané me ngá wók mora kíŋŋ á dzóp été,
deé dzó ná,
“Éndagá éñe akoroga é sɔ́ yaá,
ya nguu,
ya édzwée ngɔ́mán é Nzamá wea,
ya fe é nguu edzwée é Kristo weñ;
amú ná é mot bisɔ́mán bɔbédzaŋ,
éñí aa sóman bɔ́ ású Nzamá alú ya omos,
bé tsílán yaá ya ñí.”
11 “Véa,
bé wún yaá ñí ya mékií mé Mwann Ntómá
ya fe éfíá ye é ngañiá weba;
éde fe bé ngá bɔ kaa dziŋ bíniŋ ya akekwíñ áwú.”
12 “Ya dzam te édɔ sánŋán,
dzóp ya ébá bése bé tɔɔ́ dɔ été.
Ve,
Ngwáa ya ébá bé tɔɔ́ ósí ya ó máŋ!
Amú ná déble a sigi yaá ó sí ya bora meyéá,
eé yem ná,
a lígi yaá ñí fáve oyomm abɔ́ŋŋ tám.”
13 Niané dragón e ngá yén ná bé wea yaá ñí á sí,
véa á ŋga dzéŋ miningá ásí,
éñí a ngá byéñ mwán fám.
14 Éde bé ngá vé miningá méfaáp mé beáñ mora ndwiñ,
á mfá ye ná á kólo ébe ású ñó,
eé yéle éyáŋŋ été,
é vóm bá baale ñí tám enziŋ,
metám ya etun tám.
15 Ané ñó ébe ánu deñ,
e ngá kúlu miningá mendzímm á mvús amvála ané oswíñ,
á mfá ye ná nden é ke ya ñí.
16 Éde sí e ngá vwála miningá,
ané sí e ngá kúu ánu deñ,
e min óswíñ dragón e ngá kúlu ánu deñ.
17 Éde Dragón e ngá yéá ya miningá,
ané e ngá kólo ná da ke bɔ alúmán ya mébukga mé bot mevɔ́ɔ́ méye é mvɔŋ bot dzeñ,
ébá bá baale memvéná mé Nzamá,
bé belé fe é ngañiá Yesus.
18 Ané a ngá tébe á nsá máŋ.