Bevé ngañiá bé beáñ
11
Éde bé ngá kee ma ovakga elé weé fonan ya ntúmm,
véa bé dzó ma ná:
Tébegé,
vakge é Templo Nzamá,
ya altar,
ya fe ébá bá kaŋ été
2 Ve,
veagé é yát é ne á Templo átán,
o táa dɔ vak;
amú ná bé kee yaá dɔ meyɔŋ mefé,
má má ye fe tsíble mfúfúp kísoan táŋ ngwan mewóm mé nii ya ngwan é beáñ (42).
3 Véa ma ye mánan bévé ngañiá bam bé beáñ ná,
bé kúlu medzó táŋ melú enzuk ya melú mitet mí beáñ ya melú mewóm mé saman (1,260),
bé baga bitóp méyep.”
4 (Ébá béte ébɔ́ bé ne bilé bí álíba bí beáñ ya fe bibele miduná bí beáñ bé téle ású Ntí a ne ya sí.)
5 Éde ngé mot enziŋ aa kómo bɔ́ bábá,
ndúán da kwíñ ánu deba,
é ŋga dzéá mínzínzíŋŋ myeba;
néa éñe é mot áse aa kómo bɔ́ bábá aa yian wú.
6 Ébá béte bé belé nguu edzwée ná bá dzip dzóp,
á mfá ye ná mveŋ e táa nɔ́ŋ ébe mélú méye á nkúlánn medzó weba;
bé belé fe nguu edzwée ébe mendzímm á mfá áveŋan mɔ mekií,
ná bé bábá sí ya ebúúbúu áse,
ébe é tám áse bá kómo dɔ ábɔ.
7 Niané bé mana yaá dzálá mvéán ngañiá weba,
ébibiñ tsít da sɔ́ édwá dzíbi ósí,
dá ye bɔ melúmán ya bɔ́,
véa da ye bɔ́ wún,
e ywíñ fe bɔ́.
8 Véa míbim myeba myá ye bómo á nseŋ mora kísoan,
éwí bá lwée á nsísim été ná Sodoma ya Égipto,
vóm mbɔ́ɔ́ te fe éñe bé ngá ywíñ Ntí weba á krús.
9 Éde,
bot béé sɔ́ á meá,
ya á meyɔŋ,
ya á mikɔ́bɔ,
ya á meyɔŋ mefé,
bá ye yén míbim myeba táŋ mélú mé léa ya etun;
băá ye lík ná míbim myeba mí tɔbɔ ndzepbann.
10 Ané bot béye á sí mifá mí nii bá ye sán,
bé ŋga bɔ mefét,
bé ŋga lóman fe bedás,
bevɔ́ɔ́ ya ébá bevɔ́ɔ́;
akála ná bekúlu medzó bé beáñ béte,
bé ngá ndágle ébá bé tɔɔ́ á sí mifá mí nii ya mitéñ.
11 Éde,
niané melú mé léa ya etun mé lot yaá,
véa éñe nsísim eniŋ wá sɔ́ ébe Nzamá ó ngá ñíi ébe bɔ́,
ané bé ngá tébe ya mébɔ meba,
éde mora wɔŋŋ ó ngá bíra biñ ébá bé ngá yén bɔ́.
12 Ané bé ngá wók mora kíŋŋ ye á dzóp eé dzó bɔ́ ná,
“Bétgán ó ná.”
Éde bé ngá bét á dzóp á nkút été,
mínzínzíŋŋ myeba mií yén bɔ́.
13 Áwola te ébyen éñe bora mifógán mí sí mí ngá bɔban,
véa éñe é ngap awóm ye á kísoan e ngá mana ku ó sí,
ané bot táŋ binzuk zaŋgbéá (7,000) bé ngá mana wú ya mifógán mí sí míte;
éde mébukga mé bot mevɔ́ɔ́ ya ekɔ wɔŋŋ,
bé ŋga vé Nzamá ye á dzóp dúmá.
14 É ngwáa beáñ,
á lot yaá;
ve éñí léa,
á nkún sian.
Élɔ́ŋŋ tɔ́ŋ zaŋgbéá
15 Éde ángel zaŋgbéá a ngá lɔ́ŋ tɔ́ŋ,
ané bora mekíŋŋ mé ngá sɔ́ á dzóp été ná,
“Bidzwée bí ngɔ́mán bíye é sí ñí,
bí veŋan yaá ébí Ntí wea,
ya ébí é Kristo weñ;
éñe aa ye dzwée kɔ́mm ya kɔ́mm.”
16 Véa éñe bétébosú mewóm mé beáñ ya bé nii bé mbé bé tɔɔ́ bítɔɔ́ bídzwée byeba ósú Nzamá bé ngá ku ya mésú meba búrúburu,
bé ŋga kaŋ Nzamá;
17 béé dzó ná,
“Á Ntí,
é Nzamá a ne ya Nguuése,
bía vé wa akíba;
éñí a ne,
éñí a mbé,
[éñí fe a ne ná aa nzu],
akála ná o ñɔŋ yaá é mora nguu dwe,
o tára yaá fe ná wa dzwée.
18 Éde meyɔŋ mé bot mé ngá mana tɔbɔ ya olúnn.
Véa,
méyéá mwe má mé sɔ́ yaá;
ya é tám wa kík bewú misaŋ,
ya fe ávé áloá dwe bekúlu medzó meyáán,
ya mifúfúp mí bot,
ya ébá bá kɔ éyola dwe wɔŋŋ,
ané bwann bé bot ané bora bé bot;
ya fe átsam ébá bá tsam sí mifá mí nii.”
Éwála ye élat
19 Ané é templo Nzamá e ne á dzóp été e ngá kúuban,
véa éwála ye élat deñ dá é ŋga yéne fe á templo deñ été.
Éde bevéveés bé ngá bɔ,
ya mekíŋŋ,
ya bendzáláŋ,
ya mifógán mí sí,
ya bora metééga.