Élɔ́ŋŋ tɔ́ŋ tán
9
Éde ángel tán a ngá lɔ́ŋ tɔ́ŋ,
ané me ngá yén otéteñ wá kóbo á dzóp été ye ánzu ku á sí,
éde bé ngá kee ñí edzipga ye étam ye édwá dzíbi.
2 Ané a ngá kúu etam ye édwá dzíbi;
véa,
otsírá ó ŋga kwíñ étam été,
amvála ané otsírá ye á mora mbak ndúán.
Éde nlódzóp ya nyem dzóp bí ngá tɔbɔ ó dzíbi ósí ya ótsírá ó ngá kwíñ étam été.
3 Véa éñe ébe ótsírá été,
bitandá bíye ó sí bí ngá kwíñ,
ané bé ngá vé byɔ nguu edzwée,
amvála ané éñí bekáráolere béye ó sí bé belé.
4 Éde bé ngá dzó bɔ́ ná bé táa bábá bilwá bíye ó sí,
ngé dzóm ése ye é ne nsínn mendzaá ngé ki elé ése;
ve fáve bot etámm,
ébá béye bé ne kaa é sitám Nzamá á mesú.
5 Véa,
kaa bɔ́ lík ná bé ywíñ bɔ́;
ve fáve á vé bɔ́ bindáglé ya mitéñ táŋ ngwan é tán;
mitéñ myeba myá ané émí káráolere éyɔŋ aa lóp mot.
6 Éde melú méte bot bá ye dzéŋ awú,
ve bá kaa koan ya dɔ;
bá ye kómo ná bé wú,
ve awú dá dá ye bɔ́ túp.
7 Véa,
éfonann bitandá é mbé ané míkalbeñ mí ntɔɔ́ nkomann á mfá alúmán;
á miló myeba myá ané bekorona bé koŋ;
mésú meba má amvála ané mesú mé bot;
8 esií dá é mbé bɔ́ amvála ané édí biningá;
mésoŋŋ meba má mé mbé amvála ané émá bemgbemgbem.
9 Bé mbé fe bé belé biben amvála ané biben bikyeñ;
éduŋŋ méfaáp meba dá ané éduŋŋ bíkálík abwiññ mikalbeñ myá dulu mbíí álúmán.
10 Véa,
bí mbé bí belé mengémm ané bekáráolere,
ya misɔŋ;
mengémm méte émɔ mé ne ya nguu ye ándágle bot táŋ ngwan é tán.
11 Ángel ye édwá dzíbi éñe bé belé ané é kéza aa dzwée bɔ́;
éyola deñ á nkɔ́bɔ Ebreo é ne ná Abadón (Ntsamann),
á nkɔ́bɔ Griego ñí a ne eyola ná Apolión (Ntsam).
12 É ngwáa ósúá á lot yaá.
Dággé!
Bengwáa bé beáñ befé bé ngén bá nzu,
niané é mam má má lot.
Élɔ́ŋŋ tɔ́ŋ saman
13 Éde ángel saman a ngá lɔ́ŋ tɔ́ŋ,
ané me ngá wók kíŋŋ fɔ́ɔ́ deé kwíñ énzénzaŋ mila míye áltar koŋ é ne ású Nzamá,
14 deé dzó ángel saman a mbé a belé tɔ́ŋ ná,
“Tsiigé é baángel bé nii bé ne nkáán á mora oswíñ Ewúfrates.”
15 Ané bé ngá tsii é baángel bé nii bé mbé bé tɔɔ́ nkomann á mfá áwola,
mos,
ngwan ya fe mbú,
ná bá ywíñ é ngap bot léa.
16 Véa,
é nɔmɔ benzima béye á míkalbeñ áyóp,
a mbé táŋ baakúru mitet mí beáñ (200,000,000).
17 Néa éñe me ngá yén á nléránn ye á nsísim,
mikalbeñ ya ébá bé mbé bé tɔɔ́ myɔ áyóp,
bé belé biben nsínn ndúán,
nsínn dzóp,
ya nsínn mfoó;
miló mikalbeñ myá ané miló bemgbemgbem;
ménu meba má ndúán da kwíñ ya otsírá ya efit.
18 Véa éñe é ngap bot léa e ngá wú ya bíbúúbúu bí léa bíte;
ya ndúán,
ya otsírá,
ya fe efit.
19 É ne ná é nguu edzwée mikalbeñ éñe e ne ánu deba ya á mengémm meba;
amú ná mengémm meba má fonan ya beñó bé belé miló,
miló míte émyɔ bé ngá bábá ya myɔ.
20 Ané mébukga mé bot mevɔ́ɔ́,
ébá bé ngá bɔ kaa wú ákála bíbúúbúu bíte,
bĕé ndzí dzoban ébe mibɔann míye é mó meba,
bĕé ndzí ki dzɔgɔ ná bá kaŋ bembéa misísim ya biyemá bí koŋ,
ébí bí ngoós,
ébí bí zíiŋ,
ébí bí ákwá,
ya ébí bí élé,
ná bí sés yén,
ngé áwók ngé ki áwulu;
21 bĕé ndzí dzoban ébe nywíán bot weba,
ngé mevalan meba,
ngé nsémm éveák weba,
ngé ki é dzíp weba.