3 Véa éñe ángel mfé a ngá sian,

a kéñ tébe áltar á mféŋŋ ya ebyetga koŋ mbwánn enum.

Éde bé ngá vé ñí abwiññ mbwánn enum,

ná á kɔgle wɔ á meyaglán mítɔ́pbán mí bot míse,

áltar koŋ áyóp é mbé ású etɔɔ́ édzwée.

4 Ané é wéá ángel,

otsírá mbwánn enum ó ngá bét ósú Nzamá ya méyaglán mítɔ́pbán mí bot.

5 Éde ángel a ngá ñɔŋ ebyetga mbwánn enum,

a dzálá dɔ ya ndúán ye áltar,

ané a ngá wea dɔ á sí,

ané bendzáláŋ,

ya mekíŋŋ,

ya bevéveés,

ya mfógán sí bí ngá bɔ.

6 Véa éñe é baángel zaŋgbéá bé mbé bé belé metɔ́ŋ zaŋgbéá bé ngá tɔbɔ nkomann ná bá lɔ́ŋ mɔ.

7 Éde éñí ósúá a ngá lɔ́ŋ tɔ́ŋ,

ané metééga ya ndúán bí tɔɔ́ mfulán ya mekií bí ngá bɔ,

éde bé ngá kúp byɔ á sí;

ané mfá léa ye á sí ngúrá ó ngá tɔbɔ ntumá;

éde é ngap léa ye á bilé bíse e ngá tɔbɔ ntumá,

bílwá bíse byá bí mana fe dzík.

8 Ané ángel beáñ a ngá lɔ́ŋ tɔ́ŋ,

véa éñe dzóm ané mora nkoó,

weé yóŋ ya ndúán bé ngá wea dɔ á máŋ été;

éde mfá máŋ léa ó ngá veŋan mekií.

9 Ané é ngap léa ye á byém bíse bí ne á máŋ été e ngá mana wú;

éde é ngap léa ye á byéa áse da e ngá mana fe tɔbɔ ntsamann.

10 Ané ángel léa a ngá lɔ́ŋ tɔ́ŋ,

véa éñe mora otéteñ weé yóŋ ó ngá kóbo á dzóp été,

amvála ané nduná,

ó kpéñ é ngap léa ye áswíñ áyóp,

ya méfɔ́m mendzímm áyóp.

11 (Eyola otéteñ te é ne ná Ayoo).

Éde é ngap léa ye á mendzímm e ngá veŋan ayoo;

ané abwiññ bot é ngá mana wú ákála mendzímm méte,

amú ná má súgan bɔ ayoo.

12 Éde ángel nii a ngá lɔ́ŋ tɔ́ŋ,

véa éñe mfá léa ye á nlódzóp ó ngá tɔbɔ mbábánn,

ya mfá léa ye á ngomdan,

ya fe mfá léa ye átéteñ,

ná mfá léa ye á byém bíte ó bɔ ya dzíbi.

Ané é ngap léa ye á mos é ngá tɔbɔ kaa eyéá,

ya fe é ngap léa ye álú.

13 Éde me ngá dága,

me wók ndwiñ [ngé ángel] deé yéle á yóp été,

deé dzó ya mora kíŋŋ ná,

“Ngwáa,

ngwáa,

ngwáa ya ébá bé tɔɔ́ á sí,

ákála bí lɔ́ŋ bí tɔ́ŋ bivɔ́ɔ́ bí ngén byá dzéŋ,

ná é baángel bevɔ́ɔ́ bé ntɔɔ́ ná bé nkún lɔ́ŋ!”