Mitɔ́pbán mí bot 144,000
7
Nia véa,
éñe me ngá yén baángel bé nii bé téle á mifá mí nii míye á sí,
béé biñ bivúŋ bí nii bíye á sí,
á mfá ye ná evúŋ enziŋ é táa lot á sí,
ngé á máŋ áyóp,
ngé ki élé enziŋ áyóp.
2 Éde fe me ngá yén ángel mfé eé bét é vóm nlódzóp wá tée,
a belé é sitám é Nzamá a ne ntétéá;
ané a ngá yónán ya mora kíŋŋ ya é baángel bé nii bé ngá vé nguu ye ábábá sí ya máŋ,
ná,
3 “Míní táa bábá sí ngé máŋ ngé ki bilé,
akekwíñ ané bía mana vé áloá é Nzamá wea besitám á mesú meba.”
4 Ané me ngá wók é nɔmɔ ébá bé ngá tɔbɔ ya mvéán sitám;
ntet binzuk ya binzuk mewóm mé nii ya binzuk bí nii (144,000) béye ébá bé ngá ñɔŋ besitám ébe ayɔŋ áse ye bwán bé Israel:
5 Ébe áyɔŋ Judá,
awóm binzuk ya binzuk bí beáñ (12,000);
béye ébá bé ngá ñɔŋ besitám;
ébe áyɔŋ Rubén,
awóm binzuk ya binzuk bí beáñ (12,000);
ébe áyɔŋ Gad,
awóm binzuk ya binzuk bí beáñ (12,000);
6 ébe áyɔŋ Aser,
awóm binzuk ya binzuk bí beáñ (12,000);
ébe áyɔŋ Neftalí,
awóm binzuk ya binzuk bí beáñ (12,000);
ébe áyɔŋ Manasés,
awóm binzuk ya binzuk bí beáñ (12,000);
7 ébe áyɔŋ Simeón,
awóm binzuk ya binzuk bí beáñ (12,000);
ébe áyɔŋ Leví,
awóm binzuk ya binzuk bí beáñ (12,000);
ébe áyɔŋ Isakar,
awóm binzuk ya binzuk bí beáñ (12,000);
8 ébe áyɔŋ Zabulón,
awóm binzuk ya binzuk bí beáñ (12,000);
ébe áyɔŋ José,
awóm binzuk ya binzuk bí beáñ (12,000);
ébe áyɔŋ Benjamín,
awóm binzuk ya binzuk bí beáñ (12,000);
Bot béye mesí mése
9 Nia véa,
ané me ngá dága,
me yén mora nkuna bot,
éwí mot enziŋ ĕé mbé láŋ,
weé sɔ́ ébe mesí mése,
ya meyɔŋ,
ya meá,
ya mikɔ́bɔ,
bé téle ású étɔɔ́ edzwée ya ású Mwann Ntómá,
bé baga mifúm bilíŋŋá ya fe mitem mélénn é mó meba.
10 Bé ŋga yónán ya mora kíŋŋ,
béé dzó ná,
“Akoroga ya é Nzamá wea
a tɔɔ́ étɔɔ́ édzwée ya fe Mwann Ntómá.”
11 Véa baángel bése bé mbé bé téle béé boman etɔɔ́ édzwée ya bétébosú ya mitétéá bíniŋ mí nii;
éde bé ngá ku ya mesú búrúburu ású etɔɔ́ édzwée,
bé ŋga kaŋ Nzamá,
12 béé dzó ná,
“Amén!
Olugú ya dúmá,
ya kén ya mvéán akíba,
ya ngaŋŋ ya nguu edzwée ya nguu
bí ne ébí é Nzamá wea
kɔ́mm ya kɔ́mm!
Amén!”
13 Éde mot mbɔ́ɔ́ ye á betébosú a ngá síli ma ná,
“É bot bé baga mifúm bilíŋŋá bá,
bé ne benzá?
Bá sɔ́ ki ó vé?”
14 Ané me ngá yalan ya ñí ná,
“Á ndzwée wɔm,
wa wa yem dɔ.”
Véa ñí a ngá dzó ma ná:
“Ébá bé ne é bot bá sɔ́ á bora bíndáglé été;
baá sop bílíŋŋá byeba,
baá bɔ fe byɔ mifúm á mekií mé Mwán Ntómá été.”
15 Dzam te édɔ bé téle ya dɔ ású étɔɔ́ édzwée Nzamá,
bá séan fe ya ñí alú ya omos á Templo deñ été.
Éde éñí a tɔɔ́ ósí étɔɔ́ édzwée te,
aa búru bɔ́ áyóp é templo deñ.
16 Băá ye wók nzeñ eyɔŋ enziŋ,
ngé ábera wók evéé;
viann nlódzóp wá wăá ye ki bɔ́ bera ku áyóp,
ngé ayóŋ enziŋ,
17 amú ná é Mwán Ntómá
a ne énzénzaŋ étɔɔ́ édzwée
aa ye bɔ́ baale,
eé ke ya bɔ́ á mefɔ́m betétéá mendzímm;
éde Nzamá aa ye bɔ́ fími
míige mése méye é mís meba.”