Átsii mikɔɔ́
6
Éde me ngá yén ané Mwann Ntómá aa tsii nkɔɔ́ mbɔ́ɔ́ ye á mikɔɔ́ zaŋgbéá,
véa éñe me ngá wók ntétéá eniŋ mbɔ́ɔ́ ye á mitétéá bíniŋ mí nii weé dzó ya kíŋŋ ané ndzaláŋ ná,
“Nzaá áyén!”
2 Éde me ngá dága,
me yén mfúm nkalbeñ,
éñí a mbé aa tɔɔ́ wɔ áyóp,
a mbé a belé mban;
ané bé ngá vé ñí korona,
éde a ngá kólo á kéñ ané medaŋ á mfá ye ná aa ke aa wún.
3 Niané a ngá tsii nkɔɔ́ beáñ,
ané me ngá wók ntétéá eniŋ beáñ wá dzó ná,
“Nzaá!”
4 Véa éñe nkalbeñ ofé ó ngá kwíñ,
evélé ané ndúán;
éde éñí a mbé a tɔɔ́ wɔ áyóp bé ngá vé ñí ná á vea etɔɔ́ mvwaá é sí ñí,
á mfá ye ná bevɔ́ɔ́ ya ébá bevɔ́ɔ́ bé ywíán;
ané bé ngá vé fe ñí mora nzwaokeŋ.
5 Niané a ngá tsii nkɔɔ́ léa,
éde me ngá wók ntétéá eniŋ léa wá dzó ná,
“Nzaá!”
Vea éñe me ngá dága,
me yén nsút nkalbeñ;
éñí a mbé wɔ áyóp,
a mbé a belé ado é wéá weñ.
6 Éde me ngá wók dzóm enziŋ ané kíŋŋ,
énzénzaŋ mitétéá bíniŋ mí nii été,
deé dzó ná,
“litro trigo mbɔ́ɔ́,
ngé ki belitro bé sebada bé léa táŋ denario mbɔ́ɔ́;
ve o táa ywíñ mbwánn ya vino ntuk.”
7 Niané a ngá tsii nkɔɔ́ nii,
ané me ngá wók ntétéá eniŋ nii wá dzó ná,
“Nzaá!”
8 Éde me ngá dága,
me yén nkalbeñ ané nsínn mfoó,
éñí a mbé wɔ áyóp,
éyola deñ é ne ná Awú,
sí békónn da é ŋga bee fe ñí á mvús;
ané bé ngá ve ñí nguu edzwée ébe é ngap nii ye é sí ñí,
á mfá ye ná áywíñ bot ya mora nzwaokeŋ,
ya nzeñ,
ya awú,
ya fe bétsít béye áfan ye é sí ñí.
9 Niané a ngá tsii nkɔɔ́ tán,
véa éñe me ngá yén áltar métúnŋa ásí,
mísísim míye ébá bé ngá ywíñ ákála éfíá Nzamá ya é ngañiá bé ngá vé;
10 béé yónán ya mora kíŋŋ béé dzó ná,
“Á Ndzwée,
Mfúfúp ya bébélá mot!
Ye akekwíñ ódén wa ye yana ná ó kun mékií mea ébe ébá béye bé tɔɔ́ é sí ñí?”
11 Éde bé ngá vé kada mot ye ébe bɔ́ mfúm elíŋŋá,
bé dzó fe bɔ́ ná bé bera waabe oyomm abɔ́ŋŋ tám,
ya akekwíñ ané é nɔmɔ áloá avɔ́ɔ́ ané ébɔ́ ya bɔbéñaŋ,
ébá bá bé ngá yian fe tɔbɔ nywíñán ntéññ mbɔ́ɔ́ ané ébɔ́ aa ye tɔbɔ ndzálánn.
12 Maá yén éyɔŋ a ngá tsii nkɔɔ́ saman,
véa éñe bora mí fógan mí sí mí ngá bɔban,
nlódzóp ó ŋga ke wá veŋan nsút ané nsút etóp,
ngomdan ngúrá da é ŋga ke fe da veŋan ané mekií;
13 éde átéteñ ye á dzóp été é ngá ku ó sí amvála ané elé Igera dá súgan bíbumá byéñ bí ne ndann é tám mora evúŋ dá suk dɔ.
14 Véa dzóp é ŋga ke dá dzáŋ amvála ané áfép bá vígile,
éde nkoó ya etuŋŋ bíse bí ngá kólo bítéññ byeba.
15 Ané békéza béye é sí ñí,
ya bora bé bot,
ya bekomandée,
ya mikúkúmm,
ya biwólo bí bot,
ya oloá óse ya filí mot bé ngá ke bá sɔbɔ méndá mekwá été ya mékóm míkoó été;
16 béé dzó mikoó ya mekóm ná,
“Kpáán bía áyóp!
Swalagán fe bía ébe ású ye éñí a tɔɔ́ étɔɔ́ édzwée ya ébe méyéá Mwann Ntómá.
17 Amú ná é bora mos ye méyéá meñ ó sian yaá!
Nzá a ne lígi átéle étéññ deñ?”