Mwann Ntómá aa kúu abá
5
Éde me ngá yén é wéá meyóm ye ébe éñí á mbé a tɔɔ́ ósí étɔɔ́ édzwée,
abá é tɔɔ́ ntsilann átán ya été,
mfetann ya mikɔɔ́ zaŋgbéá.
2 Ané me ngá yén ewólo ángel deé yónán ya mora kíŋŋ,
ná,
“Nzá aa ñep ya dɔ ná á tsii mikɔɔ́ ya ákúu abá?”
3 Kaa fe ya mot enziŋ á dzóp,
á sí,
ngé ki á sí été ná,
a ne kúu abá te ngé ki ádága dɔ été.
4 Véa mé ŋga bíra yi,
amú ná mot enziŋ ye aa ñep ya dɔ ĕé mbé ná a ne kúu abá ngé ki ádága dɔ été.
5 Éde mot mbɔ́ɔ́ ye bétébosú a ngá dzó ma ná,
“O táa yi!
Dággé!
Mgbemgbem ye áyɔŋ Judá,
é mvɔŋ David,
éñe a ne medaŋ á mfá ákúu abá te ya átsii míkɔɔ́ zaŋgbéá myeñ.”
6 Véa,
énzénzaŋ mitétéá bíniŋ mí nii ya étɔɔ́ edzwée,
ya fe énzénzaŋ betébosú,
éñe me ngá yén Mwann Ntómá a téle,
amvála ané éñí bé ywíñ yaá.
A mbé a belé mila zaŋgbéá,
ya fe mís zaŋgbéá;
ébá béte ébɔ́ bé ne mísísim zaŋgbéá Nzamá aa lóm ébe sí áse.
7 Éde a ngá sɔ́,
a ñɔŋ abá é wéá meyóm ye ébe éñí á mbé a tɔɔ́ ósí étɔɔ́ édzwée.
8 Niané a ngá ñɔŋ abá,
ané mitétéá bíniŋ mí nii ya betébosú mewóm mé beáñ ya bé nii bé ngá ku búrúburu ébe ású Mwann Ntómá;
kada mbɔ́ɔ́ ye été a mbé a belé mvét ya mekɔ́p mé koŋ ndzálánn ya mbwánn enum,
émɔ mé ne méyaglán mítɔ́pbán mí bot.
9 Véa bé ŋga yee fe mfefeñ dzéá,
béé dzó ná,
“Wa ñep ya dɔ ná wa ñɔŋ ábá
ya átsii míkɔɔ́ myeñ.
Amú ná wa baá ywíñ,
o kus yaá fe bot
ya mékií mwe á mfá Nzamá,
béé sɔ́ ébe ayɔŋ áse,
ya ébe nkɔ́bɔ óse,
ya ébe bot bése,
ya ébe meyɔŋ mése.
10 O téle yaá fe bɔ́
amvála ané ngúrá edzwée ngɔ́mán befára;
á mfá é Nzamá wea,
bá bá ye fe dzwée é sí ñí.”
11 Ané me ngá dága,
éde me ngá wók é kíŋŋ abwiññ baángel étɔɔ́ édzwée á méféŋŋ,
ya fe o véa mitétéá bíniŋ,
ya betébosú;
é táŋ deba e mbé binzuk ya binzuk,
ya fe baakúru ya baakúru,
12 béé kɔ́bɔ ya mora kíŋŋ ná,
“É Mwann Ntómá bé ngá ywíñ
aa ñep ya dɔ ná,
á ñɔŋ nguu edzwée,
ya akúmm,
ya kén,
ya nguu,
ya dúmá,
ya olugú.”
13 Éde mvelann dzóm óse ó ne á dzóp été,
ya ó sí,
ya á sí été,
ya á máŋ été,
ya fe é byém bíse bí ne ébe bɔ́,
me ngá wók béé dzó ná,
“Ébe éñí a tɔɔ́ ósí étɔɔ́ édzwée,
ya ébe Mwann Ntómá,
á tɔbɔgé ya olugú,
ya ngaŋŋ,
ya dúmá,
ya ekán ébe kɔ́mm ya kɔ́mm.”
14 Ané mitétéá bíniŋ mí nii mí ngá dzó ná,
“Amén.”
Véa éñe betébosú mewóm mé beáñ ya bé nii bé ngá ku ya mésú meba búrúburu,
bé ŋga kaŋ éñí a ne ntétéá kɔ́mm ya kɔ́mm.