É fwéñ Éfeso
2
“Tsiligé ángel ye ékóánn bebwíni ye Éfeso ná,
Éñí a belé atéteñ zaŋgbéá é wéá meyóm weñ,
eé wulu fe énzénzaŋ bibele miduná bí koŋ été,
édí édɔ aa dzó ná:
2 “Ma yem míbɔann mywe,
ndzuúk éséññ we,
ya edzíp dwe;
ya ná o sés fe nzomo bembéa bé bot;
o kyak yaá fe ébá bá dzó ná bé ne baapostol,
ve ébɔ́ kaa dɔ,
o kóo yaá fe ná bé ne minéneá.
3 Ya fe ná o belé edzíp,
o dzuk yaá fe ákála éyola dam,
wa kaa ki ávwat.
4 “Ve me belé wa é dzam dí ná,
o dzɔgɔ yaá édziŋŋ dwe ye ósúsúá.
5 Éde,
símaŋán é vóm ó ku yaá,
dzobgán fe,
bɔɔ́ge míbɔann o ngá tára bɔ;
ve ngé se néa,
ma nzu ébe wa,
me vea ébele nduná dwe é vóm weñ,
ngé wa kaa ádzoban.
6 Afáŋbɔ néa,
o belé édí ná,
wa víni míbɔann Benikolaita,
émí ma ma víni fe.
7 “Éñí a belé melɔ́,
á béágé édí Nsísim aa dzó bíkóánn bébwíni.
Éñí a ne wún,
ma ye ñí vé ná á dzí ébumá élé ye éniŋ,
édí é ne é Paraíso Nzamá.
É fwéñ Ésmirna
8 “Tsiligé ángel ye ékóánn bebwíni ye Ésmirna ná:
Édí édɔ Atáraga ya Ámanaŋa aa dzó,
éñí a mbé nwúán,
ve a bera niŋ:
9 “Ma yem bindáglé bywe ya fe átéññ dwe (ve wa o ne nkúkúmm) ya é mvyan ébá bá dzó bé ne bejudio,
ve ébɔ́ kaa dɔ,
ve fáve é sinagoga Sátan.
10 O táa kɔ wɔŋŋ ébe édí o nkún nzu ádzuk.
Dággé ná,
déble aa ye dum bevɔ́ɔ́ benziŋ béye ébe mína á mbok,
á mfá ye ná míní yén mikat,
éde mína ye yén midzuúk táŋ awóm melú.
Ábɔ bébélá mot akekwíñ áwú,
véa éñe ma ye wa vé korona ye éniŋ.
11 “Éñí a belé melɔ́,
á béágé édí Nsísim aa dzó bíkóánn bébwíni.
Éñí a ne wún,
ăá ye dzuk ya áwú beáñ.”
É fwéñ á Pérgamo
12 “Tsiligé ángel ye ékóánn bebwíni ye á Pérgamo ná:
Édí édɔ éñí a belé nténdéŋ nzwaokeŋ ó tɔɔ́ ya nzep é beáñ aa dzó ná:
13 “Ma yem é vóm o tɔɔ́,
é vóm étɔɔ́ édzwée Sátan é ne,
o baale yaá éyola dam,
wăá bé ki kat mbwínánn wɔm;
atwaa mélú é bébélá mvé ngañiá wɔm Antipas,
éñe a ngá wú énzénzaŋ denan,
é vóm Sátan a tɔɔ́.
14 “Ve me belé wa ayomm mam menziŋ ná:
o belé ébá bá ke ya áyágalé Balaam ósú;
éñí a ngá vé Balak áyágalé ná ábɔ bwann bé Israel é dzóm bá kop ya dɔ obaá,
ya fe ná bé dzí é byém bé vé yaá biyemá metúnŋa ya fe ábɔ nsémm eveák.
15 Amvála te fe o belé ébá bá tsíni ósú ya áyágalé benikolaita,
[édí ma víni].
16 Édɔ ná,
dzobgán!
Ve ngé se néa,
ma dzíga nzu ébe wa,
ma ye fe lúman ya wa ya nzwaokeŋ ye ánu dam.
17 “Éñí a belé melɔ́,
á béágé édí Nsísim aa dzó bíkóánn bébwíni.
Éñí aa wún,
ma ye ñí vé é manná a swala,
ma ye fe ñí vé mfúm mwann akwá,
á mwann akwá te mfefeñ eyola ó tɔɔ́ ntsilann été,
édí mot enziŋ ăá yem fáve éñí aa ñɔŋ ñí.”
É fwéñ á Tiatira
18 “Tsiligé ángel ye ékóánn bebwíni ye á Tiatira ná:
É Mwán Nzamá,
éñí a belé mís ané nkaba ndúán;
mebɔ meñ má ané zíiŋ é ntɔɔ́ evélé ná ngumá,
édí édɔ aa dzó ná:
19 “Ma yem míbɔann mywe,
ya édziŋŋ dwe,
ya mbwínánn we,
ya éséññ Nzamá dwe,
ya édzíp dwe,
ya fe ná míbɔann míye ásúgánn mywe myá lot émí míye átáraga.
20 “Ve me belé wa édí ná:
wa vé Jesabel afóo,
é miningá aa dzó ná émyen a ne nkúlu medzó.
Aa vé áyágalé á ŋga lés fe ya bebɔ biséññ bam ná bé bɔ nsémm eveák ya ádzí é byém bé vé yaá biyemá metúnŋa.
21 Me vé yaá ñí tám ná á dzoban,
ve ñí ăá kómo dzoban ya nsémm éveák weñ.
22 “Dággé!
Ma wea ñí énɔŋŋ okwann,
ébá bá bá bɔ medzíán bábe bɔ́,
bá bora bindáglé,
ngé bá bɔ kaa dzoban ébe míbɔann myeñ.
23 É bwán miningá te bá ma ye bábá ya awú,
véa éñe bikóánn bebwíni bíse byá ye yem ná ma me ne éñí aa fas asímánn ya milém;
ma ye fe yáán ya kada mot ye ébe mína,
amvála ané míbɔann myenan mí ne.
24 “Ve mína,
é bot bevɔ́ɔ́ béye á Tiatira,
ébá bĕé belé ayágalé te (é bot băá bé yem bídwá Sátan,
ámvála bébyen bá lwée dɔ),
ma dzó mína ná,
măá bera mína vé mvaba fé.
25 Fáve ná,
édí míní belé,
belégán dɔ,
akekwíñ ané me ne sɔ́.
26 Éñí aa ye wún ya á dzálá míbɔann myám akekwíñ ásúgánn,
Ma ye ñí vé nguu edzwée ébe meyɔŋ.
27 Éde,
ñí aa ye fe mɔ dzwée ya ntúmm ekyeñ,
á ŋga bwíñ mɔ bifús ané bilas,
ámvála ma me ñɔŋ yaá fe ébe Tará.
28 Ma ye ñí vé otéteñ ye á biléne bí kírí.
29 “Éñí a belé melɔ́,
á béágé édí Nsísim aa dzó bíkóánn bébwíni.”