NLÉRÁNN
É Kálara Nléránn
Mvɔmm ya éñí aa láŋ
1
Nléránn Yesukristo,
éwí Nzamá a ngá vé ñí,
á mfá ye ná á kúlán áloá deñ é mam mé yian nzu bɔban nia avítsaŋ tám.
Éde a ngá lóm ángel weñ ná á kúlán mɔ óloá weñ Juan;
2 éñe a vé yaá éfíá Nzamá ngañiá ya é ngañiá Yesukristo ya fe éñí ye é mam mése a ngá yén.
3 Mvɔmm ya éñí aa láŋ,
ya ébá bá wók bifíá bíye á nkúlánn medzó,
bé dzálá fe édí é ne ntsilann été;
amú ná tám é ntɔɔ́ bebeñ.
Juan aa bérán ya bikóánn bébwíni zaŋgbéá
4 Ma Juan,
ébe bíkóánn bébwíni zaŋgbéá bí ne Ásia.
Abwará ya mína ya mvwaá ébe “éñí a ne”,
éñí a mbé,
éñe fe aa nzu;
ya fe mísísim zaŋgbéá mí ne ébe ású étɔɔ́ édzwée deñ;
5 ya fe ébe Yesukristo,
bébélá mvé ngañiá,
ntóó ye béwú,
ya ndzwée ye békéza béye é sí ñí.
Éñe aa dziŋ bía,
aá tɔɔ fe bía filí ébe mísémm myea ya mékií meñ.
6 Éñe aá téle bía ané ngúrá edzwée ngɔ́mán
ya befára á mfá Nzamá ya Éséá,
éñe á tɔbɔgé ya dúmá,
ekán kɔ́mm ya kɔ́mm!
Amén.
7 (Dággán ná,
á ŋga nzu yaá ya mikút,
dzís áse dá dá ye fe ñí yén,
atwaa ébá bé ngá dzii ñí akɔŋŋ;
meyɔŋ mése méye é sí ñí
má má ye fe tɔbɔ éywiññ été ákála deñ.
Ãá.
Amén!
8 “Ma me ne Alfa ya fe Omega,”
néa éñe Ntí Nzamá aa dzó.
Éñe a ne,
éñe a mbé,
éñe fe aa nzu,
éñí a ne ya Nguuése.”
É Mwán Mot aa yéne ébe Juan
9 Ma Juan,
mwanñɔŋ wenan ya ñɔŋngap fufúlu ye á midzuúk,
ye édzwée ngɔ́mán,
ye édzíp ébe Yesus,
me mbé étuŋŋ bá lwée ná Patmos ákála éfíá Nzamá ya fe ákála é ngañiá Yesus.
10 Me tɔɔ́ á nsísim été é mos Ntí,
éde me ngá wók mora kíŋŋ é mvús dam amvála ané tɔ́ŋ,
11 deé dzó ná:
“Tsiligé é mam wa yén ábá,
o lóm fe mɔ á bikóánn bebwíni zaŋgbéá;
Éfeso,
ya Ésmirna,
ya á Pérgamo,
ya á Tiatira,
ya á Sardis,
ya á Filadelfia,
ya fe á Laodisea.”
12 Véa éñe me ngá veŋan ná me yén é kíŋŋ e ngá kɔ́bɔ ya ma.
Niané me ngá veŋan,
ané me ngá yén bibele miduná bí koŋ zaŋgbéá;
13 éde mot enziŋ a mbé énzénzaŋ bibele miduná été,
eé fonan ya é Mwán Mot,
a baga elíŋŋá deé kwíñ ñí mébɔ ósí,
kaná koŋ da é tsini á nkuk.
14 Á nló weñ ñí ya ésií deñ é mbé mfúm amvála ané mfúm etóp mbɔann ya mivwaát mí ntómá,
amvála ané nieve,
é mís meñ má amvála ané nkaba ndúán;
15 mébɔ meñ má ané zíiŋ é ntɔɔ́ evélé ná ngumá,
amvála ané é tám é ne á mbak ndúán été;
é kíŋŋ deñ da ané éduŋŋ ásɔk mendzímm.
16 A mbé a belé atéteñ zaŋgbéá é wéá meyóm weñ,
ánu deñ dá nténdéŋ nzwaokeŋ ó tɔɔ́ ya nzep é beáñ weé kwíñ.
17 Niané me ngá yén ñí,
ané me ngá ku ñí ané mbim mébɔ ósí,
éde a ngá bere ma é wéá meyóm weñ áyóp,
eé dzó ma ná,
“Kaa kɔ wɔŋŋ,
ma me ne Atáraga ya fe Ámanaŋa,
18 éñí a ne ntétéá!
Me mbé nwúán;
ve dága ná éndagá me ne ntétéá,
kɔ́mm ya kɔ́mm,
me belé fe bídzipga bíye áwú ya á sí békónn.
19 “Tsiligé é mam o mvá yén,
ya émá me ne,
ya fe émá mé nkún nzu bɔban niané émá mé lot yaá.
20 Édí dá nzaman kén mot ébe átéteñ zaŋgbéá o mvá yén é wéá méyóm wɔm,
ya bibele miduná bí koŋ zaŋgbéá édɔ dí:
Átéteñ zaŋgbéá é ne baángel béye bikóánn bebwíni zaŋgbéá;
beláma zaŋgbéá,
bá bé ne bikóánn bebwíni zaŋgbéá.