Melépgá mfá nkaŋann biyemá
10
Á bɔbédzaŋ,
măá kómo ná míní tɔbɔ kaa áyem ná,
betará bése bá tɔbɔ á nkút ásí,
bésesé bá lot fe á máŋ été;
2 éde,
ébe Moisés bésesé bá mana duuban á nkút été ya fe á máŋ été.
3 Ané bésesé bé ngá dzí bidzí bivɔ́ɔ́ ya bivɔ́ɔ́ bíye á nsísim,
4 bésesé baá ñú fe meñú mevɔ́ɔ́ ya mevɔ́ɔ́ méye á nsísim;
amú ná,
bé ngá ñú ébe ákwá ye á nsísim é ngá bee bɔ́,
éde akwá te é mbé Kristo.
5 Ve,
ébá bé ngá bɔ kaa ávé Nzamá nlém mesán ébɔ́ bé ngá daŋ ya abwiññ été,
ané bé ngá lígi bé dzebe mévóm ya mevóm éyáŋŋ été.
6 Mam méte mé ngá bɔban ná mé bɔ bía efonann,
ná bí táa ñamle bembéa bé mam,
amvála ané bé ngá ñamle.
7 Míní táa bɔ bekaŋ biyemá,
amvála ané bevɔ́ɔ́ benziŋ béye ébe bɔ́;
amvála ané é ne ntsilann ná:
“Bot bé ngá tɔbɔ ósí,
ná bá dzí ya áñú,
véa bé tébe ná bá dzém tugá.”
8 Bí táa ki bɔ nsémm eveák amvála ané bevɔ́ɔ́ benziŋ béye ébe bɔ́ bé ngá bɔ nsémm eveák,
éde bé ngá wú mos mbɔ́ɔ́ bot táŋ binzuk mewóm mé beáñ ya binzuk bí léa (23,000).
9 Bí táa ki bóble Kristo,
amvála ané bevɔ́ɔ́ benziŋ béye ébe bɔ́ bé ngá bóble ñí,
éde bé ngá wú akála beñó.
10 Bí táa ki kɔ́bɔ ya Nzamá miswa,
amvála ané bevɔ́ɔ́ benziŋ béye ébe bɔ́ bé ngá kɔ́bɔ miswa,
éde nywíññ bot a ngá dzéa bɔ́.
11 Mam méte mé ngá bɔban ébe bɔ́ ané efonann,
éde mé ngá tɔbɔ ntsilann amvála ané melépgá á mfá wea,
bía,
ébá asúgánn ye métám é sian yaá ébe bɔ́.
12 Édɔ é ne ná,
éñí aa tém ná a yém á tɔbɔgé ya nkée,
ná a nza ku.
13 Nkat enziŋ wăá bé sian ébe mína ná ó sés éwí mot áse;
ve é Nzamá a ne éñí bá tɔbɔ ya ñí mebúnn ăá ye lík ná míní tɔbɔ á nkat été álot ábímm míní sés nzomo,
fáve ná ya nkat te aa ye fe vé ámvála bé ne wɔ́ kólo été,
á mfá ye ná míní ne wɔ́ ánzomo.
14 Ya amú dzam te,
á mindzindziŋŋ myám,
túpgán nkaŋann biyemá.
15 Ma kɔ́bɔ ya mína amvála ané mifefák mí bot:
Kíkgán nsaŋ ébe édí ma dzó.
16 É kɔ́p abwará éñí bía vé abwará ya dɔ,
nde se édɔ bía ñɔŋ ya dɔ ngap ébe mékií Kristo?
Mfémm bía bák,
nde se éwɔ bía ñɔŋ ya wɔ́ ngap ébe é ñúu Kristo?
17 Dá é tɔɔ́ ná mfémm ó ne ovɔ́ɔ́,
ve bía,
bí fáŋ bɔ abwiññ,
bí ne ñúu fɔ́ɔ́;
amú ná bía bésesé bía bía ñɔŋ fe ngap ébe mfémm ovɔ́ɔ́ te.
18 Dággán áyɔŋ Israel ye é sí ñí:
ébá bá dzí metúnŋa,
nde băá ñɔŋ ngap áltar?
19 Éde,
nzá dzam ma kómo dzó ya dɔ?
Ye ná bidzí bá vé biyemá ané metúnŋa bí ne dzóm enziŋ,
ye ná eyemá dá é ne ki dzóm enziŋ?
20 Fáve ná,
é byém meyɔŋ mefé má vé ané metúnŋa,
bá vé dɔ bembéa misísim,
se Nzamá;
ma măá kómo ná míní ñɔŋ ngap mínabe bembéa misísim.
21 Míní sés ñú é kɔ́p Ntí ya fe é kɔ́p bembéa misísim;
míní sés ñɔŋ ngap ébe é téble Ntí ya fe ébe é téble bembéa misísim.
22 Ye ná bía ye sɔŋ Ntí ya abéánn?
Ye ná bía daŋ ki ñí ya nguu?
Bɔgán dzam ése ná míní vé Nzamá dúmá
23 É ne filí ná bé bɔ dzam ése,
ve dzam ése é sés ya abúánn;
é ne filí ná bé bɔ dzam ése,
ve dzam ése dăá vé mot nguu.
24 Mot enziŋ a táa dzéŋ é mvéáñ dzeñ émyen,
fáve éñí é mot mbɔ́ɔ́.
25 É dzóm ése bá kuan á mákít,
dzáán dɔ kaa ásíli dzam enziŋ,
ákála ósímánn ye á nlém.
26 Amú ná,
Ntí éñe a ne ya sí ngúrá ya fe é dzóm ése é ne été.
27 Ngé mot enziŋ ye á sés mbwíni a bána mína,
mína míní yébe fe ná mína ke,
dzáán é dzóm ése bá téle mína ósú,
kaa ásíli dzam enziŋ,
ákála ósímánn ye á nlém.
28 Ve ngé mot enziŋ aa dzó mína ná:
“Bé vé yaá biyemá é dzóm dí ané metúnŋa;”
míní táa fe dzí,
ákála é mot á dzó mína dɔ,
ya ákála ósímánn ye á nlém;
amú ná,
Ntí éñe a ne ya sí ngúrá ya fe é dzóm ése é ne été.
29 Ma dzó ná,
se ósímánn we,
fáve éwí é mot mbɔ́ɔ́.
Éde,
amú dzé fá bá ye kík étɔɔ́ filí dam misaŋ ya éyá osímánn ye á nlém?
30 Ngé ma ñɔŋ é ngap dam meé vé akíba,
amú dzé bé ne ma kɔ́bɔ abé ébe édí ma vé akíba?
31 Édɔ é ne ná,
ané mína dzí,
ngé áñú,
ngé ki dzam enziŋ afé mína bɔ,
bɔgán dɔ ásesé á mfá é dúmá Nzamá.
32 Míní táa bɔ é dzóm dá kɔp mot obaá ané bejudio,
ané begriego,
ngé ki ékóánn bebwíni Nzamá.
33 Amvála te fe ma ma dzéŋ ná bot bése bé ñɔŋ mesán á nlém ébe dzam ése,
kaa ádzéŋ ábúánn dam mámyen,
fáve édí abwiññ bot,
á mfá ye ná ngé bé ne tɔbɔ nkoránn.