Yesus aa yágale bot adzó mvas
10
Ané Yesus a ngá tébe,
a kólo vóm te,
éde a ngá sian ábeŋŋ sí ye á Judea á Yordán áyát;
ané mikuna mí bot mí ngá nzu ñí kóán á mféŋŋ,
ya amvála ané é mbé ñí fúlú,
á ŋga bera bɔ́ vé ayágalé.
Markos 10.1-31
2 Éde befariseo benziŋ bé ngá nzu koan ya ñí,
á mfá ye ná bé bóble ñí,
ané bé ngá síli ñí ná,
“Ye nkɔɔ́ métsiŋŋ wá lére ná fám eé vé é miningá weñ mvas?”
3 Éde a ngá yalan ya bɔ́ ná,
“Moisés aa mánan mína ná dzé?”
4 Ané bé ngá yalan ná,
“Moisés á lík ná fám e ne tsili miningá kálara mvas,
a tep ñí.”
5 Ve Yesus a ngá dzó bɔ́ ná,
“Moisés a ngá tsili mína mvéná te ya akála áleét milém denan.
6 Ve,
atéé ye átáraga ye éniŋ,
Nzamá a ngá vele bɔ́,
fám bá miningá.
7 Amú dzam te,
fám da ye lík éséá bá ñiá,
mfá áke átɔbɔ bá é miningá weñ,
8 ané bé beáñ bá ye bɔ nson mbɔ́ɔ́.
Édɔ ná,
bé sés fe bot bé beáñ,
fáve ná bé ntɔɔ́ nson mbɔ́ɔ́.
9 Édɔ ná é dzóm Nzamá á lat yaá,
mot enziŋ a táa dɔ kánan.”
“É mot áse aa vé ngéá mvas a lúk miningá mfé aa bɔ medzíán mfá é miningá a mvá tára belé.
12 Ngé miningá te ñí a vas ki ébe nnóm,
a kéñ lúk fám fé,
aa bɔ medzíán.”
Yesus aa bwárán ya bɔ́ŋŋ
13 Ané bé ngá nzu ya ñí ya bɔ́ŋŋ ná á nama bɔ́,
éde beyága bé ngá yéá bɔ́ ya dɔ.
14 Ve niané Yesus ñí a ngá yén dɔ,
ané a ngá wók abé,
éde a ngá dzó bɔ́ ná,
“Líkgán bɔ́ŋŋ ná bé nzu ébe ma;
míní táa bɔ́ kam ya dɔ,
amú ná édzwée ngɔ́mán Nzamá é ne édí é bot bé ne amvála ané bɔ́ŋŋ.
15 Ma dzó mína bébélá ná,
é mot aa ye bɔ kaa áñɔŋ édzwée ngɔ́mán Nzamá amvála ané mɔ́ŋŋ,
ăá ye ñíi été.”
16 Éde a ngá baga bɔ ya é mó meñ,
á ŋga bwárán ya bɔ́,
eé bere bɔ́ mó.
Yesus bá nkúkúmm
17 Éyɔŋ Yesus a ngá kólo ná a bera tsíni ya é dulu deñ,
éde mot enziŋ a ngá sɔ́ mbíí,
a sɔ́ ñí kút mebɔ́ŋŋ ébe ású deñ,
éde a ngá síli ñí ná,
“Á mbamba Nyágale,
nzá dzam ma ye bɔ á mfá ye ná me ñɔŋ tsígá éniŋ é ne mbéámbéá?”
18 Éde Yesus a ngá yalan ya ñí ná,
“Amú dzé wa lwée ma ná mbamba mot?
Mot enziŋ a sés mbamba mot,
fáve Nzamá etámm.
19 Wa yem memvéná,
‘O táa ywíñ mot,
o táa bɔ medzíán,
o táa dzíp,
o táa vé é ngañiá a ne minéa,
o táa duk mot,
sémeŋé ésúá bá ñuá.’ ”
20 Éde mot te a ngá dzó ná,
“Á Nyágale,
me dzálá yaá mam méte mése atéé ye me mbé ndómán.”
21 Ve Yesus a ngá dága ñí ya edziŋŋ,
éde a ngá dzó ñí ná,
“Dzam avɔ́ɔ́ dá dzéŋ wa;
kéŋ,
o kuan é dzóm áse o belé,
o vé dɔ mitétéññ,
wa ye belé ntam á dzóp été,
véa,
nzaá [o baga é krús we],
eé bee fe ma.”
22 Ve mot te,
a ngá tɔbɔ eywiññ ya bifíá bíte,
éde a ngá búlán eywiññ,
amú ná a mbé a belé abwiññ akúmm.
23 Éde Yesus a ngá dága meféŋŋ,
ané a ngá dzó béyága beñ ná,
“Nzá amvála ayéñ dá ye bɔ,
ná é bot bé belé akúmm bé ñíi édzwée ngɔ́mán Nzamá.”
24 Ané beyága bé ngá voŋbe ya bífíá byeñ,
ve Yesus a ngá bera yalan ya bɔ́ ná,
“Á bwán,
é ne ayéñ ná [é bot bá tɔbɔ ya akúmm mebúnn] bé ñíi édzwée ngɔ́mán Nzamá!
25 Dá daŋ ya ebúbú ná kamelio eé ñíi ávéŋŋ ondondɔɔ,
ye ná nkúkúmm mot ó ñíi édzwée ngɔ́mán Nzamá.”
26 Ve bé ngá bíra daŋ voŋbe abwiññ,
bé ŋga dzó ébyen ya ébyen ná,
“Nzá fe aa ye tɔbɔ nkoránn?”
27 Yesus eé dága bɔ́,
ané a ngá dzó ná,
“Mfá bot é sés bɔban,
ve se á mfá Nzamá,
amú ná mam mése mé ne bɔban á mfá Nzamá.”
28 Éde Pedro a ngá tára ná aa dzó ñí ná,
“Dággán,
bí mana yaá lík ásesé ná bía bee wa.”
29 Ané Yesus a ngá dzó ná,
“Bébélá ma dzó mína ná é mot áse aa ye lík ndá,
bɔbéñaŋ,
bekéá,
éséá,
ñiá,
ngé bwán,
ngé mefóo mé sí,
ákála dam ya édí mbamba fwéñ,
30 aa ye byɔ ñɔŋ álot táŋ ntet biyɔŋ é tám ñí ébyen mendá,
bɔbéñaŋ,
bekéá,
beñiá,
bwán ya mefóo mé sí,
fufúlu ya ndzéŋán ásí;
é tám dá nzu,
dá aa ye ñɔŋ éniŋ é ne mbéámbéá.
31 Ve,
abwiññ é téle ósúá dá ye súgan ó mvús,
édí dá é téle ó mvús dá ósú.”
Yesus aa bera kat fwéñ áwú deñ
32 Bé ŋga ke ókaŋŋ été béé ke á Yerusalen,
Yesus eé ke bɔ́ ósú;
beyága bé mvóó,
é bot bá bé ngá bee ñí ó mvús,
bá bé ŋga kɔ wɔŋŋ.
Éde Yesus a ngá bera lwée évwíñ awóm beyága ya beyága bé beáñ,
ané a ngá tára bɔ́ dzó é mam mé nkún ñí bɔ:
Markos 10.32-52
33 “Dággán,
bía kean á Yerusalen,
é Mwán Mot bá ye ñí kee ébe betébosú befára ya beyágale métsiŋŋ.
Bá ye ñí kík nsaŋ ná aa yian wú,
bé kee fe ñí bot béye meyɔŋ mefé.
34 Bá ye ñí kpógo,
bé ŋga túp ñí menden,
bá ye ñí yít,
bé ywíñ fe ñí;
ve,
niané melú mé léa má lot aa ye wómo.”
Yesus aa yalan ya é bwán Zebedeo
35 Ané Jakobo bá Juan,
é bwán Zebedeo,
bé ngá nzu ébe Yesus,
béé dzó ñí ná,
“Á Nyágale,
bía kómo ná o bɔ bía é dzam bía dzaa wa dí.”
36 Éde a ngá síli bɔ́ ná,
“Nzá dzam mína kómo ná me bɔ mína?”
37 Ané bé ngá yalan ya ñí ná,
“Bɔɔ́ge bía ná,
á dúmá dwe été,
bí tɔbɔ ósí mot mbɔ́ɔ́ mfá meyóm mwe,
éñí mbɔ́ɔ́ ñí a mfá meyéá mwe.”
38 Ve Yesus a ngá dzó bɔ́ ná,
“Mínăá yem é dzam mína dzaa.
Ye míní ne ñú é kɔ́p ma ñú,
ngé ki átɔbɔ nduubán amvála nduubán me ne nduubán ya dɔ?”
39 Ané bé ngá yalan ya ñí ná,
“Bí ne dɔ bɔ.”
Éde Yesus a ngá dzó bɔ́ ná,
“Mína ye ñú é kɔ́p ma ñú,
mína ye fe duuban amvála nduubán me ne nduubán ya dɔ;
40 ve,
átɔɔ mína ósí mfá meyóm wɔm ngé ki mfá meyéá wɔm,
a sés é dzam ma ma vé,
ve é ne fáve é bot ébyen é ntɔɔ́ nkomann.”
41 Niané beyága awóm bé ngá wók dzam te,
ané bé ngá tára ná bá yéá ya Jakobo bá Juan.
42 Éde Yesus a ngá lwée bɔ́,
ané ngá dzó bɔ́ ná,
“Mína yem ná é bot bá nómán bedzwée á meyɔŋ mefé été,
bá dzwée bɔ́ abé,
ya fe ná bora bé bot béye été bá bá dzwée fe bɔ́ ya elaŋ.
43 Ve ébe mína,
é sés amvála te,
fáve ná,
é mot áse aa kómo bɔ bora mot ébe mína aa yian bɔ mvwála bíséññ wenan,
44 ve éñí ñí aa kómo bɔ ntébosú,
aa ye bɔ óloá mot áse.
45 Amú ná atwaa é Mwán Mot ñí a eé ndzí ki sɔ́ á mfá ye ná bot bé belan ya ñí,
fáve ná mfá ánzu belan ya bot,
ya mfá ávé éniŋ dzeñ amú akoroga abwiññ bot.”
Yesus aa séñ Bartimeo
46 Ané bé ngá sian á Yeriko.
Éde éyɔŋ Yesus a ngá kólo á Yeriko bábe béyága beñ ya fe mora nkuna bot,
engóngɔ́ɔ́ mot,
é tɔɔ́ ndzíndzímm,
béé lwée ñí ná Bartimeo,
é mwán Timeo,
a mbé a tɔɔ́ á nzenn áyóp.
47 Éde éyɔŋ a ngá wók ná a ne Yesus mwann Nasareno,
ané a ngá tára ná aa yón,
eé dzó ná,
“Á Yesus é mwán David,
kpeegé ma engóngɔ́ɔ́!”
48 Éde abwiññ bot é ngá báma ñí ná á sis evóó,
ve ñí a ngá daŋ bera yónyón abwiññ,
eé dzó ná,
“Á é mwán David,
kpeegé ma engóngɔ́ɔ́!”
49 Ané Yesus a ngá tébe,
a dzó ná,
“Lwéegán ñí!”
Éde bé ngá lwée ndzíndzímm te,
béé dzó ñí ná,
“Sánŋe;
o tébe fe,
aa lwée wa.”
50 Ané a ngá dzíga wea etóp a mbé a baga áyóp ó sí,
a tébe avóó,
éde a ngá ke ébe Yesus.
51 Ané Yesus a ngá síli ñí ná,
“Nzá dzam wa kómo ná me bɔ wa?”
Éde ndzíndzímm ó ngá yalan ya ñí ná,
“Á Raboní,
ma kómo bera yén.”
52 Ané Yesus a ngá dzó ñí ná,
“Kéŋ,
mbwínánn we ó séñ yaá wa.”
Etéññ te ébyen,
éde a ngá bera yén,
á ŋga bee Yesus ó nzenn.